Psalmen 143

143

Nemm mie nich verem Jerecht

1Een Psalm von David. Oo Har, hia mien Jebäd; horch, woo ekj om Jnod bäd. Wiels du woarhauftich un jerajcht best, auntwuat mie! 2Go met dienen Kjnajcht nich en daut Jerecht, wiels ver die es kjeen läwendja jerajcht. #Hiob 9,2; Psa 130,3; Reema 3,20 3De Fient vefolcht miene Seel un haft mien Läwen en de Ieed jeklunjt; hee moakt mie em diestren setten, soo aus dee, dee aul lang doot sent. 4Doawäajen es mien Jeist gaunz schwak, un mien Hoat mootloos.

5Ekj denkj noch aun de oole Tieden. Ekj denkj äwa aul dee Woakjen no, dee dien Hauntwoakj verecht haft. #Psa 77,6 6Ekj strakj miene Henj ut no die. Miene Seel darscht no die soo aus een utjedrieejdet Launt. #Psa 42,2-3 7Har, jeff mie boolt eene Auntwuat. Mien Jeist haft aule Hopninj veloaren. Vestäakj die nich fa mie, daut ekj nich met de Doodje toop to ligjen kom. 8Lot mie zemorjes hieren, woo truhoatich leeftolich du best, wiels ekj velot mie opp die. Wies mie dän Wajch, dän ekj gonen sull, wiels miene Seel velangt no die. 9Oo mien Har, rad mie von miene Fiend; en die hab ekj miene Tooflucht.

10Lia mie dien Wellen to doonen, wiels du best mien Gott; mucht dien gooda Jeist mie opp een jlikjen Wajch leiden. 11Oo Har, om dienen Nomen sient haulwen, bewoa mien Läwen, un en diene Jerajchtichkjeit halp mie utem Trubbel to komen. 12En diene truhoatje Leew venicht miene Fiend, un brinj dee aula om, dee miene Seel kjwälen, wiels ekj sie dien Kjnajcht.

Currently Selected:

Psalmen 143: PB

Highlight

Compare

Copy