Psalmen 140

140

Jebäd om Help jäajen dee, dee eenem schlajchtet noräden

1Een Psalm von David, väatosinjen. 2Halp mie, oo Har, von de beese Menschen loos; bewoa mie fa de vebräakjarische Menschen, 3dee en äare Hoaten beeset plonen, un aule Dach toopkomen to kjriejen. 4Dee moaken äare Tungen soo schoap aus eene Schlangentung, un haben Schlangenjeft unja de Leppen. #Reema 3,13 5Oo Har, hool mie secha fa de gottloose äare Henj. Bewoa mie fa de vebräakjarische Menschen, dee doa plonen mie doltokjrieen. 6De stolte haben fa mie eene Schlenj vestoaken, haben Strenj utjelajcht un doamet fa mie een Nat jespreet, un haben Faulen velenjd mien Stich jestalt.

7Oo Har, ekj saj die, du best mien Gott. Horch, oo Har, woo ekj om Jnod schrie. #Psa 22,11 8Oo Har Gott, de Krauft mie to raden, es en die, dee mie em Kjrich daut Schilt äwa däm Kopp helt. 9Har, jeff dän gottloosen nich wuano hee bejierich es; lot am daut met sien beeset Väanämen nich jlekjen, sest mucht hee noch stolt woaren. 10Lot dee äare Kjap, dee rom mie sent, met daut beese bedakjt woaren, waut äare Räd veuasoakt haft. 11Lot brennende Kolen opp an nopp faulen; lot dee em Fia nenn jeschmäten woaren, en deepe Lajcha nenn, niemols mea opptostonen.

12Lot faulsche Pludra sikj nich em Launt faustsaten; mucht daut Ojjlekj de Vebräakja ombrinjen. 13Ekj weet daut de Har fa de oame äa rajcht sorcht, un sikj de unjadrekjte äare Sach aunnemt. 14Secha woaren de jerajchte dienen Nomen lowen, un de Opprechtje woaren en diene Jäajenwuat wonen.

Currently Selected:

Psalmen 140: PB

Highlight

Compare

Copy