Psalmen 139

139

Mien Schepfa kjant mie gaunzungoa

1Een Psalm von David, väatosinjen. Oo Har, du hast mie unjasocht un kjanst mie. #(1 un 2) Psa 7,10; Jer 17,10 2Du weetst wan ekj sett un wan ekj oppsto. Du weetst von wiet auf, waut ekj denkj. 3Auf ekj opp un rom sie ooda ligj, du best om mie un best met aul miene Wäaj bekaunt. 4Ea ekj een Wuat opp de Tung hab, weetst du, oo Har, aul krakjt waut daut es. 5Du best von aule Sieden rom mie, un helst diene Haunt äwa mie. 6Soone Erkjantnis es too wundavoll fa mie un daut es too huach; ekj kaun daut nich bejriepen.

7Wua kaun ekj han gonen, dienen Jeist loostowoaren; wua han flichten, ut diene Jäajenwuat to komen? 8Wan ekj sull nom Himmel foaren, du best doa! Wan ekj mien Bad em Doodenrikj oppmuak, du best uk doa. #Amos 9,2 9Wan ekj daut Morjenroot aus Flichten neem un nom wietsten Mäa fluach, #Jona 1,3 10soogoa doa wudd diene Haunt mie leiden, un diene rajchte Haunt mie hoolen. 11Wan ekj sajen wudd, daut diestre sull mie bedakjen un daut Licht rom mie sull Nacht sennen, #(11 un 12) Hiob 34,22 12dan wudd soogoa daut diestre bie die nich diesta sennen; de Nacht wudd soo schienen aus de Dach, wiels fa die es daut diestre soo aus Licht.

13Wiels du hast mie gaunz un goa em Muttalief jeformt. 14Ekj dank die, daut ekj wundaboa jemoakt sie; diene Woakjen sent wundaboa, daut weet miene Seel sea goot. 15Miene Jestault wia fa die nich vestoaken, aus ekj em Jeheemen jemoakt wort, wua mie kjeen Uag seenen kunn. 16Diene Uagen sagen mie ea ekj jebuaren wia. Miene Doag, dee noch komen sullen, wieren aula en dien Buak jeschräwen, ea dee doa wieren. #Psa 31,16

17Woo wieetvoll, oo Gott, sent mie uk diene Jedanken. Un wooväl sent doa nich! #Psa 40,6 18Wan ekj dee talen sull, wudden doa mea sennen aus de Saunt. Wan ekj oppwakj, sie ekj noch bie die. #Psa 63,7

19Oo Gott, wan du de gottloose emol muchst äwatsied brinjen. Un wan dee, dee jieren Bloot vejeeten, mie veloten wudden. 20Dee räden jäajen die met beese Aufsecht. Diene Jäajna mesbrucken dien Nomen. 21Sull ekj nich dee veachten, waut die nich lieden kjennen, oo Har? Un sent mie dee nich äakjlich, dee jäajen die oppstonen? 22Ekj kaun dee gaunz opp Iernst nich lieden. Ekj hool dee aus miene Fiend.

23Gott, see emol woo daut met mie steit! Unjasieekj mien Hoat; proow mie ut un see, woo ekj daut meen. 24Un see emol auf ekj opp däm beesen Wajch sie, un leid mie opp däm eewjen Wajch!

Currently Selected:

Psalmen 139: PB

Highlight

Compare

Copy