Psalmen 115

115

De Iea traft Gott auleen

1Nich ons, oo Har, nich ons, oba dienen Nomen jeff de Iea, wiels du soo truhoatich un leeftolich best. 2Wuarom sullen de Velkja sajen: Wua es äa Gott? #Psa 42,4 3Oba ons Gott es em Himmel; hee deit waut hee well.

4Oba äare Jetta sent von Golt un Selwa, von Menschenhenj jemoakt. #(4-8) 5Mo 4,28; Jes 44,9-20 5Dee haben Miela, oba kjennen nich räden, Uagen un kjennen nich seenen. 6Dee haben Uaren, un kjennen nich hieren, Näsen, un kjennen nich rikjen. 7Dee haben Henj un kjennen nich feelen, Feet, un kjennen nich gonen; dee kjennen uk kjeen Jelud derch däm Hauls brinjen.

8Wäa soone Jetta moakt, es soo aus de Aufgott, un soo sent uk dee, dee sikj opp dee veloten. 9Oba, Israel, sat dien vetruen opp däm Harn. Wiels hee es diene Help un dien Schilt. 10Oo jie, ut Aaron siene Famielje, de Priesta Staum, sat jun vetruen opp däm Harn. Dee es june Help un jun Schilt. 11Jie, dee jie dän Harn ferchten, velot junt opp am. Dee es june Help un jun Schilt.

12De Har denkjt aun ons, un woat ons säajnen. Hee woat de Stam en Israel säajnen. Hee woat Aaron sienen Famielje Staum säajnen. 13Hee woat aul dee säajnen, dee dän Harn ferchten, auf kjlien ooda groot. 14Mucht de Har junt un june Kjinja emma mea vemieren. 15Mucht de Har, dee Himmel un Ieed jemoakt haft, junt säajnen. #Psa 134,3

16De Himmel sent dän Harn siene, oba de Ieed haft hee de Menschen jejäft. 17Daut sent nich de Doodje, dee rauf foaren no de stelle Städ, dee dän Harn lowen. #Jes 38,18 18Oba wie Läwendje lowen dän Harn von nu bat en aule Eewichkjeit. Haleluja!

Currently Selected:

Psalmen 115: PB

Highlight

Compare

Copy