Psalmen 116

116

Dankboa fa de Radunk vom Doot

1Ekj sie dän Harn goot, wiels hee hieed mie om Jnod bäden. 2Wiels hee no mie horchen deed, woa ekj am aunroopen, soolang aus ekj läw.

3Mie wieren de Doodesstrenj omjebungen, un de Angst fa daut Grauf stunt ver mie. Ekj kjeem en Noot un Älent nenn. 4Dan roopt ekj dän Harn sienen Nomen aun: Oo Har, rad miene Seel!

5De Har es jnodenvoll un jerajcht, un ons Gott es metliedent. 6De Har woakt äwa de eefache. Aus ekj en groote Noot wia, rad hee mie.

7Sie nu wada tofräd, oo miene Seel, de Har deit die goodet. #Psa 42,6 8Wiels du, oo Har, hast miene Seel vom Doot jerat, miene Uagen von de Tronen, miene Feet vom jleppen. 9Ekj woa doa manke Läwendje em Launt ver däm Harn waundlen. #Psa 142,6

10Ekj bleef tru, soogoa aus ekj säd: Ekj woa oba sea jeploacht. 11Un aus ekj veläajen wia, säd ekj: Aule Menschen sent Läajna! #Reema 3,4 12Waut kaun ekj dän Harn trigjtolen fa aul daut goode, daut hee aun mie jedonen haft?

13Ekj woa daut Drinkjopfa nämen, dän Harn doafäa to danken, daut hee mie jerat haft. 14Ekj woa ver aule Menschen doonen waut ekj dän Harn vesproaken hab.

15Siene heilje äa Doot es biem Harn sea wieetvoll. #Psa 72,14 16Ekj sie dien Kjnajcht, oo Har; ekj sie dien Kjnajcht, diene Deenarin äa Sän. Du hast mie ut de Kjäden jeräten.

17Ekj woa die een Dankopfa brinjen, un dän Harn sienen Nomen aunroopen. #(17 un 18) Jona 2,10 18Ekj woa dän Harn ver aul sien Volkj betolen, waut ekj am vesproaken hab, 19opp däm Hoff, ver däm Harn sien Hus, medden en Jerusalem. Haleluja!

Currently Selected:

Psalmen 116: PB

Highlight

Compare

Copy