Psalmen 111

111

Dank fa Gott siene Wundamacht

1Haleluja! Ekj woa dän Harn en de Vesaumlunk von de Opprechtje un en de Jemeent von gaunzem Hoaten danken. 2Groot sent däm Harn siene Woakjen; dee woaren von aulem bewundat, dee eene Freid doaraun haben. 3Siene Woakjen sent harlich un wiet bekaunt, un hee blift opp emma jerajcht. 4Hee haft Uasoak jejäft aun siene Wunda to denkjen; de Har es jnodenvoll un metliedent. #2Mo 12,1-28 5Hee jeft dee to äten, dee am ferchten. Hee woat emma aun sienen Bunt denkjen. #Psa 145,15 6Hee haft sien Volkj siene jewaultje Woakjen doarenn seenen loten, daut hee an aundre Velkja äare Lenda jeef. 7De Woakjen, dee siene Henj jedonen haben, sent woarhauftich un jerajcht; opp siene Väaschreften es to veloten; 8dee woaren emma un eewich fauststonen; dee sent tru un opprechtich jejäft worden. 9Hee sorcht fa eene Radunk fa sien Volkj un vespruak daut sien Bunt eewich bliewen wudd. Heilich un jewaultich es sien Nomen. 10Weisheit kjemt derch Gottesforcht; wäa vestendich es, helt sikj aun siene Jebooten. Hee saul eewich jeloft woaren. #Spr 1,7

Currently Selected:

Psalmen 111: PB

Highlight

Compare

Copy