Psalmen 108

108

Dankboare Sechaheit en de Noot

(Varzh 2-6: 57,8-12; Varzh 7-14: 60,7-14)

1Een Psalmleet von David. 2Mien Hoat es opp iernst reed, oo Gott, ekj woa sinjen un Instrumenten spälen. Wakj opp, miene Seel. #(2-6) Psa 57,8-12 3Wakj opp, miene Hoap un Jittoa! Ekj woa die tiedich met Leeda lowen. 4Ekj woa die, oo Har, manke Velkja lowen; ekj woa manke Menschen von die sinjen. 5Wiels diene truhoatje Leew es groot, hecha aus de Himmel, un die es to vetruen, soo wiet aus de Wolkjen gonen. #Psa 36,6; 57,11 6Gott, häw die äwa aule Himmel, un lot diene Harlichkjeit äwa de gaunze Ieed sennen!

7Rad ons met diene rajchte Haunt, un auntwuat opp ons Jebäd, daut dien Volkj, daut du goot best, kaun jeholpen woaren. #(7-14) Psa 60,7-14 8Gott haft en sien Heilichtum jerät, un hee säd: Ekj sie froo daut ekj Sichem endeelen kaun, un daut Sukkot Tol aufmäten. 9Gilead un Manasse sent beid miene; Efraim es miene Koppbedakjunk; un Juda halpt mie daut Jesaz uttofieren. 10Moab es miene Wauschkomm; äwa Edom schmiet ekj miene Schoo, to bewiesen daut et mient es; äwa de Filista woa ekj jewennent schrieen em Triumf, sajcht Gott.

11Wäa woat mie halpen en dee stoakje, vesechade Staut nenn to komen? Wäa woat mie no Edom brinjen? 12Woascht du daut nich doonen, Gott, dee du ons vestat hast, un nich mea met onse Kjrieja metjeist? 13Halp du ons jäajen onse Fiend, wiels Menschenhelp halpt ons nuscht.

14Wan Gott met ons es, woa wie fauststonen, un hee woat onse Fiend unjaklunjen.

Currently Selected:

Psalmen 108: PB

Highlight

Compare

Copy