Psalmen 105

105

Gott helt sien Vespräakjen

(Varzh 1-15: 1Chr 16,8-22)

1Dankt däm Harn un vebreet sienen Nomen; sajcht aule Velkja, waut hee jedonen haft. #(1-15) 1Chr 16,8-22 2Sinjt un spält to siene Iea; rät von aul siene Wunda. 3Rät huach von sienen heiljen Nomen. Lot dee, dee dän Harn sieekjen von Hoaten froo sennen. 4Sieekjt dän Harn un siene Krauft; hoolt am emma em Uag. 5Denkjt aun siene Wundawoakjen, dee hee jedonen haft, siene Wunda un Uadeelen, dee hee utjesproaken haft, 6jie, dee von sienen Kjnajcht Abraham staumen, jie Kjinja von Jakob, dän hee sikj jewält haud.

7Hee es de Har ons Gott! Siene Jesazesuadeelen sent fa de gaunze Welt. 8Hee haft sienen Bunt niemols vejäten, daut Wuat, daut hee fa 1.000 Jennerazionen befool, #5Mo 7,9 9dän Bunt, dän hee met Abraham muak, un dän hee Isaak wada jeschwuaren haud. 10Hee bestädijd dän Bunt met Jakob aus eene Väaschreft em Jesaz, un met Israel aus een Bunt, dee opp emma wia, 11un säd, aus see doa noch mau sea weinje un framd bennen wieren: #1Mo 12,7 12Die well ekj daut Launt Kanaan jäwen, aus een Oafgoot. 13Dan trocken see von een Volkj no daut aundre, un von een Kjennichrikj no daut aundre. 14Hee leet an von kjeenem unjadrekjen, un hee stroft soogoa Kjennichs om äat haulwen, #4Mo 23,7-10 15un säd: Jie sellen miene jewälde nich em Wäaj stonen, un miene Profeeten kjeen Schoden aundoonen.

16Un hee leet eene Hungaschnoot em Launt komen, un see kunnen nich arnten uk nich äten; #1Mo 41,54 17un hee schekjt een Maun ver an han, Josef, dee aus een Sklow vekoft wia. #1Mo 37,28 18Hee kjrieech schlemme Feet von de Kjäden, un rom sien Jenekj haud hee een Iesarinkj, 19bat daut soo romkjeem aus hee jesajcht haud, bat de Har sien Wuat fauststald, daut hee rajcht wia. 20Dan schekjt de Kjennich wäm han am loostoloten; de Har äwa de Velkja befool am frietostalen. #1Mo 41,14 21Hee muak am Har äwa sien Hus, un jeef am de Macht äwa aul sien Rikjtum, 22siene väaschte to belieren, soo aus am daut jefoll, un siene Eltestasch lieren weis to sennen. 23Dan trock Israel no Ägipten; Jakob läwd aus een framda en Ham sien Launt. #2Mo 1,7.12

24De Har leet daut Volkj sea vemieren, un muak an stoakja aus äare Fiend. 25Daut wort de Ägipta soo sea jäajenaun, daut see sikj eenich worden an met Lest to vesklowen. 26Hee schekjt an sienen Deena Moses, un uk Aaron, dän hee jewält haud. #2Mo 3,10; 4,14-16 27Dee deeden siene Wundatieekjens mank de Ägipta, un Wunda en Ham sien Launt. #2Mo 7,1—12,51 28Hee leet daut diesta woaren, un daut wort em Launt diesta; un see bleewen onjehuarsom to siene Wieed. 29Hee leet äare Wota Bloot woaren, un daut muak äare Fesch doot. 30Äa Launt kreiweld voll Poggen, soogoa bat en de Kjennichs äare Stowen. 31Opp sien Wuat han, kjeemen doa Schwoarms Flieejen un Lies äwa äare gaunze Jäajent. 32Hee jeef an Hoagel en de Städ Räajen, un Blitzen, dee äwa daut gaunze Launt strolden. 33Hee schluach äare Wiengoades un Fiejenbeem dol un vebruak de Beem en äare Jäajent. 34Opp sien Wuat han, kjeem eene ontalboare Zol Graushoppa. 35Dee freeten aules opp waut em Launt jreen wia, uk aule Frucht dee ut de Ieed woss. 36Hee brocht aule Ieeschtjebuarne en Ägipten om, de Ieeschtjebuarne Säns wuarenn äare Krauft wia. 37Un hee brocht Israel rut met Golt un Selwa beloden, un doa wia nich een schwaka mank aul äare Stam. #2Mo 12,35 38Ägipten wia froo aus de Israeliten veleeten, wiels see hauden aula Angst fa an. 39Hee spreed eene Wolkj ut, an to bedakjen, un een Fia, daut see de Nacht Licht hauden. #2Mo 14,20 40See prachaden, un hee leet Wiltheena komen, un muak an saut met Broot vom Himmel. #2Mo 16,13-15 41Hee bruak dän Steen op, un daut Wota kjeem rut un rand aus een Riefa en de Wiltnis. #2Mo 17,6 42Wiels hee docht aun sien heiljet Wuat, daut hee sienen Deena Abraham jejäft haud.

43Sien Volkj wia froo aus hee an en äa Launt nenbrocht un siene jewälde sungen met Freiden. 44Un daut Launt wua de Velkja wonden, jeef hee an un see orwen waut aundre toopjeoabeit hauden, 45doaropp daut see siene Rajchts Väaschreften un siene Jesazen hoolen wudden. Haleluja!

Currently Selected:

Psalmen 105: PB

Highlight

Compare

Copy