Psalmen 103

103

Daut groote Dankjebäd

1Eent von David siene Psalmen. Low dän Harn, oo miene Seel, un met aulem waut ekj sie, low sienen heiljen Nomen! 2Low dän Harn miene Seel, un vejat nich waut hee die goodet jedonen haft; #5Mo 4,9 3dee die aul diene Sinden vejeft, un aul diene Krankheiten heelt, #Psa 32,1 4dee dien Läwen vom vedoawen rat, un met Jnod un Metleet kjreent, 5dee dien velangen met goodet tofräd stalt, soolang aus du läfst, daut du wada junk un stoakj woascht aus een Odla. #Jes 40,31

6De Har schauft Jerajchtichkjeit un rajcht fa aulem dee orrajcht lieden. 7Hee muak Moses met siene Wäaj bekaunt, un leet daut Volkj Israel weeten, waut hee deed. #2Mo 33,13 8De Har es voll Jnod un Metleet, jeduldich un truhoatich leeftolich. #Psa 86,15 9Hee woat nich emma schellen, un woat nich eewich oajalich bliewen. #Jes 57,16 10Hee haundelt met ons nich doano aus onse Sinden vedeent haben, un stroft ons nich doano aus wie orrajcht jedonen haben. 11Wiels soo huach aus de Himmel bowa de Ieed es, soo groot es Gott siene truhoatje Leew to dee, dee am ferchten; #Psa 36,6; Jes 55,8-9 12soo wiet aus de Oosten vom Wasten es, nemt hee onse Sinden von ons wajch. 13Soo aus een Voda Metleet haft met siene Kjinja, soo haft de Har Metleet met dee, dee am ferchten. #Luk 15,11-24

14Hee weet von waut wie jemoakt sent; hee denkjt doaraun, daut wie bloos Stoff sent. #1Mo 2,7; 3,19 15Een Menschenläwen es soo aus Graus; hee blieecht soo aus eene Bloom oppe Stap; #(15 un 16) Psa 90,5-6; Hiob 7,10 16wan de Wint doa äwablost, es dee wajch, un kjeena denkjt doaraun, wua dee jestonen haft. 17Oba dän Harn siene truhoatje Leew es emma un eewich äwa dee, dee am ferchten, un siene Jerajchtichkjeit opp Kjinja un Grootkjinja, #Luk 1,50 18bie dee, dee sienen Bunt hoolen, un doaraun denkjen to doonen, waut siene Jebooten sajen.

19De Har haft sienen Troon em Himmel faustjesat, un hee es Kjennich un rejieet äwa aules. 20Loft dän Harn, jie siene jewaultich stoakje Enjel, dee doa doonen waut hee sajcht, un sien Wuat jehuarsom sent! #(20-22) Jes 6,1-4; Psa 29,1; 148,1-14; Dan 7,10 21Loft dän Harn, jie siene Deena, dee sien Wellen doonen! 22Loft dän Harn, aul siene Woakjen, wuaemma hee rejieet! Low dän Harn, oo miene Seel!

Currently Selected:

Psalmen 103: PB

Highlight

Compare

Copy