Psalmen 102
102
Hopninj en de Noot
1Een Jebäd om Zion wada häatostalen. 2Hia mien Jebäd, oo Har; lot mien prachren om Help no die komen. 3Vestäakj dien Jesecht nich fa mie wan ekj en Noot sie. Horch no mie wan ekj roop, un doo mie schwind auntwuaten.
4Wiels miene Doag vegonen aus een Ruak, un miene Been brennen aus jläarendet Gloot. 5Mien Hoat es doljeschloagen un licht soo aus vewalkjtet Graus, daut ekj soogoa vejät mien Broot to äten. 6Derch mien lieden un stänen es von mie aul mau bloos Hut un Knoakes jebläwen. 7Ekj sie soo aus eene Stap Ul en de Wiltnis, soo aus eene Ul en vestieede Städa. 8Ekj ligj waka, aus een eensomet Voagel oppem Dak. 9Miene Fiend spotten dän gaunzen Dach äwa mie; dee, dee mie veachten, brucken mienen Nomen toom schwieren. 10Wiels ekj ät Ausch aus mien Äten, un menj miene Tronen mank daut waut ekj drinkj, 11wiels diene Rach soo groot es, un du mie oppjehowen un wajch jeschmäten hast. 12Miene Doag sent soo aus een Owent Schauten, un ekj vedrieej soo aus Graus. #Psa 90,5-6
13Du oba, oo Har, setst eewich opp dien Troon, un dien Nomen woat niemols vejäten woaren. #Psa 135,13 14Du woascht die oppmoaken un äwa Zion Metleet haben, wiels daut es Tiet daut du äa Jnod bewiesen deist, un de Stund es jekomen. 15Wiels diene Deena schazen Zion äare Steena huach; dee jaumat daut, daut et aula to Stoff jeworden es. 16De Velkja woaren dän Harn sien Nomen ferchten. Aule Kjennichs opp de Ieed woaren diene Harlichkjeit ferchten.
17De Har woat Zion wada oppbuen; hee woat en siene Harlichkjeit komen. 18Hee woat opp de velotne äa Jebäd auntwuaten; hee woat äa Jebäd nich veachten. 19Lot dit fa de Nokomen doljeschräwen woaren, soo daut een Volkj, daut noch nich jebuaren es, dän Harn lowen woat. 20Hee kjikjt ut sien Heilichtum dort huach rauf; vom Himmel kjikjt de Har no de Ieed, #Psa 14,2 21de faustjenomne äa stänen to hieren un dee Frieheit to schaufen, dee toom Doot veuadeelt wieren. 22Dan woat en Zion wada von dän Harn sien Nomen jerät woaren, un see woaren am en Jerusalem lowen, 23wan de Velkja un de Kjennichsrikjs sikj vesaumlen, däm Harn auntobäden. #Psa 87,4; Jes 60,3-10; Luk 13,29-30
24Hee haft mie medden em Läwen de Krauft jebroaken, un haft mien Läwen vekjart. 25Ekj säd: Oo mien Gott, nemm mie nich medden em Läwen wajch! Diene Joaren bliewen emma en emma! #Psa 55,24 26Em Aunfank lädsd du de Ieed dän Grunt, un diene Henj haben dän Himmel jemoakt. #(26-28) Heb 1,10-12 27Dee woaren vegonen, oba du blifst! Dee woaren aula vebrukt woaren soo aus Kjleeda. Du woascht met dee soo omgonen aus met een Kjleet, un dee äwatsied brinjen. #2Pet 3,10 28Oba du blifst soo aus du best un diene Joaren nämen kjeen Enj. 29Diene Deena äare Kjinja woaren bliewen, un äare Kjinja woaren ver die secha läwen.
Currently Selected:
Psalmen 102: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
