Spricha 9
9
De Weisheit un de Dommheit loden en
1Weisheit haft äa Hus jebut.
See haft daut opp säwen utjehakte Feilen jebut.
2See haft äa Fleesch jereet un äaren Wien toopjerieet,
un haft uk äaren Desch oppjesat.
3See haft uk äare Kjäakjsches rutjeschekjt,
daut see von de hechste Städen en de Staut roopen:
4“Lot aule onvestendje hia nenn komen!”
Un to de onbedochte sajcht see:
5“Ät mien Äten un drinkjt dän Wien dän ekj toopjerieet hab.
6Komt von june onvestendje Wäaj, dan woa jie läwen;
waundelt en vestendje Wäaj.”
7Wäa eenen Spetta trajchthalpt, recht sikj Beleidjunk aun.
Wan du eenen gottloosen vemonst, woat dee die Schoden aundoonen.
8Vemon nich eenen Spetta; dee woat die veachten.
Vemon eenen weisen Maun, dee woat die goot sennen.
9Belia eenen Weisen, un dee woat noch weisa woaren;
belia eenen jerajchten Maun, un dee woat weisa woaren. #Mat 13,12
10De Weisheit fangt aun wan eena däm Harn fercht;
dän Heiljen kjanen lieren, brinjt Vestentnis. #Spr 1,7
11Derch mie woaren diene Doag väl sennen,
un die woaren Joaren toom Läwen biejetalt woaren.
12Wan du weis best, woat diene Weisheit die beloonen,
oba wan du een Spetta best, woascht du selfst doarunja lieden.
13Daut jeft een duseljet ludet Frumensch,
dee äaren Vestaunt nich brukt un kjeene Schomp haft.
14See sett opp eenen Stool bie de Däa von äa Hus,
opp däm hechsten Plauz en de Staut.
15See schricht dee aun dee doa vebie gonen,
un opp däm rajchten Wajch gonen:
16“Lot aule ojjelieede hia nenn komen.”
To dee, dee daut aun Vestentnis fält sajcht see:
17“Jestolnet Wota es seet,
un Broot em Jeheemen jejäten schmakjt scheen.” #Spr 20,17
18Oba see weeten nich daut de Doodje doa sent,
daut äare Jast deep em Grauf ligjen.
Currently Selected:
Spricha 9: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
