Spricha 8
8
De Weisheit Roopt
1Roopt de Weisheit nich? Lat de Kluakheit sikj nich hieren? #(1-3) Spr 1,20-23
2Opp de Humpels aun de Wäaj,
uk wua de Stiej sikj trafen, stald see sikj han.
3Aun de Puaten wua daut en de Staut nenn jeit,
doa steit see aun de Puaten un schricht met lude Stemm:
4Jie Mana, ekj roop junt;
ekj schrie soo daut mie aule Menschen hieren sellen.
5Jie dee noch onbelieet sent, lieet jun Vestaunt to brucken,
un jie Noaren, lieet veninftich to sennen.
6Horcht, ekj hab wieetvolle Dinja to räden.
Ekj sie doaropp ut, to sajen waut rajcht es.
7Mien Mul rät de Woarheit,
un miene Leppen sent jäajen waut gottloos es.
8Aules waut ekj räd es jerajcht;
ekj räd nuscht krommet ooda vekjieedet.
9Fa dee, dee miene Räden vestonen, sent dee rajcht.
Dee haben kjeene Fäla, fa dee, dee dee aunnämen wellen.
10Wält miene Belierunk en de Städ Selwa,
un Vestaunt leewa aus daut reinste Golt. #Spr 3,14
11Weisheit es mea wieet aus Parlen,
un nuscht, daut eena sikj wenschen kaun, es met ar to vejlikjen.
12Ekj sie Weisheit, un won met de Kluakheit toop.
Ekj hab Vestaunt uk Venunft.
13Däm Harn ferchten meent daut beese veschmieten.
Ekj kaun dän Stolt, daut prauzje, de beese Wäaj un vedreide Räd nich vedroagen.
14Rot jäwen un opprechtich uadeelen kjemt beides von mie;
ekj hab Krauft un vesto eene Sach.
15Derch mie rejieren Kjennichs,
un derch mie moaken Leida jerajchte Jesazen. #Spr 16,12
16Derch mie rejieren de Präsidenten,
un uk aule Leidasch opp de Ieed.
17Ekj sie dee goot, dee mie goot sent,
un dee, dee no mie sieekjen, finjen mie.
18Bie mie sent Rikjtum un Iea
un bliewendet Jlekj un jerajchtet Läwen.
19Waut jie von mie kjrieen es bäta aus feinet Golt;
waut aun mie es, es bäta aus Selwa.
20Soo aus ekj haundel, es jerajcht;
ekj hool mie aun waut rajcht es.
21Ekj vesorj dee rikjlich, dee mie goot sent,
un moak an de Schauzkoma voll.
22De Har brocht mie verendach, aus daut ieeschte von aul siene Woakjen,
ea hee met siene Woakjen en oole Tieden aunfunk. #(22-31) Hiob 28,23-28
23Ekj wort aul von Eewichkjeit bestemt,
vom Aunfank, ea de Welt doa wia.
24Aus doa noch kjeene groote Wota wieren,
un aus noch kjeene Borms met Wota kjwalden,
wort ekj aul verendach jebrocht.
25Ea de Boaj un Humpels aum Plauz jestalt worden, wia ekj aul doa,
26uk ea hee de Ieed un äare Stapen
un irjent Stoff von de Ieed en de Welt jemoakt haud.
27Ekj wia doa aus hee de Himmel aum Plauz stald,
aus hee daut Wota de Jrensen trock,
28aus hee de Wolkjen bowa ons faust stald,
un de Wotakjwalen em deepen secha stald,
29aus hee daut Mäa de Jrensen stald,
daut et nich wieda jinkj aus hee bestemt haud.
Aus hee dän Grunt fa de Welt läd, #Psa 104,9
30wia ekj de Bumeista dee am biestunt.
Ekj wia aule Dach froo, un freid mie bie am to sennen.
31Ekj freid mie to siene gaunze Welt,
un haud eenen Jefaulen aun de Menschheit.
32Nu, miene Kjinja, horcht no mie,
dee, dee opp miene Wäaj waundlen, jeit daut goot.
33Lot junt von mie belieren;
siet weis, un blieft doabie.
34Jesäajent es wäa no mie horcht,
dee wäa waka bie miene Däaren luat.
35Dee wäa mie finjt, finjt Läwen,
un de Har woat een Jefaulen aun däm haben.
36Wäa mie oba nich finjt, moakt sikj selfst Schoden,
un wäa jäajen mie es, sieekjt dän Doot.
Currently Selected:
Spricha 8: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
