Spricha 27
27
Äwalot aundre daut, die to lowen
1Low nich dän morjeschen Dach,
wiels du weetst nich waut vondoag noch passieren kaun. #Jak 4,13-14
2Lot eenen aundren die lowen, un nich dien ieejnet Mul,
eenen framden un nich diene ieejne Leppen.
3Een Steen es schwoa un Saunt haft eene Wicht,
oba eenen Noa sien romjewinkjsch es schwanda aus dee beid.
4Wutt es ommenschlich, un Oaja schmitt eenem om,
oba wäa kaun jäajen Aufgonst stonen?
5Vemonunk ver aulemaun es bäta aus heemliche Leew. #3Mo 19,17
6Eenen Frint kaust du vetruen, wan hee die uk wee deit,
un opp eenen Fient kaust du die nich veloten, wan hee die uk väl mol kust. #Psa 141,5; Mat 26,49
7Wäa äwasaut es, däm äakjelt soogoa de Honnich,
oba fa eenen hungajen es soogoa daut betre seet.
8Soo aus een Voagel, daut sien Nast velat,
es een Maun dee sien Hus velat.
9Saulweelj un Parfum moaken daut Hoat froo,
un soo deit uk een frintelja rotjäwenda Frint.
10Velot nich dienen Frint uk nich dienen Voda sienen Frint,
un go uk nich no dienen Brooda sien Hus wan du Ojjlekj hast,
wiels een Noba dicht bie es bäta aus een Brooda wiet auf. #Spr 18,24
11Mien Sän, sie weis un moak mie daut Hoat froo,
dan kaun ekj irjentwäm auntwuaten dee mie veacht.
12Een väasechtja Maun sitt daut Ojjlekj komen un brinjt sikj en Sechaheit,
oba de onbedochte gonen doa derch, un lieden doafäa.
13Wan wäa onbedocht jenuach es un fa eenen framden jebircht haft,
dan nemm sien Rock aus een Vespräakjen siene Schult to betolen,
uk wan hee daut fa een romdriefschet Frumensch jedonen haft!
14Wan een Maun sienen Noba tiedich zemorjes lud säajent,
nemt de Noba daut aus eenen Fluch en de Städ eenen Säajen.
15Eene striedaje Fru es soo aus wan
daut aun eenen räajnischen Dach biem dreplen blift. #(15 un 16) Spr 19,13
16Äa opphoolen es soo aus dän Wint opphoolen,
ooda soo aus Eelj met de Haunt nämen.
17Een Massa schoapt daut aundre,
soo aus een Maun dän aundren halpt.
18Wäa eenen Fiejenboom besorcht, at von de Frucht,
un wäa sienen Harn bedeent, woat jeieet.
19Soo aus een Jesecht sikj em Wota spieejelt,
soo spieejelt eenen Maun sien Hoat dän Maun.
20Daut Doodenrikj kaun emma mea nämen,
un soo sent Menschenuagen niemols tofräd. #Liera 1,8
21De Schmeltgropen toom Selwa un de Owen toom Golt,
oba een Maun woat doano jeprooft, waut aundre von am sajen, auf see am lowen ooda nich.
22Wan du eenen Noa uk met däm Staumpa fien schrooden wurscht aus Jeträajd,
kaust du doamet sien Jenoa nich ut am rut kjrieen.
23See daut du secha weetst, woo daut met diene Schop un Kosen steit,
un sie sorjfeltich om diene Häaden.
24Rikjtum blift nich opp emma,
un eene Kroon es nich secha vom Voda nom Sän.
25Wan daut Graus aufjeschnäden es un fresch aunfangt to waussen,
un daut Fooda opp de Boaj jesaumelt es,
26woaren de Lama die met Kjleeda vesorjen,
un de Kosen brinjen Jelt toom mea Launt kjeepen.
27Dan hast uk jenuach Kosenmalkj fa die,
fa diene Famielje un diene Deenstmejales.
Currently Selected:
Spricha 27: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
