Spricha 28
28
De fromma oama un ojjerajchta rikja
1De gottloosa rant wan am uk kjeena jajcht;
de jerajchte oba sent brow aus een Leiw. #Jes 57,21
2Wan de Menschen em Launt jäajenaun woaren, sträwen väle no Leida woaren,
oba een vestendja weisa Maun kaun lang rejieren.
3Een oama Maun, dee een Leida woat un dan de oame unjadrekjt,
es soo aus een Räajenstorm dee kjeene Arnt lat.
4Wäa daut Jesaz velat, loft de gottloose,
oba wäa daut Jesaz helt, sieekjt de gottloose to bekjamfen.
5Beese Menschen vestonen daut jerajcht sennen nich,
dee oba, dee däm Harn sieekjen, vestonen daut volstendich.
6Een oama Maun, dee fromm läft, es bäta auf
aus een rikja Maun, dee vekjieede Wäaj jeit. #Spr 19,1
7Wäa daut Jesaz helt, es een vestendjet Kjint,
wäa schlajchte Frind haft, brinjt sienen Voda Schaund.
8Wäa sien Goot met Entras un Priesen hecha driewen vemieet,
saumelt daut bloos fa dän, dee sikj äwa de oame erboarmt. #3Mo 25,35-37; Spr 13,22
9Wan een Maun nich well Gott sien Jesaz hieren,
well Gott däm siene Jebäda uk nich hieren. #Spr 15,8
10Wäa eenen jerajchten veuasoakt schlajcht to läwen,
woat en sien ieejnet Loch nenfaulen,
oba de jerajchte woaren goodet oawen.
11De rikja Maun es en siene ieejne Uagen weis,
oba een oama Maun met Vestentnis, weet bäta.
12Wan de jerajchte de äwahaunt haben, es doa groote Freid,
wan oba de gottloose oppkomen, vestäakjen de Menschen sikj. #Spr 11,11
13Wäa siene Sinden velicht, woat nich Jlekj haben;
wäa dee bekjant un doamet opphieet, woat Metleet finjen. #Psa 32,3-5; 1Joh 1,8-9
14Wäa Forcht fa däm Harn haft, haft eenen Säajen,
wäa oba sien Hoat vehoaden deit, felt em Ojjlekj.
15Een gottloosa Präsident äwa een oamet Volkj,
es soo aus een brellenda Leiw ooda een toobenda Boa.
16Een onvestendja Leida helt de Menschen unja Druck;
wäa sien Volkj nich utnuzt, woat lang läwen.
17Een Maun däm eene Blootschult kjwält, woat bat aun sienem Doot ranen;
lot kjeenem däm unjastetten. #1Mo 4,14
18Wäa een rajchtet Läwen fieet, woat jerat,
oba wäa opp vekjieede Wäaj jeit, woat plazlich faulen.
19Wäa sien Launt beoabeit, woat jenuach to äten haben;
wäa romschlendat, woat sien poat Oamoot haben.
20Een trua Maun woat rikjlich jesäajent woaren;
wäa sikj oba bloos bemieecht rikj to woaren, woat nich onen jestroft bliewen. #Spr 13,11
21Daut es nich goot wäm väatrakjen wäajen wäa hee es,
oba een Maun woat sikj bekjeepen loten bloos om een Stekj Broot to kjrieen. #5Mo 1,17; Spr 18,5
22Een jiezja Maun es bejierich rikj to woaren;
hee denkjt nich doaraun daut am Oamoot äwafaulen woat. #Spr 23,4; 1Tim 6,9
23Wäa Menschen belieet, woat nohäa mea Gonst finjen
aus eena dee met Schmeichelwieed omjeit.
24Wäa sienen Voda ooda Mutta bestälen deit,
un sajcht: Daut es nich orrajcht,
es een Poatna met däm dee enne Grunt brinjt. #Mat 15,5
25Wäa bejierich es, recht Zank aun,
oba wäa sikj opp däm Harn velat, haft jenuach.
26Wäa sikj opp sikj selfst velat, es nich väabedocht,
oba wäa en Weisheit waundelt, woat secha jehoolen. #Spr 3,5-6
27Wäa de oame jeft, däm woat daut aun nuscht fälen;
wäa oba siene Uagen fa de oame toomoakt, woat von väl jeflieekjt.
28Wan de gottloose to Krauft komen, vestäakjen de Menschen sikj;
oba wan de gottloose omkomen, komen de jerajchte väa.
Currently Selected:
Spricha 28: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
