Spricha 26
26
Wäa fa aundre Lajcha groft
1Soo aus de Schnee em Somma un de Räajen em Eifst,
soo es daut uk nich aum Plauz eenen Noa to ieren.
2Soo aus een flauterndet Spoalinkj ooda een flieejendet Schwaulem,
soo sat sikj uk een onvedeenda Fluch nich.
3Eene Wipp fa een Pieet, eenen Toom fa eenen Äsel,
un eenen Stock fa eenen Noa sienen Rigjen! #Spr 19,29
4Auntwuat eenen Noa nich krakjt soo schoslich aus hee rät,
daut du nich krakjt soo best aus hee es.
5Auntwuat eenen Noa doano aus hee schoslich es,
sest kjemt hee sikj selfst weis väa.
6Wäa derch Noarenhaunt eene Norecht schekjt, schoont siene ieejne Feet.
Dee, dee de Norecht kjricht, mach die Schoden aundoonen, wiels am de Norecht oajat,
un dan haft am daut nuscht jeholpen siene Feet schoonen.
7Soo aus eenen lomen Maun de Feet schlaup henjen,
soo es een Sprechwuat en eenen Noa sien Mul.
8Een Noa to ieren haft nuscht mea Senn
aus dän Steen en de Schlenj aunbinjen.
9Soo aus een Stachel en eenen bedrunknen siene Haunt,
soo es een Sprechwuat en eenen Noa sien Mul.
10Soo aus een Boagenscheeta, dee aulem vewunden deit,
es dee, dee eenen Noa, ooda eenen dee toofalich vebie jeit, meeden deit.
11Soo aus een Hunt sien utjespäajnet wada frat,
soo deit een Noa siene Dommheit emma wada. #2Pet 2,22
12Doa es mea Hopninj fa eenen Noa,
aus fa däm dee sikj selfst weis väakjemt. #Spr 3,7
13Een Schladonz sajcht: “Doa es een Leiw opp däm Wajch,
un een rietenda Leiw opp de Gaussen.” #Spr 22,13
14Soo aus eene Däa sikj en de Jehenjen dreit,
soo dreit de Fulpelz sikj em Bad. #Spr 6,9-11
15Een Fulpelz stakjt siene Haunt en de Schiew,
oba es dan too ful dee nom Mul to brinjen. #Spr 19,24
16De Fula es en siene ieejne Uagen weisa
aus säwen Mana dee aunstendich auntwuaten.
17Soo aus eena dee eenen framden Hunt aun de Uaren dreit,
es dee, dee vebie jeit un sikj mank aundre äa Jestried aufjeft.
18Soo aus een Wonsennja met brennende Feilen Menschen doot scheeten deit,
19es een Maun dee sienen Noba hinjat Licht fieet un dan sajcht: “Ekj haud bloos Spos!”
20Wan kjeen Holt opp däm Fia jelajcht woat, jeit daut ut,
un wua kjeen Pludra es, hieet sikj daut Jezank opp. #Spr 22,10
21Soo aus Kolen daut Gloot un Holt een Fia aum gonen hoolen,
soo helt dee, wäa emma zanken well, daut strieden bie. #Spr 15,18
22Een Pludra siene Wieed sent soo aus daut scheenste Äten;
dee gonen eenen Mensch derch dän gaunzen Kjarpa. #Spr 18,8
23Glaute Wieed, dee een beeset Hoat vestäakjen,
sent soo aus een ieednet Jefäs met Selwaschum beschmäat.
24Een Fient vestakjt sikj hinja siene Räd;
em Hoat es hee hinjalestich. #(24 un 25) Mat 12,45
25Wan hee frintlich rät, jleew am nich,
wiels hee haft onbejrieplich väl schudahauftet em Hoat.
26Hee mach sienen Oaja vestäakjen,
oba aulemaun woat daut beese seenen daut hee deit.
27Wäa een Loch groft fa aundre nenn to faulen, woat selfst nenn faulen,
un wäa eenen Steen rolt eenen aundren toom Schoden, opp dän woat dee trigj nopp rollen. #Psa 7,16; Liera 10,8
28Eene Tung dee Läajes rät, veacht däm, däm see wee deit,
un een Schmeichelmul brinjt vedoawen.
Currently Selected:
Spricha 26: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
