Spricha 21
21
Sien wenschen brinjt dän Fulpelz om
1De Har haft dän Kjennich sien Hoat en de Haunt,
un soo aus een Wotastroom lenkjt hee daut krakjt doahan wua hee well. #Psa 33,15
2Een jiedra denkjt sikj daut hee daut rajchte deit,
oba de Har sitt auf daut Hoat rajcht steit.
3Daut rajchte doonen un opprechtich sennen,
well de Har leewa aus een Opfa. #1Sam 15,22; Hos 6,6
4Huachnäsich rom kjikjen un em Hoat stolt sennen,
bie daut schienen de gottloose, un daut es Sind.
5Väasechtich plonen, brinjt eenem Vedeenst,
soo secha aus aufbrutschen, Oamoot brinjt.
6Wäa derch lieejen rikj woat, velist daut boolt,
un dee finjt sienen ieejnen Doot.
7De gottloose brinjen sikj derch äa Jewault eewen selfst en de Grunt,
wiels see nich doonen wullen, waut rajcht es.
8Wäa met Schult beloden es, jeit kromme Wäaj;
de oschuldje oba doonen waut rajcht es.
9Daut es bäta en eenen Winkjel opp däm Bowabän to wonen,
aus met eene zenkjische Fru toop em Hus to sennen.
10De gottloose sent bejierich beeset to doonen;
dee erboarmen sikj äwa kjeenem.
11Wan een Spetta jestroft woat, komen de enkjelde to Vestaunt,
un wan een Weisa unjarecht woat, woat dee noch vestendja. #Spr 19,25
12De jerajchta weet waut en dän gottloosen sien Hus väajeit,
un brinjt däm gottloosen en de Grunt.
13Wäa de Uaren toostopt wan de oame schrieen,
woat uk nich jehieet woaren, wan hee schricht.
14Eene Gow em Jeheemen beruicht dän Oaja,
un eene vestoakne Gow en de Bennafupp kaun groote Wutt stellen. #1Sam 25,18-35
15Een jerajchtet Uadeel freit däm dee nich schuldich es;
oba fa dee, dee orrajcht doonen, es daut een Schrakj.
16Wäa daut vestonen lieren dän Rigjen dreit,
woat sikj en de Jemeenschoft met de Doodje finjen.
17Wäa daut Vejnieejen jieren haft un bloos doafäa läft, woat oam;
wäa siene Lost aun Wien un een jemieteljet Läwen haft, woat nienich rikj woaren. #Spr 23,21
18De gottloose kjrieen selfst daut lieden,
waut see de jerajchte proowen tootostieren.
19Daut es bäta en de Wiltnis to läwen,
aus met eene striedarische, dolle Fru toop wonen.
20En eenen Weisen sien Hus es väl scheenet Äten un Eelj,
oba een Noa vebrinjt aules waut hee haft.
21Wäa no jerajcht sennen un truhoatje Leew sträft,
finjt Läwen, Jerajchtichkjeit un Iea.
22Een weisa Maun kaun de jewaultje äare Staut aunjriepen,
un äwa äare Macht, opp dee see sikj veloten, jewennen.
23Wäa sien Mul un siene Tung fa sikj helt,
bewoat sikj doaderch fa Trubbel. #Spr 13,3
24De stolta, prauzja Maun, hee kunn een Spetta jenant woaren,
es eena dee soogoa em Oaja äwa aule Moten Stolt bewiest.
25De Fula wenscht bat hee doot es,
wiels siene Henj nich oabeiden wellen. #Spr 13,4
26Hee wenscht sikj dän dachäwa waut hee haben mucht,
oba de jerajchta jeft, onen to spoaren, von daut waut hee haft.
27Däm gottloosen sien Opfa es fa däm Harn jäajenaun,
un wooväl mea noch wan daut met eene beese Aufsecht jebrocht woat! #Spr 15,8
28Een Zeij, dee Läajes rät, woat sikj selfst fausträden,
dee, wäa goot jehorcht haft, doaf uträden. #Spr 19,5.9
29Een gottloosa Mensch stalt sikj stieekoppich han,
oba een jerajchta Maun bedenkjt sienen Wajch.
30Doa es kjeene Weisheit, kjeene Ensecht un kjeen Rot,
dee jäajen dän Harn stonen kaun. #Psa 33,10-11
31Du kaust de Pieed reedmoaken toom Kjrich,
oba auf du jewennen woascht, daut henjt vom Harn auf. #Psa 33,17
Currently Selected:
Spricha 21: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
