Spricha 20
20
Gott vedrajcht nich twee Sorten Jewichta
1Aun Wien bedrinkjen, es nich weis;
een Drinkja moakt sikj toom Spetta un recht Schläajarie aun. #Spr 23,29-35; 31,5; Hos 4,11
2Een Kjennich siene Wutt es soo aus wan een Leiw brelt;
wäa däm doll moakt, sat sien Läwen opp Spell. #Spr 16,14
3Fa eenen Maun es daut eene Iea, sikj nich met Striedarie auftojäwen,
irjent een Noa fangt leicht aun to strieden.
4Een Fula dee sien Launt nich to de rajchte Tiet beoabeit,
woat em Eifst no eene Arnt sieekjen un kjeene haben. #Spr 6,6-11
5Jedanken en eenen Maun sien Hoat sent soo aus en deepet Wota,
oba een vestendja Maun woat dee rut trakjen.
6Väl Menschen jäwen väa, daut see truhoatich un gootmeenent sent,
oba wäa kaun eenen frommen Mensch finjen, opp dän to veloten es?
7Een jerajchta Maun fieet een frommet Läwen;
däm siene Kjinja woat daut nohäa goot gonen. #Psa 112,1-2
8Wan een Kjennich opp dän Rechtastool sett,
kaun hee met däm äwakjikjen aulet beese rut läsen. #Psa 101,3
9Kaun irjentwäa sajen: “Mien Hoat es rein,
un ekj hab met de Sind nuscht mea to doonen?” #Hiob 4,17; 9,2-3; Spr 30,12
10De Har kaun beides nich vedroagen:
faulschet Jewicht un faulsche Mot.
11Soogoa een Kjint wiest met daut, waut hee deit,
auf hee goot un opprechtich es. #Spr 22,6
12Daut Ua daut doa hieet, un daut Uag daut doa sitt,
haft de Har beid jemoakt.
13Wäa jieren väl schlapt, woat oam woaren;
hool diene Uagen op, dan woascht du jenuach Broot haben.
14“Daut es nuscht wieet! Daut es nuscht wieet!” sajcht de Koopmaun,
oba wan hee daut ieescht haft, pucht hee doamet.
15Wan du weetst von waut du räden deist,
hast du waut, daut mea wieet es aus Golt un diere Steena.
16Wan wäa onbedocht jenuach es un fa eenen framden jebircht haft,
dan nemm sien Rock aus een Vespräakjen siene Schult to betolen, uk fa eenen von een aundret Volkj! #Spr 6,1-2
17Daut jestolne Broot schmakjt dän Maun goot,
oba nohäa es am daut soo ommaklich aus wan hee daut Mul voll Saunt haft. #Spr 9,17
18Wan wäa plonen deit, mott dee gooden Rot sieekjen;
wäa Kjrich fieren mott, dee sull Rot aunnämen. #Spr 24,6
19Een Pludra kaun nich een Jeheemnis hoolen,
doawäajen vekjia nich met dee waut too väl räden.
20Wäa sienen Voda ooda siene Mutta flieekjt,
däm woat medden em diestren daut Licht utgonen. #2Mo 21,17; Spr 30,17
21Wäa sien Goot leicht kjricht,
däm woat daut tolatst weinich halpen.
22Saj nich: “Ekj woa die fa daut orrajchte trigjtolen.”
Velot die opp Gott, dee woat die toom rajcht vehalpen. #Spr 24,29; Reema 12,17
23Faulschet Jewicht un faulsche Mot sent däm Harn jäajenaun.
24De Har haft eenem sien Wajch bestemt;
woo kaun een Mensch dan sien ieejnen Wajch vestonen?
25Daut es fa eenen Mensch eene Schlenj,
wan hee haustich waut stampelt aus: Fa däm Harn,
un dan ieescht mau nohäa sien Vespräakjen bedenkjt.
26Een weisa Kjennich säft de gottloose rut,
un lat daut Draschraut äwa dee omhäa gonen.
27Däm Harn siene Laump unjasieekjt eenen Mensch sienen Jeist;
dee unjasieekjt aules bat unjen em Hoat. #1Kor 2,11
28Truhoatje Leew un Woarheit hoolen eenen Kjennich secha;
derch truhoatje Leew, woat sien Troon secha jestalt. #Spr 16,12
29De junge Mana freien sikj to äare Krauft,
un greiwet Hoa es eene Pracht fa de oole. #Spr 16,31
30Eena mott daut beese met hoade Strof rutdriewen,
un met iernste Schläaj, dee to feelen sent.
Currently Selected:
Spricha 20: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
