Spricha 17
17
Froo sennen es goot fa de Jesuntheit
1Daut es bäta em Fräd drieejet Broot äten,
aus een jeschlachtet met Striet un Zank. #Spr 15,17
2Een weisa Kjnajcht woat äwa eenen Sän jebeeden dee sikj toschaund moakt,
un woat mank de Breeda een Oafgoot kjrieen.
3Golt un Selwa woaren derch daut Fia jeschekjt toom seenen woo rein daut es,
un soo unjasieekjt de Har daut Menschenhoat. #Psa 66,10
4Een gottloosa horcht no vekjieede Räden;
een Lieeja horcht jieren no niedatrajchtje Wieed.
5Wäa äwa eenen oamen spott, veacht dän dee am jemoakt haft,
un wäa sikj äwa eenen aundren sien Ojjlekj freit, woat nich onbestroft bliewen. #Spr 14,31
6De oole äare Kroonen sent äare Grootkjinja,
un de Kjinja äare Iea es äare Elren.
7Huach jeachte Räd steit eenen Noa nich aun,
un wooväl weinja daut een Leida Läajes rät.
8Bekjeepen wirkjt soo aus Hakjsarie;
doamet jeit irjentwaut uttorechten.
9Wäa eene Veschuldjunk vejeft, sträft no Leew;
wäa daut oba emma wada opprieet, drift goode Frind uteneen.
10Eenen vestendjen schellen halpt mea aus hundat Schläaj opp eenen Noa.
11Een schlajchta Mensch es bloos doaropp ut wadaspanstich to sennen,
doawäajen woat am een grollenda jeschekjta bejäajnen.
12Daut es bäta eene Boarenkoo, dee de junge wajchjenomen sent, to bejäajnen,
aus eenen Schosel en siene Dommheit.
13Wäa goodet met beeset trigjtolt,
woat daut beese niemols utem Hus looswoaren.
14Zank aunfangen es soo aus aum Wota dän Daum derchgrowen,
doawäajen moakt Fräd ea doa Zank utbrakjt.
15Wäa dän gottloosen rajchtfoadicht un dän jerajchten vedaumt,
dee kaun de Har beid nich vedroagen. #Jes 5,23
16Waut halpt eenen Noa waut Jelt toom Weisheit kjeepen,
wan hee kjeen velangen doano haft.
17Een Frint woat emma Leew bewiesen,
un een Brooda es jebuaren toom em Trubbel biestonen. #Spr 18,24
18Bloos een Maun, dee nich weet waut to eene Sach jehieet,
wudd eenen aundrem de Haunt jäwen un vespräakjen siene Schult to betolen. #Spr 6,1-5
19Wäm daut Zanken scheen jeit, sindicht jieren.
Wäa siene Puaten huach but, lot doamet de Vebräakja en.
20Een Maun, met een vekjieedet Hoat, kjemt nich verwoats,
un wäa eene vekjieede Tung haft, felt em Ojjlekj.
21Wäa eenen Noa toom Kjint haft, haft Trua;
un eenen Noa sien Voda haft kjeene Freid.
22Een frooet Hoat deit krakjt soo väl goot aus Medizien,
oba eenen bedrekjten vedrieejen de Knoakes. #Spr 15,13.15
23Een gottloosa nemt jieren heemlich Jeschenkja,
om dän jerajchten Wajch to vedreien. #2Mo 23,8
24Wäa vestendich es, sträft no Weisheit,
oba eenen Noa siene Uagen waundren äwa de gaunze Welt, un hee haft kjeen Ziel. #Spr 4,25
25Een schoselja Sän moakt sienen Voda truarich,
un moakt daut betta fa ar, dee am jebuaren haft.
26Daut es nich goot wan eena, dee nich orrajcht jedonen haft, mott Strof betolen,
un daut es nich rajcht, wan eena dee huach aunjeseenen es, vepriejelt woat.
27Wäa weis es, es spoasom met siene Wieed,
un wäa vestendich es, haft eenen rujen Jeist. #Spr 10,19; Jak 1,19
28Soogoa een Noa woat aus weis aunjeseenen, wan hee lieet stell to sennen;
wan hee sien Mul toohelt, woat hee aus vestendich aunjeseenen. #Hiob 13,5
Currently Selected:
Spricha 17: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
