Spricha 18
18
De Tung haft Macht äwa Läwen un Doot
1Wäa sikj von aundre aufsondat, intressieet sikj bloos fa sikj selfst;
dee sent emma jäajen daut, waut aulemaun weet, daut et rajcht es.
2Een Noa haft kjeene Freid aun waut vestonen lieren;
dee haft bloos Lost to wiesen, waut hee weet.
3Sind un Schaund gonen toop;
velia diene Iea un du woascht en dee Städ veacht woaren.
4Wieed en eenen Maun sien Mul sent soo aus deepet Wota,
un eene Weisheitskjwal es soo aus een volla Stroom.
5Daut es nich rajcht opp eenen gottloosen siene Sied to sennen,
un däm jerajchten sien rajcht auftosajen. #5Mo 1,17
6Een Noa siene Räden rechten Zank aun,
un siene Wieed vedeenen priejel.
7Een Noa siene Räden brinjen am en de Grunt,
un siene Leppen schlenjen siene ieejne Seel.
8Een Pludasak siene Wieed sent aus scheenet Äten;
dee äten eenen Mensch gaunz opp. #Spr 26,22
9Wäa too ful es toom oabeiden,
es de Brooda to däm dee en de Grunt brinjt. #Spr 10,4
10Däm Harn sien Nomen es een stoakja Torm;
de jerajchte ranen doahan un sent secha. #Psa 61,4; Spr 14,26
11Fa dän rikjen Maun es sien Goot aus siene sechre Staut;
hee denkjt sikj, daut es ommäajlich äwa de Waunt to komen, am fausttonämen. #Spr 10,15
12Ea een Maun felt, woat hee em Hoat stolt,
un ea hee to Ieren kjemt, mott hee läach to stonen komen. #Spr 16,18
13Wäa doa auntwuat ea hee horcht,
dee moakt sikj aus een Noa toschaund.
14Een Maun sien Jeist helt am opprajcht em lieden,
oba wäa kaun met eenen bedrekjten läwen?
15Een kluaka Maun saumelt Weisheit,
un däm Weisen siene Uaren sieekjen doano.
16Een Maun dee een Jeschenkj jeft, moakt Rum fa sikj;
daut brinjt am ver de groote to stonen. #1Mo 43,11
17Daut sitt emma soo aus wan de ieeschta, dee siene Sach väastalt, rajcht es,
bat een aundra kjemt un Froagen stalt.
18Daut Loss trakjen stelt dän Striet,
un helt stoakje Jäajna uteneen.
19Een vezoajda Brooda es schwanda to jewennen aus eene vesechade Staut,
un Zank helt dee uteneen aus een met Stangen veräajeldet Paulaust Puat.
20Een Maun woat voll von daut waut hee sajcht,
un mott läwen met waut siene Leppen jerät haben. #Spr 12,14
21De Tung haft de Jewault äwa Doot un Läwen,
un wäa jieren rät, woat met äare Frucht läwen. #Spr 13,3
22Wäa eene Fru finjt, finjt waut goodet,
un es vom Harn jesäajent. #Spr 19,14; 31,10
23Een oama prachat om Jnod,
oba de rikja jeft eene ruche Auntwuat.
24Eenje Frind halpen nuscht,
oba doa es een Frint dee fausta biesteit aus een Brooda. #Spr 17,17
Currently Selected:
Spricha 18: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
