Spricha 16
16
Menschen moaken Plons
1Menschen kjennen eene Sach plonen,
oba de Har haft daut latste bestemmende Wuat to sajen.
2Een jiedra denkjt siene Wäaj sent rein,
oba de Har unjasieekjt waut däm Mensch doatoo drift.
3Äwajeff daut däm Harn, waut du aun Haunt hast,
un die woat daut met diene Plons jlekjen. #Psa 37,5
4De Har haft aules no sienem gootdenkjen jedonen,
soogoa eenen Jerechtsdach fa de gottloose bestemt. #Reema 9,22
5De Har kaun de stolte nich vedroagen,
gaunz secha woaren dee nich onen jestroft wajchkomen.
6Derch truhoatje Leew un opprechtich sennen, kjemt Sindenvejäwunk;
derch Forcht fa däm Harn, blift eena wajch vom beesen.
7Wan däm Harn eenen Maun siene Wäaj jefaulen,
moakt hee soogoa siene Fiend met am en Fräd läwen. #1Mo 31,24; 33,4
8Jerajcht sennen un weinich haben,
es bäta aus väl ojjerajchte Ennom haben. #Spr 15,16
9Een Mensch plont sienen Wajch,
oba de Har bestemt wua hee jeit. #Spr 19,21; Jer 10,23
10De Kjennich haft Wieed opp de Leppen dee bejeistat sent,
un sien Mul rät de Woarheit un em Jerecht rät hee nich faulsch.
11De Har velangt daut eene rajchte Schol un een rajchtet Jewicht saul jebrukt woaren,
Gott haft dee aunjeordent, un jieda Jewicht mott opprechtich sennen. #Spr 11,1
12Kjennichs es orrajcht doonen jäajenaun;
een Troon woat opp jerajcht sennen faustjestalt. #Spr 20,28; 25,5; 29,14
13Jerajchte Wieed sent fa eenen Kjennich eene Freid,
un wäa opprechtich rät, däm jleichen de Menschen.
14Een Kjennich sien Oaja es soo aus eene Doodesnorecht,
un een weisa Maun woat dän Kjennich berujen. #(14 un 15) Spr 19,12; 20,2
15Däm Kjennich sien frinteljet Jesecht bediet Läwen,
wan am waut jefelt, es daut soo aus een Hoafsträajen.
16Weisheit kjrieen, es mea wieet aus Golt,
un Vestaunt haben, es mea wieet aus Selwa.
17De jerajchte äa Wajch jeit daut beese utem Stich,
un wäa sienen Wajch bewoat, dee helt sien Läwen.
18Wäa stolt es, jeit en de Grunt,
un huachnäsich sennen kjemt ver däm faulen. #Spr 18,12
19Daut es bäta deemootich un met de oame toop stonen,
aus met stolte toop, jestolne Sachen endeelen.
20Wäa de goode Lia helt, däm woat daut goot gonen,
un wäa sikj opp däm Harn velat, woat sikj freien.
21Wäa em Hoat weis es, woat een vestendja Maun jenant;
je leeftolja daut räden es, je leichta es daut lieren.
22Wäa väl vesteit, haft eenen Läwensborm,
oba eenem Noa siene Strof es siene ieejne Dommheit.
23Een weisa Maun sien Hoat belieet sien Mul,
soo daut et leichta to lieren es waut hee sajcht.
24Frintelje Wieed sent honnichseet,
dee treesten de Seel un freschen dän Kjarpa opp. #Spr 12,25
25Väle jefelt sienen Wajch,
oba tolatst brinjt am dee dän Doot.
26Eenen Oabeida sien Hunga moakt am schwanda oabeiden,
sien Hunga drift am nom Ziel.
27Een Hollunk plont beeset,
un siene Räden sent aus een brennendet Fia.
28Een vekjieeda Mensch recht Striet aun,
un een Pludasak ritt goode Frind uteneen.
29Een Vebräakja lokt sienen näakjsten,
un leit am wajch von waut goot es;
30dee plinkjt met de Uagen un plont vekjieedet,
dee spezt siene Leppen un nemt sikj schlajchtet väa.
31Greiwe Hoa sent eene Ierenkroon,
dee derch jerajcht sennen jefungen woat. #Spr 20,29
32Een jeduldja Maun es bäta aus een Kjrieja,
un eena dee sikj selfst beharschen kaun, aus eena dee eene Staut ennemt. #Spr 14,29
33De Lessa woaren jetrocken,
oba dee woaren vom Harn bestemt.
Currently Selected:
Spricha 16: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
