Spricha 15
15
Een frinteljet Jesecht es eene Freid
1Eene jelinde Auntwuat stelt dän Oaja,
oba een hoadet Wuat reizt toom Oaja. #1Kjen 12,13-16; Spr 25,15
2De Weise äare Tung moakt de Lia auntrakjent;
de Noaren äa Mul oba spicht Dommheit.
3Däm Harn siene Uagen seenen aules,
un woaken äwa de goode uk de schlajchte. #2Chr 16,9
4Eene nate Räd jeft een scheenet Läwen,
oba met Läajes kjemt een jebroaknet Hoat.
5Een Noa spott doaräwa, wan sien Voda am stroft;
wäa sikj belieren lat, woat kluak woaren.
6Een jerajchta haft eene volle Schauzkoma em Hus,
oba dän gottloosen siene Ennom brinjt am Trubbel.
7Weisheit woat derch weise Menschen vespreet,
däm Schosel sien Vestaunt deit soont nich.
8De ojjerajchte äare Opfa sent däm Harn jäajenaun,
oba de fromme äare Jebäda jefaulen am. #Spr 21,27; 28,9; Jes 1,11.15; Luk 18,9-14
9De gottloose äa Wajch es däm Harn jäajenaun,
am jefaulen dee, dee jerajcht sent.
10Wäa dän Wajch velat, woat strenj belieet woaren;
wäa de Belierunk veacht, woat stoawen.
11Gott weet waut em Doodenrikj väajeit;
wooväl mea kjant hee dan daut Menschenhoat. #Hiob 26,6; Psa 139,8; Jer 17,10; Opb 9,1.11
12Een Spetta well von belieren nuscht weeten,
hee woat de Weise nich no Rot froagen.
13Een frooet Hoat moakt een frinteljet Jesecht,
oba wan daut Hoat truarich es, fält uk de Moot.
14Wäa kluak es, sieekjt Weisheit,
oba een Schosel es tofräd met Dommheiten.
15De bedrekjte es daut Läwen emma schwoa,
oba een vejnieejdet Hoat freit sikj jieda Dach. #Spr 17,22
16Daut es bäta wan eena weinich haft un gottesferchtich es,
aus wan eena väl haft un ontofräd es. #Psa 37,16; Spr 16,8
17Kjriedariesupp äten, met soone dee du goot best,
es bäta aus jemastet Ossenfleesch, met Menschen, dee sikj nich vedroagen kjennen. #Spr 17,1
18Een hetskopja Maun recht Striet aun,
oba een jeduldja Maun stelt dän Zank.
19Een Fulpelz sien Stich es met Stachelstruck toojewossen,
oba dän Opprechtjen sien Stich es een Huachwajch. #Spr 24,30-31
20Een Weisa Sän moakt sienen Voda froo,
oba een Schosel veacht siene Mutta. #Spr 10,1
21Een Noa freit sikj toom Noarenkrom,
oba een Maun dee sien Vestaunt brukt, blift opp däm jeroden Wajch.
22Plons vefaulen wua nich Rotjäwa sent,
oba derch väl Rotjäwa kjennen Plons toom gooden deenen. #Spr 11,14
23Een Maun freit sikj eene paussende Auntwuat to jäwen,
un woo goot es doch een paussendet Wuat!
24Fa de Weise jeit de Läwenswajch en de Hecht,
soo daut hee sikj von dän aufschosjen Wajch nom Grauf helt.
25De Har brakjt dän stolten Maun sien Hus dol,
oba de Wätfrues äare Jrens Tieekjen helt hee en Ordnunk.
26De gottloose äare Jedanken sent däm Harn jäajenaun,
oba reine Jedanken jefaulen am.
27Wäa bejierich es, brinjt Trubbel en siene Famielje nenn;
wäa sikj nich bekjeepen lat, woat läwen. #Psa 15,5
28De jerajchta wajcht siene Auntwuaten,
oba ut daut ojjerajchte Mul poascht beeset.
29De Har blift wiet auf von de ojjerajchte,
oba hee hieet de jerajchte äare Jebäda. #Spr 15,8; Joh 9,31
30Daut Hoat freit sikj to een frinteljet Jesecht,
un eene goode Norecht moaken de Been stoakja.
31Wäa doaropp acht wan hee vemont woat,
woat sikj manke Weise tus feelen.
32Wäa sikj nich belieren lat, moakt sikj selfst Schoden;
wäa sikj oba vemonen lat, nemt too aun Vestentnis.
33Wäa Forcht fa däm Harn haft, lieet weis sennen;
ieescht kjemt de Deemoot, dan de Iea. #Spr 18,12; 22,4
Currently Selected:
Spricha 15: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
