Spricha 14
14
Met jerajcht sennen woat een Volkj groot
1Eene weise Fru but äa Hus;
eene schoselje oba brakjt äa Hus met äare ieejne Henj dol.
2Wäa opprechtich waundelt, fercht däm Harn;
wäa oba vekjieet en siene Wäaj es, veacht däm Harn.
3Stolt räden spreet, soo aus een Auflaja, ut eenen Noa sien Mul,
de Weise äare weise Wieed bewoaren an fa Trubbel.
4Wua kjeene Ossen sent, es de Kjrebb rein,
oba wua Ossen schaufen, es väl Ennom.
5Een trua Zeij rät nich Läajes,
oba een faulscha Zeij es een jeeewda Lieeja. #2Mo 20,16; 23,1
6De Spetta sieekjt no Weisheit, un finjt dee nich,
oba wäa sien Vestaunt brukt, däm kjemt de Erkjantnis leicht.
7Bliew von eenen Schosel wajch,
wiels du lieescht nuscht goodet von am.
8De kluake en äare Weisheit achten opp äare Wäaj,
oba de Schosels äare Dommheit veleit.
9Noaren haben äaren Spott met de Sind,
oba de Opprechtje haben eene Freid aun eenaunda.
10Bloos du weetst woo schwoa die waut es;
kjeena weet krakjt woo scheen die waut jeit. #Reema 12,15
11Däm gottloosen sien Hus woat en de Grunt jebrocht,
oba däm Opprechtjen sien Zelt woat jrata. #Spr 12,7
12Väle jefelt sienen Wajch sea,
oba aum Enj fieet am dee toom Doot.
13Soogoa biem lachen kaun daut Hoat wee doonen,
wan de Freid äwa es, es de Trua doch doa.
14De vekjieede kjrieen waut see vedeent haben,
de fromme kjrieen äaren Loon fa äare Woakjen.
15Een Noa jleeft irjentwaut,
oba een vestendja Maun bedenkjt sikj siene Wäaj.
16De Weise ferchten sikj beeset to doonen, un heeden sikj doajäajen,
oba de Noaren gonen trotzich wieda.
17Wäa schwind doll woat, moakt sikj toom Noa;
een Maun dee schlajchtet plont, woat veacht.
18Een Schosel schauft sikj Dommheit aun,
oba Weisheit es däm kluaken siene Kroon.
19De beese motten sikj ver de goode bekjen,
un soo uk de gottloose en de jerajchte äare Puaten.
20De oama woat soogoa von siene Nobasch vestat,
oba de rikje haben väl Frind. #Spr 19,4.7
21Dienen Noba veachten es Sind;
jesäajent es wäa sikj äwa dän oamen erboarmt. #Psa 41,2
22Wäa schlajchtet plont, woat sikj vestaupen;
oba dee waut plonen goodet to doonen, finjen truhoatje Leew.
23Aule schwoare Oabeit brinjt vedeenst,
oba ladje Wieed loten eenem oam.
24De Weise äa Rikjtum es äare Kroon;
Noaren sent aun äare Dommheit to kjanen.
25Een trua Zeij rat aundre daut Läwen,
oba een faulscha Zeij brinjt aundre schoden.
26Wäa däm Harn fercht, kaun sikj opp am veloten;
daut woat fa siene Kjinja uk een Schutz sennen. #Spr 18,10
27Däm Harn ferchten es eene Läwenskjwal,
un bewoat eenen Maun fa de Doodesschlenj.
28Een Kjennich dee väl Volkj haft, es goot aunjeseenen;
wan hee weinich Volkj haft, es daut nuscht met am.
29Wäa nich schwind doll woat, es weis,
oba wäa hetskoppich es, bewiest doamet woo schoslich hee es. #Spr 16,32; 19,11
30Een frädeljet Hoat jeft dän Kjarpa Läwen,
oba Aufgonst moakt de Knoakes fulen.
31Wäa de oame unjadrekjt, spott däm dee an jeschaufen haft;
wäa leicht jeft wan wäm Help fält, däm ieet Gott. #Hiob 31,13-15; Spr 17,5; Mat 25,40
32Wan Ojjlekj kjemt, kjennen de gottloose nich bestonen,
oba de jerajchte haben uk em Doot eene sechre Hopninj.
33De vestendje haben Weisheit em Hoat,
oba Noaren kjanen nuscht von Weisheit.
34Met jerajcht sennen kjricht een Volkj Iea,
oba derch Sind woat irjent een Volkj toschaund.
35Däm Kjennich jefelt eenen weisen Kjnajcht,
sien Oaja kjemt äwa däm dee am Schaund moakt. #1Mo 41,37-40
Currently Selected:
Spricha 14: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
