Matäus 24
24
Jesus sajcht, de Tempel woat doljebroaken woaren
(Mrk 13,1-2; Luk 21,5-6)
1Jesus veleet dän Tempel un jinkj wajch, un siene Jinja kjeemen no am un muaken am oppmoakjsom opp de Tempeljebieda. 2Hee oba säd to an: Jie seenen dit aula, nich soo? Ekj saj junt de Woarheit: Hia woat nich een Steen opp däm aundren jeloten woaren, dee nich woat omjeschmäten woaren. #Luk 19,44
De Aunfank vom Enj
(Mrk 13,3-13; Luk 21,7-19)
3Aus hee opp däm Oliewen Boajch saut, kjeemen de Jinja auleen no am un säden: Saj ons wanea dit passieren woat, un aun waut fa een Tieekjen wie seenen kjennen, daut du kjemst, un daut dise Tiet aufschluten woat. #Apost 1,6-8 4Un Jesus säd to an: Paust opp, daut junt kjeena veleiden deit, 5wiels doa woaren väle en mienen Nomen komen un sajen: Ekj sie Christus, un dee woaren väle veleiden. #Joh 5,43; 1Joh 2,18 6Un jie woaren von Kjrich un Kjrichsjeschrech hieren; oba doawäajen siet nich too oppjeräacht. Wiels dit mott aula passieren; oba daut Enj es noch nich doa. 7Wiels een Volkj woat jäajen daut aundre oppstonen, un een Kjennichrikj jäajen daut aundre. Un doa woaren opp veschiedne Städen Pestilenz, Hungaschnoot un Ieedbäben sennen. 8Dit es aula noch mau de Aunfank von de lieden.
De Vefoljunk von de Jinja
(Mrk 13,9-13; Luk 21,12-19)
9Un dan woaren see junt en daut Älent steeten un junt doot moaken. Un wiels jie junt to mienen Nomen bekjanen, woaren junt aule Velkja nich lieden kjennen. #(9-10) Mat 10,21-22; Joh 16,2 10Un dan woaren sikj väle oajren, un sikj unjarenaunda veroden un sikj unjarenaunda nich lieden kjennen. 11Un doa woaren väl faulsche Profeeten oppstonen, un väle veleiden. #2Pet 2,1; 1Joh 4,1 12Un wiels de Gottloosichkjeit woat äwahaunt nämen, woat de Leew bie väle Menschen kolt woaren. #2Tim 3,1-5 13Oba wäa bat aum Enj uthelt, woat jerat woaren. #Mat 10,22; Opb 13,10 14Un daut Evangelium von Gott sien Rikj woat en de gaunze Welt jeprädicht woaren, soo daut aule Velkja daut hieren, un dan woat daut Enj komen. #Mat 28,19
Daut latste schrakjelje Älent
(Mrk 13,14-23; Luk 21,20-24; 17,23-24.37)
15Wan jie em Heilichtum daut oppscheiselje seenen woaren, wuavon de Profeet Daniel rät, (wäa dit last, saul daut proowen to vestonen), 16dan sellen dee, dee en Judäa sent, en de Boaj nenn flichten. 17Un wäa opp däm Dak es, saul nich noch ieescht gonen siene Sachen utem Hus holen; #(17 un 18) Luk 17,31 18un wäa opp de Stap es, saul nich noch ieescht trigjgonen sienen Äwarock holen. 19Oppoat schlemm woat daut dan fa de Frues sennen, dee schwanga sent, ooda een Kjint aun de Brost haben! #Luk 23,29 20Bät doarom, daut june Flucht nich em Winta ooda aum Sabat sennen woat. 21Wiels dan woat een Älent sennen, soo schrakjlich aus daut noch niemols en de Welt jewast es, un uk niemols mea sennen woat. #Dan 12,1 22Un wan dee Doag nich wieren vekjart worden, wudd kjeen Mensch jebläwen sennen, oba om de utjewälde äat haulwen woaren de Doag vekjart woaren.
23Wan dan irjentwäa sajen woat: Kjikjt, hia es Christus! ooda: Doa es hee! dan jleeft daut nich. 24Wiels doa woaren faulsche Christussen un faulsche Profeeten oppstonen un groote Tieekjens un Wunda doonen, soo daut see, wan mäajlich, soogoa de utjewälde veleiden. #5Mo 13,2-4; 2Tess 2,8-9; Opb 13,13 25Kjikjt, ekj hab junt daut em verut jesajcht. 26Un wan see nu to junt sajen: Kjikjt, hee es en de Wiltnis! got doa nich han; un wan see sajen: Kjikjt hee es bennen en de Koma! jleeft daut uk nich. #(26 un 27) Luk 17,23-24 27Wiels soo aus de Blitz vom Oosten kjemt un bat däm Wasten schient, soo woat daut doamet sennen, wan de Menschensän kjemt. 28Wua een doodja Kjarpa licht, saumlen sikj de Odla toop. #Luk 17,37; Opb 19,17-18
De Weltrechta woat komen
(Mrk 13,24-27; Luk 21,25-28)
29Fuaz wan dee Doag met daut Älent derch sent, woat de Sonn vedunklen un de Mon woat uk nich schienen, un de Stierns woaren vom Himmel faulen, un de Himmelskjraften woaren oppjescheddat woaren. #Jes 13,10; 2Pet 3,10; Opb 6,12-13 30Un dan woat dän Menschensän sien Tieekjen aum Himmel to seenen sennen. Dan woaren aule Velkja oppe Ieed jaumarieren, un see woaren dän Menschensän opp de Himmelswolkjen met Krauft un Harlichkjeit komen seenen. #Dan 7,13-14; Mat 26,64; Opb 1,7; 19,11-13 31Un hee woat siene Enjel schekjen, lud met de Trompeeten to blosen, un dee woaren siene utjewälde ut aule vea Wintrechtungen saumlen, von een Enj Himmel bat däm aundren. #1Kor 15,52; Opb 8,2
De Lia aum Fiejenboom
(Mrk 13,28-31; Luk 21,29-33)
32Dan lieet dit vom Fiejenboom: sooboolt aus siene Asta sauftich woaren un Bläda kjrieen, weet jie daut de Somma dicht bie es. 33Jrod soo uk wan jie dit aules seenen, weet jie daut hee dicht ver de Däa es. 34Ekj saj junt de Woarheit: Dise Jennerazion woat bliewen, bat dit aula passieet es. 35Himmel un Ieed woaren vegonen, oba miene Wieed woaren nich vegonen. #Jes 51,6; Mat 5,18
Woonen Dach ooda Stund weet kjeena
(Mrk 13,32-37; Luk 17,26-27.30.34-35; 12,39-40)
36Oba wanea dee Dach ooda dee Stund sennen woat, weet kjeena, nich emol de Enjel em Himmel, uk nich de Sän. #24,36 Eenje oole Schreften sajen nich uk nich de Sän. Daut weet bloos de Voda. #Apost 1,7 37Soo aus daut to Noah siene Tiet wia, woat daut uk sennen wan de Menschensän komen woat. #(37 un 38) Luk 17,26-27; 1Mo 6,9—7,23 38Soo aus daut dan wia ea daut groote Wota kjeem – see eeten un drunken, see frieden un befrieden sikj, bat aun dän Dach, aus Noah en daut Schepp nenn jinkj 39un see daut nich wisten, bat daut Wota kjeem un an aula metreet, – soo woat daut uk sennen, wan de Menschensän komen woat. 40Dan woaren twee Mana opp de Stap sennen, eena woat aunjenomen woaren un eena woat trigjbliewen. 41Twee Frues woaren met de Hauntmäl molen; eene woat aunjenomen woaren un eene woat trigjbliewen. #Luk 17,35
42Woakt; wiels jie weeten nich woon Dach jun Har komen woat. #Mat 25,13 43Dit oba sell jie weeten: Wan de Huswieet jewist haud, to woone Stund en de Nacht de Stäla komen wudd, dan wudd dee jewoakt haben un nich loten en sien Hus enbräakjen. #1Tess 5,2 44Doawäajen mott jie uk reed sennen! Wiels de Menschensän kjemt to eene Stund, wan jie nich doamet räakjnen.
Wäa es de true ooda ontrue Kjnajcht
(Luk 12,42-46)
45Wäa es de trua, weisa Kjnajcht, dän sien Har äwa sien Hushault jesat haft, an to rajchte Tiet äten to jäwen? 46Goot fa dän Kjnajcht, wan de Har, wan hee kjemt, daut finjt, daut hee soo deit. 47Jleeft waut ekj saj: Dän woat hee äwa aul sien Vemieejen saten. #Mat 25,21.23 48Oba wan daut een beesa Kjnajcht es, dee to sikj selfst sajcht: Mien Har kjemt noch lang nich, #2Pet 3,4 49un aunfangt mank siene Metkjnajchten romtoschlonen un met aundre Ludajons toop to fräten un to supen, 50dan woat dän Kjnajcht sien Har aun een Dach komen, aun dän hee nich doamet räakjent, to eene Stund, en dee hee nich doaraun denkjt. 51Dee woat dan siene Strof kjrieen #24,51 Eenje oole Schreften sajen vehakt woaren. un met de Heichla toop doa sennen motten, wua see jaumarieren un met de Tänen kjnirschen woaren.
Currently Selected:
Matäus 24: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.