Matäus 23

De Unjascheet tweschen Lia un Väabilt

(Mrk 12,38-39; Luk 20,45-46; 11,43)

1Dan säd Jesus to daut Volkj un to siene Jinja: 2De Schreftjelieede un Farisäa setten opp Moses sien Stool. 3Horcht no an, un doot waut see junt sajen, oba recht junt nich, no daut waut see doonen, wiels dee doonen selfst nich waut see lieren. #Mal 2,7-8; Reema 2,21-23 4See binjen aundre Menschen schwoare Lausten opp de Schulren, dee schia nich to droagen sent. #23,4 Eenje oole Schreften sajen nich dee schia nich to droagen sent. Oba see selfst woaren nich een Finja rieren, dee droagen to halpen. #Mat 11,28-30; Apost 15,10.28 5See doonen aul äare Woakjen met dee Aufsecht, von de Menschen jeseenen to sennen. See moaken sikj äare Stiernreemes breet un de Tollen aun de Kjleeda lank. #4Mo 15,38-39; Mat 6,1 6Bie eene Moltiet mäajen see jieren bowenaun setten un en de Judenschoolen dän väaschten Plauz haben. #Luk 14,7 7See seenen daut jieren, daut Menschen an opp däm Moakjtplauz bejreessen un an Liera nanen. 8Oba jie sellen junt nich Liera #23,8 ooda Rabi nanen loten, wiels jie haben eenen Liera, un jie unjarenaunda sent Breeda. 9Jie sellen uk kjeen Mensch oppe Ieed Voda nanen, wiels jie haben eenen Voda, un dee es em Himmel. 10Jie sellen junt uk nich Meista nanen loten, wiels jie haben eenen Meista, daut es Christus. 11Wäa bie junt groot es, saul jun Deena sennen. #Mat 20,26-27 12Wiels wäa sikj selfst groot moakt, woat trigjesat woaren; un wäa sikj selfst kjlien moakt, woat grootjemoakt woaren. #Hiob 22,29; Spr 29,23; Hes 21,31; Luk 18,14; 1Pet 5,5

Säwen Weeräd äwa de Schreftjelieede un de Farisäa

(Luk 11,39-42.44.47-48.52)

13Wee junt, Schreftjelieede un Farisäa, jie Heichla, jie schluten daut Himmelrikj too ver de Menschen! Jie komen doa nich nenn, un loten dee nich nenn, dee doa nenn wellen. 14(Wee junt, Schreftjelieede un Farisäa, jie Heichla, jie fräten de Wätfrues utem Hus, un moaken lange Jebäda, om jeseenen to sennen! Doawäajen woat june Vedaumnis soo väl jrata sennen.) #23,14 Eenje oole Schreften haben disen Varsch nich.

15Wee junt, Schreftjelieede un Farisäa, jie Heichla, dee jie äwa Launt un Wota reisen, een Mensch fa dän Judengloowen to jewennen. Un wan daut ieescht passieet es, dan moak jie een Halenkjint von am, dobbelt soo sea aus jie selfst sent.

16Wee junt, blinje Wajchwiesa. Jie sajen, wan eena biem Tempel schwieren deit, daut es nuscht; oba wan eena bie daut Tempelgolt schwieren deit, dan es eena jebungen. 17Jie blinje Noaren! Waut es jrata: daut Golt ooda de Tempel, dee daut Golt heilich moakt? 18Un jie sajen uk, wan eena biem Aultoa schwieren deit, daut es nuscht; oba wäa bie daut Opfa opp däm Aultoa schwieet, dee es jebungen. 19Jie blinje Menschen! Waut es jrata, daut Opfa, ooda de Aultoa, dee daut Opfa heilich moakt? 20Dee wäa aulsoo biem Aultoa schwieet, schwieet biem Aultoa met aules, waut doabowen es. 21Un wäa biem Tempel schwieet, schwieet biem Tempel un däm, dee doa bennen wont. 22Un wäa biem Himmel schwieet, schwieet bie Gott sien Troon un bie dän, dee doabowen sett.

23Wee junt, Schreftjelieede un Farisäa, jie Heichla, jie jäwen daut tieende vom Päpakrut, Anies un Dell em Goaden, oba seenen nich daut et wichtja es jerajcht, metliedent un tru to sennen! Dit es waut jie hauden doonen sult, onen daut aundre to unjaloten. #3Mo 27,30; Micha 6,8; Luk 18,12 24Blinje Leidasch! Migjen sie jie rut, oba Kameelen schluck jie opp.

25Wee junt, Schreftjelieede un Farisäa, jie Heichla! Wiels jie moaken june Kuffels un Schiewen von buten krakjt rein, oba waut jie doa bennen haben, hab jie en june Jia toopjestolen! #Mrk 7,4.8 26Jie blinje Farisäa, moakt june Kuffels un Schiewen von bennen rein, dan woaren dee von buten uk rein sennen! #Joh 9,40; Tit 1,15

27Wee junt, Schreftjelieede un Farisäa, Heichla! Jie sent soo aus aunjewitte Jräwa, von buten straum oba von bennen voll Doodenknoakes un jieda Oat Orreinichkjeit. 28Soo lat daut junt von buten aus jerajchte Menschen, oba von bennen sent jie jesazloose Heichla.

29Wee junt, Schreftjelieede un Farisäa, jie Heichla! Jie buen feine Jräwa fa de Profeeten un putzen de jerajchte äare Graufsteena 30un sajen: Wan wie en onse Vodasch äare Tiet jeläft hauden, wudd wie nich metjeholpen haben, de Profeeten äa Bloot to vejeeten! 31Doamet saj jie, daut jie dee äare Säns sent, dee de Profeeten omjebrocht haben. #Jer 26,20-23; Mat 5,12; Apost 7,52 32Dan moakt june Vodasch äare Mot nu voll! 33Jie Schlangen, jie jeftjet Schlangenbroodsel! Woo räakjen jie jun Uadeel, fa de Hal vedaumt to sennen, utem Wäaj to komen?

De Strof woat komen

(Luk 11,49-51)

34Ekj saj junt, ekj schekj junt Profeeten, weise Mana un Schreftjelieede; eenje von dee woa jie doot moaken, un aundre kjriezjen, eenje woa jie en de Judenschoolen priejlen un hinjaraun sennen von eene Staut no de aundre, 35soo daut opp junt aul daut jerajchte Bloot komen woat, daut opp dise Ieed vegoten es; von dän oschuldjen Abel sien Bloot aun, bat Secharja, Barachja sien Sän, sien Bloot, dän jie tweschen dän Tempel un dän Aultoa doot muaken. #1Mo 4,8; 2Chr 24,20-21 36Ekj saj junt woarhauftich, aul dit woat äwa dise Jennerazion komen.

Jesus kloacht äwa Jerusalem

(Luk 13,34-35)

37Oo Jerusalem, Jerusalem, dee du de Profeeten doot moakst, un dee steenichst, dee die jeschekjt woaren! Woo foaken hab ekj die prooft soo to saumlen aus eene Kluck sikj de Kjikjel unja de Flichten saumelt, oba du leetst daut emma nich. 38“Doawäajen woat junt jun Hus to eene Wiltnis woaren”. #1Kjen 9,7-8; Psa 69,26; Jer 22,5 39Ekj saj junt dit: Jie woaren mie nich mea seenen, bat jie sajen woaren: Jesäajent es dee, dee em Harn sienen Nomen kjemt! #Mat 21,9; 26,64

Currently Selected:

Matäus 23: PB

Highlight

Copy