Matäus 22
22
Daut Jlikjnis von de Kjastinjs Enlodunk.
(Luk 14,16-24)
1Un Jesus räd noch wada derch Jlikjnisen to an un säd: 2Daut Himmelrikj es met een Kjennich to vejlikjen, dee fa sien Sän eene Kjast utreed #Joh 3,29 3un dan siene Deena schekjt, dee to sajen, dee doa enjelot wieren, daut see nu to Kjast komen sullen. Oba dee wullen bloos nich komen. 4Un hee schekjt noch eemol aundre Deena un säd: Sajcht dee, dee doa enjelot sent: Kjikjt emol, ekj hab aules reed. Miene Ossen un Mastkjalwa sent jeschlacht. Daut es aula reed. Komt to Kjast! 5Oba see veachten daut un jinjen auf, eena no siene Wirtschoft, de aundra no sien Jeschaft, 6un de äwaje kjrieejen de Deena to hoolen un behaundelden dee schaundhauft un muaken dee doot. #Mat 21,35 7Aus de Kjennich daut hieed, wia hee doll un schekjt siene Soldoten de Merda omtobrinjen, un äare Staut to vebrennen. #Mat 24,2 8Dan säd hee to siene Deena: De Kjast es reed, oba dee waut enjelot wieren, wieren daut nich wieet. 9Doawäajen got noch eemol opp de Huachwäaj, un wäm jie trafen, lot en to Kjast to komen. 10Un de Deena jinjen opp de Gaussen un brochten toop, aula dee see fungen, de goode uk de schlajchte, soo daut sien Sol voll Jast wia. #Mat 13,47 11Oba aus de Kjennich nenn kjeem de Jast to beseenen, sach hee doa een Maun, dee nich een Kjastinjskjleet aun haud, #Opb 19,8 12un hee säd to am: Frint, woo best du hia onen een Kjastinjskjleet nenn jekomen? De Maun wist nuscht to sajen. 13Dan säd de Kjennich to siene Deena: Binjt am Henj un Feet un schmiet am rut em diestren! Doa woaren de Menschen jaumarieren un met de Tänen kjnirschen. 14Doa sent väle enjelot, oba doarut sent mau weinich jewält.
De Froag wäajen däm Kjeisa Taks tolen
(Mrk 12,13-17; Luk 20,20-26)
15Dan jinjen de Farisäa un berooden doaräwa, woo see Jesus en siene Räden, eene Faul stalen kunnen. 16Un see schekjten äare Jinja un dee, dee daut met Herodes hilden, toop han. Dee säden: Meista, wie weeten daut du opprechtich best un woarhauftich Gott sien Wajch lieescht. Du best wäajen kjeenem besorcht, wiels du rätst aulem äwareen aun. #Joh 3,2 17Saj ons waut du denkjst: Es daut rajcht, däm Kjeisa dän Taks tolen, ooda nich? 18Oba Jesus vestunt äare Hinjalest un säd: Jie Heichla, wuarom proow jie mie eene Faul to stalen? 19Lot mie daut Taksjelt #22,19 Griechisch Denarius emol seenen! Un see brochten am een Jeltstekj. 20Un Jesus säd to an: Wäm sien Bilt un wäm siene Enschreft es dit? 21See säden: Dän Kjeisa siene. Dan säd hee to an: Dan jäft dän Kjeisa waut sient es, un jäft Gott, daut waut Gott sient es. #Reema 13,1.7 22Aus see daut hieeden, vewundaden see sikj, un veleeten am un jinjen wajch.
Woaren de Doodes oppstonen?
(Mrk 12,18-27; Luk 20,27-40)
23Un dän selwjen Dach kjeemen de Saduzäa, dee nich doaraun jleewen daut de Doodes oppstonen woaren, no Jesus met eene Froag. #Apost 4,2; 23,6.8 24See säden: Meista, Moses säd: “Wan een Maun stoaft un noch nich Kjinja haft, dan saul sien Brooda de Wätfru frieen un doafäa sorjen, daut sien Brooda nich onen Kjinja blift.” #5Mo 25,5-6 25Nu wieren bie ons säwen Breeda. De ieeschta befried sikj un storf onen Kjinja un leet de Fru fa sienen Brooda. 26Un de tweeda krakjt soo un uk de dredda, soo bat see dee aule säwen hauden to Fru jehaut. 27Dan, no aul däm, storf uk de Fru. 28Wan dan nu de Doodes oppstonen woaren, wäm siene Fru woat see sennen, wiels see haben dee aula jehaut? 29Oba Jesus säd: Jie sent en dit orrajcht, wiels jie nich de Schreft uk nich Gott siene Krauft kjanen. 30Wan de Doodes ieescht oppstonen, befrieen Menschen sikj nich mea un sent uk nich befriet. Dan sent dee soo aus de Enjel #22,30 Eenje oole Schreften sajen Gott siene Enjel. em Himmel. 31Un vom Doot oppstonen, waut daut aunbelangt, hab jie nich jeläst, waut Gott doaräwa jesajcht haft: #2Mo 3,6 32“Ekj sie Abraham sien Gott, Isaak sien Gott un Jakob sien Gott.” Hee es nich de Doodje, oba de Läwendje äa Gott. 33Un aus de Menschen dit hieeden, staunden see äwa sien Lieren.
Daut wichtichste Jeboot
(Mrk 12,28-31; Luk 10,25-28)
34Aus de Farisäa hieeden, daut Jesus de Saduzäa steljemoakt haud, kjeemen see toop. 35Om Jesus to vesieekjen, stald eena von de Schreftjelieede am eene Froag un säd: 36Meista, woont es daut jratste Jeboot em Jesaz? 37Hee säd to am: “Du saust dän Harn, dienen Gott, met dien gaunzet Hoat goot sennen, un met diene gaunze Seel, un met aul diene Jedanken”. #5Mo 6,5 38Dit es daut jratste un ieeschte Jeboot. 39Un daut tweede Jeboot es met dit jlikj: “Du saust dienen Noba jrod soo goot sennen aus die selfst”. #3Mo 19,18 40Opp dise beid Jebooten henjt daut gaunze Jesaz un uk de Profeeten. #Reema 13,9-10
Wäm sien Sän es Christus?
(Mrk 12,35-37; Luk 20,41-44)
41Aus de Farisäa toopjekomen wieren, stald Jesus an eene Froag un säd: 42Waut denkj jie von Christus? Wäm sien Sän es hee? See säden to am: David sien Sän. #Jes 11,1; Joh 7,42 43Hee säd to an: Woo es daut dan, daut David am derch dän Heiljen Jeist sienen Harn nand? 44Wiels hee säd:
“De Har säd to mienen Harn: Sett hia bie mie to rajchte Haunt,
bat ekj aul diene Fiend aus eene Footbenkj unja diene Feet jelajcht hab.” #Psa 110,1; Mat 26,64
45Wan David am Har nand, woo es hee dan sien Sän? 46Un am kunn kjeena eene Auntwuat jäwen. Un von dän Dach aun, woagd sikj kjeena mea, am waut to froagen.
Currently Selected:
Matäus 22: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.