Matäus 21

Jesus kjemt no Jerusalem

(Mrk 11,1-11; Luk 19,28-40; Joh 12,12-19)

1Un aus see noda no Jerusalem kjeemen, bat Betfage aum Oliewen Boajch, schekjt Jesus twee von siene Jinja 2un säd to an: Got en daut Darp, daut ver junt licht, un fuaz woa jie eene Äselin aunjebungen finjen, dee een Joalinkj bie sikj haft. Leest dee loos un brinjt mie dee häa. 3Un wan junt irjentwäa no waut frajcht, dan sajcht am: De Har well dee brucken. Un dee woat junt dee fuaz loten. #Mat 26,18 4Dit passieed, daut erfelt wort, waut de Profeet jesajcht haud: #Sach 9,9

5“Saj de Dochta von Zion:

Seet, dien Kjennich kjemt saunftmootich no die

opp een Äseljoalinkj jeräden.”

6De Jinja jinjen un deeden, soo aus Jesus an befoolen haud, 7un brochten de Äselin uk daut Joalinkj un spreeden äare Kjleeda doa nopp, un Jesus sad sikj doa nopp. 8Un väle Menschen deeden äare Kjleeda äwa dän Wajch utspreeden. Aundre schneeden Asta von de Beem auf un spreeden dee äwarem Wajch. #2Kjen 9,13 9De groote maussen Menschen, dee veropp jinjen, un uk dee waut hinjaraun kjeemen, schrieejen:

Hosiana, dit es David sien Sän!

Jesäajent en Gott sienen Nomen es dee, dee hia kjemt!

Loft Gott em hechsten Himmel! #Psa 118,25-26

10Un aus Jesus en Jerusalem nenn kjeem, wia de gaunze Staut oppjeräacht un fruagen: Wäa es dit? 11Daut Volkj säd: Dit es de Profeet, Jesus Christus von Nazaret en Galiläa.

Jesus em Tempel

(Mrk 11,15-19; Luk 19,45-48; Joh 2,13-17)

12Un Jesus jinkj em Gottestempel #21,12 Eenje oole Schreften sajen Tempel. nenn un juach dee aula rut, dee doa bennen koften un vekoften. Un hee stelpt de Jeltwakjsla äare Deschen om, uk de Duwenhendla äare Benkjen. 13Hee säd to an: Daut steit jeschräwen, “Mien Hus saul een Bädhus sennen”, oba jie moaken eene Reibaheel doarut. #Jes 56,7; Jer 7,11 14Un de blinje un lome kjeemen no am em Tempel, un hee heeld an. 15Oba aus de Huagepriestasch un de Schreftjelieede sagen, waut Jesus fa Wunda deed, un woo de Kjinja em Tempel David sien Sän een Hosiana tooschrieejen, oajad an daut 16un säden to am: Hieescht du nich waut dise sajen? Jo, säd Jesus: Hab jie noch niemols jeläst: “Du hast doafäa jesorcht, daut de Kjinja aun de Muttabrost die lowen woaren?” #Psa 8,3 17Dan veleet hee an un jinkj ut de Staut rut no Betanien un bleef doa to Nacht.

De Fiejenboom: Daut Väajerecht äwa Israel. Aunsporn toom Gloowen

(Mrk 11,12-14.20-25)

18Aus hee tiedich zemorjes trigj no de Staut kjeem, hungad am. 19Un aus hee een Fiejenboom aum Wajch stonen sach, jinkj hee han, oba funk sest nuscht aus Bläda doaraun. Dan säd hee to dän Boom: Mucht aun die niemols mea Frucht waussen! Un dee Boom vedrieejd fuaz opp de Städ. #Luk 13,6 20Aus de Jinja daut sagen, wundaden see sikj un fruagen: Woo kjemt daut, daut de Boom fuaz vedrieecht es? 21Un Jesus säd to an: Ekj saj junt de Woarheit: Wan jie jleewen un nich twiewlen, dan woa jie nich mau doonen, waut aun dän Fiejenboom passieet es, dan woa jie soogoa to disen Boajch sajen: Du saust von hia oppjehowen un em Mäa jeschmäten sennen! un daut woat woaren. #Mat 17,20 22Un om aules, waut jie bäden, woa jie kjrieen, wan jie Gloowen haben.

Äwa Jesus sien Machtrajcht

(Mrk 11,27-33; Luk 20,1-8)

23Aus Jesus em Tempel nenn kjeem un aunfunk to lieren, kjeemen daut Volkj äare Huagepriestasch un Eltestasch no am un fruagen: Derch waut fa een Machtrajcht deist du dise Dinja, un wäa haft die daut Machtrajcht jejäft? #Joh 2,18; Apost 4,7 24Oba Jesus auntwuad an: Ekj woa junt uk waut froagen, un wan jie mie de Auntwuat jäwen, dan woa ekj junt uk sajen, derch waut fa een Machtrajcht ekj dise Dinja doo. 25Johanes sien deepen, wia daut vom Himmel ooda von Menschen? Un see streeden selfst han un häa un säden: Wan wie sajen, daut et vom Himmel wia, dan woat hee sajen: Wuarom jleewd jie dan nich aun am? 26Oba wan wie sajen: Von Menschen, dan hab wie daut Volkj jäajen ons, wiels dee hoolen Johanes aula fa een Profeet. #Mat 14,5 27Un soo säden see to Jesus: Wie weeten nich. Dan säd hee to an: Dan saj ekj junt uk nich, derch waut fa eene Krauft ekj dise Dinja doo.

Daut Jlikjnis von twee Säns

28Waut denkj jie? Een Maun haud twee Säns. Un hee jinkj no dän ieeschten un säd: Sän, go oabeid vondoag en mien Wiengoaden. 29Un hee säd: Ekj well nich. Oba nohäa wia am daut leet, un hee jinkj doch. 30De Voda jinkj no dän tweeden Sän un säd to dän krakjt soo. Dee säd: Jo, Har, ekj go! un jinkj oba nich. #Mat 7,21 31Woona von dee beid, deed waut de Voda haben wull? See säden: De ieeschta. Jesus säd to an: Ekj saj junt de Woarheit: De Takskollakjta un Huaren gonen ea em Himmelrikj nenn aus jie. #Luk 18,9-14 32Wiels Johanes kjeem junt dän rajchten Wajch to lieren, un jie jleewden am nich. Oba de Takskollakjta un Huaren jleewden am. Un soogoa aus jie daut sagen, kjieed jie nich om un jleewden am nich. #Luk 7,29

Daut Jlikjnis von de beese Wiengoaden Pajchtasch

(Mrk 12,1-12; Luk 20,9-19)

33Jesus säd: Horcht emol no dit Jlikjnis: Doa wia een Wirtschofta, dee plaunt een Wiengoaden, bud doa een Tun rom un muak eene Wienpras un bud een Torm un vepacht dän Goaden un reisd no een aundret Launt. #Jes 5,1-2 34Un aus de Wiendruwenarnt kjeem, schekjt hee siene Deena no de Pajchta, sien Poat von de Frucht to holen. 35Un de Pajchta veheiwden eenen von de Deena, muaken dän tweeden doot un steenijden dän dredden. 36Un hee schekjt noch eemol Deena, mea aus daut ieeschte mol, oba de Pajchta deeden met dee daut selwje. 37Dan nohäa schekjt hee sien ieejnen Sän. Hee säd: Fa mien Sän woaren see Respakjt haben. 38Oba aus de Pajchta dän Sän sagen, säden see to sikj selfst: Dit es de Oaw. Komt, well wie dän doot moaken un sien Oafgoot nämen! #Mat 26,3-5; Joh 1,11 39Un see neemen am, schmeeten am utem Wiengoaden rut un muaken am doot. 40Wan nu de Ieejendeema vom Goaden komen woat, waut woat dee met de Pajchta doonen? 41See säden to am: Dee woat de beese Baund ombrinjen un dän Wiengoaden aun aundre vepachten, dee am de Frucht jäwen, wan de Tiet doatoo es.

42Jesus säd to an: Hab jie dit nich en de Schreft jeläst:

“Jrod dän Steen, dän de Bulied tosied läden, es de Akjsteen jeworden?

Daut haft de Har jedonen, un es een Wunda ver onse Uagen?” #Psa 118,22-23; Apost 4,11; 1Pet 2,4-8

43Daut es wuarom ekj junt saj, daut Gott sien Rikj von junt woat wajch jenomen woaren un een Volkj jejäft, daut doa Frucht brinjen woat, soo aus sikj daut jehieet. 44(Un wäa opp disen Steen felt, woat sikj to Bieta bräakjen. Un opp wäm dee Steen felt, dee woat to Grus veschloagen woaren.) #21,44 Eenje oole Schreften haben disen Varsch nich.

45Aus de Huagepriestasch un de Farisäa dit Jlikjnis hieeden, wisten see goot, daut Jesus an doamet meend. 46Oba aus see am wullen faustnämen, ferchten see sikj doch fa de Menschen, wiels dee Jesus fa een Profeet hilden.

Currently Selected:

Matäus 21: PB

Highlight

Copy