Matäus 15
15
Faulscha Gottesdeenst
(Mrk 7,1-13)
1Dan kjeemen Farisäa un Schreftjelieede von Jerusalem no Jesus un säden: 2Wuarom hoolen diene Jinja sikj nich aun de Eltestasch äare Väaschreften? Wiels see wauschen sikj nich de Henj ver däm Äten. #Luk 11,38 3Un hee säd to an: Un wuarom sat jie Gott sien Jeboot auntsied, daut jie june Väaschreften hoolen kjennen? 4Wiels Gott befool Voda un Mutta to ieren; un wäa Voda un Mutta flieekjt saul met däm Doot bestroft woaren. #2Mo 20,12; 21,17 5Oba jie sajen: Wan wäa to Voda un Mutta sajcht: Daut waut junt von mie togood komen kunn, es Gott äwajäft, dee deit rajcht. #(5 un 6) Spr 28,24; 1Tim 5,8 6Doamet es daut soo wiet, daut kjeena mea Voda un Mutta ieet. Un soo hab jie om june Väaschreften to hoolen, Gott siene Jebooten #15,6 Eenje oole Schreften sajen Wuat. to nuscht jemoakt. 7Jie Heichla, de Profeet Jesaja haft von junt gaunz rajcht jesajcht: #Jes 29,13
8“Dit Volkj ieet mie met de Leppen,
oba äa Hoat es wiet auf von mie,
9oba vejäfs deenen see mie,
wiels waut see lieren sent bloos Menschenjebooten.”
Waut Menschen veorreinicht
(Mrk 7,14-23)
10Un Jesus roopt de Menschen no sikj un säd to an: Horcht häa un vestot dit! 11Waut een Mensch veorreinicht es nich daut waut em Mul nenn jeit, oba daut waut utem Mul rut kjemt veorreinicht am. #Apost 10,15; 1Tim 4,4; Tit 1,15 12Dan kjeemen de Jinja no am un säden: Weetst du uk daut de Farisäa sikj oajaden, aus dee hieeden, waut du sätst? 13Hee säd: Aule Plaunten, dee mien himlischa Voda nich jeplaunt haft, woaren utjeräten woaren. #Apost 5,38 14Lot dee toch. Daut sent blinje Blinjenleida! Un wan een blinja Maun een aundren blinjen leit, faulen see beid em Growen. #Mat 23,24; Luk 6,39; Reema 2,19 15Oba Petrus säd: Moak ons daut Jlikjnis dietlich. 16Un Jesus säd: Vesto jie uk noch emma nuscht? 17Weet jie nich, daut aules, waut derch een Mensch sien Mul nenn jeit, jeit en de Moag nenn un von doa wada rut? 18Oba waut utem Mul rut kjemt, kjemt utem Hoaten, un daut veorreinicht dän Mensch. 19Wiels ut däm Hoaten komen beese Jedanken, Mort, Ehebruch, Huararie, stälen, faulsche Zeichnisen, un gotteslastaliche Räden. #1Mo 8,21 20Dit es waut een Mensch orrein moakt. Oba met onjewoschne Henj äten, daut veorreinicht am nich.
Eene nichjudische Fru äa Gloowen
(Mrk 7,24-30)
21Dan jinkj Jesus von doa un trock sikj trigj en de Jäajenden von Tierus un Sidon. 22Un dan kjeem am von doa eene kanaanitische Fru entjäajen, un funk aun to schrieen: Oo Har, du David sien Sän, hab Metleet met mie! Miene Dochta woat schrakjlich vom Soton jeploacht. 23Oba Jesus jeef ar kjeene Auntwuat. Siene Jinja oba kjeemen un prachaden am: Schekj dee Fru wajch. Dee schricht ons hinjaraun. 24Jesus säd: Ekj sie bloos no de veloarne Schop en Israel jeschekjt. #Mat 10,5-6; Reema 15,8 25See kjeem oba un kjneed sikj ver am un säd: Har, halp mie! 26Un hee säd to ar: Daut es nich rajcht de Kjinja äa Broot to nämen un de Hunj väatoschmieten. 27See säd: Jo, Har, ekj weet. Un doch äten de Hunj, waut bie äare Haren vom Desch felt. 28Dan säd Jesus to ar: Oo Fru, du hast een grooten Gloowen. Du saust kjrieen, waut du die wenschst! Un äare Dochta wia plazlich jesunt. #Mat 8,10.13
Jesus heelt väl Menschen un jeft 4.000 to äten
(Mrk 7,31—8,10)
29Dan jinkj Jesus von doa delenjd däm galiläischen Mäa. Hee jinkj opp däm Boajch nopp un sad sikj doa dol. 30Dan kjeemen groote Schoowa no am un brochten äare lome, blinje, Stomme, Kjräpels, un väle aundre, un läden dee ver Jesus siene Feet han, un hee heeld dee, 31soo daut de Menschen sikj vewundaden aus see sagen daut de Stomme räden deeden, de Kjräpels jesunt wieren, de lome jinjen, un daut de blinje seenen kunnen. Un see lowden Israel äaren Gott. #Mrk 7,37
32Dan roopt Jesus sikj siene Jinja un säd to an: Mie jaumat daut äwa de väle Menschen, wiels dee sent hia nu aul dree Doag bie mie jewast un haben nuscht to äten. Ekj well dee nich hungrich wajch schekjen, wiels dee kunnen hinjawäajes veschmachten. #(32-39) Mat 14,13-21 33Dan säden siene Jinja to am: Wua kjenn wie hia en de Wiltnis jenuach Broot kjrieen, soon Schoof Menschen saut to moaken? 34Jesus fruach an: Woo väl Brood hab jie? See säden to am: Säwen un een poa kjliene Fesch. 35Dan befool hee de Menschen sikj opp de Ieed doltosaten. 36Dan neem hee de säwen Brood un de Fesch un dankt doafäa. Hee bruak dee un jeef de Jinja dee, un de Jinja jeewen dee de Menschen. 37Dan eeten dee aula un worden saut. Un see lausen opp, waut noch äwajebläwen wia, säwen Kjarwvoll. 38Doa hauden 4.000 Maun jejäten, daut es Frues un Kjinja nich metjetalt. 39Un aus Jesus de Menschen wajch jeschekjt haud, stieech hee en daut Boot, un kjeem en de magdalische Jäajent aun.
Currently Selected:
Matäus 15: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.