Matäus 13
13
Jesus mott en een Boot stieen
(Mrk 4,1-2; Luk 8,4)
1Dänselwjen Dach jinkj Jesus utem Hus rut, jinkj aum Mäa un sad sikj dol. 2Un om am saumelden sikj soo väl Menschen, daut hee en een Boot stieech un sikj doa dolsad, un de Menschen stunden aun de Kaunt vom See.
Daut Jlikjnis vom Seien
(Mrk 4,2-9; Luk 8,5-8)
3Un hee vetald an välet derch Jlikjnisen. Hee säd: Doa wia een Maun dee jinkj seien. 4Un aus hee seid, foll eenjet opp däm Stich; un de Väajel kjeemen un freeten daut opp. 5Waut von daut Sot foll opp steenajen Boddem, wua nich väl Ieed wia, un daut jinkj fuaz opp, wiels doa nich deep Ieed wia. 6Oba aus de Sonn oppjinkj, vebrend daut, un wiels daut nich Wartlen haud, vedrieejd daut. 7Waut Sot foll manke Distlen; un de Distlen wossen opp un stekjten daut. 8Dan foll doa uk Sot opp goodet Launt un brocht Frucht. Eenjet brocht 100 mol, eenjet 60 un eenjet 30 mol soo väl aus jeseit wia. 9Wäa Uaren haft toom hieren, #13,9 Eenje oole Schreften haben nich toom hieren. däm lot hieren.
Wuarom Jesus derch Jlikjnisen räd
(Mrk 4,10-12.25; Luk 8,9-10.18; 10,23-24)
10Dan kjeemen de Jinja no am un fruagen: Wuarom rätst du to an en Jlikjnisen? 11Doaropp auntwuad hee an: Wiels junt daut jejäft es de Jeheemnisen vom Himmelrikj to vestonen, jane oba es daut nich jejäft worden. #1Kor 2,10 12Wiels wäa doa haft, däm woat mea jejäft woaren, daut dee mea aus jenuach haft; wäa oba nich haft, von däm woat noch daut jenomen woaren waut hee haft. #Spr 9,9; Mat 25,28-29; Mrk 4,25; Luk 8,18 13Doawäajen räd ekj to an derch Jlikjnisen. Wiels see seenen nich wan see uk kjikjen, un hieren nich wan see uk horchen; un vestonen uk nich. 14En dee es Jesaja sien Profeeten Wuat woa:
“Jie woaren emma hieren oba niemols vestonen;
jie woaren emma kjikjen oba woaren daut nich venämen. #Jes 6,9-10
15Wiels dit Volkj es em Hoat vehoat,
äare Uaren hieren schlajcht
un see haben äare Uagen too.
Sest kunnen see met de Uagen seenen un met de Uaren hieren
un em Hoat vestonen un dan omdreien,
un dan wudd ekj an heelen.” #Joh 9,39
16Oba june Uagen sent jesäajent, wiels dee seenen, un june Uaren, wiels dee hieren. #Luk 10,23-24 17Wiels ekj saj junt de Woarheit: Väle Profeeten un jerajchte Mana wudden jieren jeseenen haben, waut jie seenen, oba haben daut nich jeseenen, un hieren waut jie hieren, oba haben daut nich jehieet. #1Pet 1,10
Jesus sajcht waut daut Jlikjnis vom Seien meent
(Mrk 4,13-20; Luk 8,11-15)
18Dan horcht no daut Jlikjnis von däm Maun, dee doa seien jinkj. 19Wan irjentwäa daut Wuat vom Gottesrikj hieet, un vesteit nich waut daut meent, dan kjemt de beesa un fipst am daut wajch, waut en sien Hoat jeseit wia. Dit es daut waut opp däm Stich jeseit wia. 20Un waut opp däm steenajen jeseit wia, es soo: Daut es eena, dee daut Wuat hieet un fuaz met Freid oppnemt. 21Oba dee haft nich Wartlen un daut helt mau eene korte Tiet väa. Un wan irjent lieden ooda Vefoljunk wäajen daut Wuat kjemt, oajat am daut sooboolt. 22Un daut waut manke Distlen jeseit wia, es soo: Daut es eena dee daut Wuat hieet, oba de Sorjen en dise Welt un de Freid aum Rikjtum stekjen daut Wuat, un daut kaun nich Frucht droagen. #Mat 6,19-34; 1Tim 6,9 23Un daut waut opp goode Ieed jeseit wia, sajcht dit: Daut es eena, dee daut Wuat hieet un vesteit un daut doano Frucht drajcht, un brinjt 100 ooda 60 ooda 30 mol soo väl aus jeseit wort.
Daut Jlikjnis vom Krut mankem Weit
24Jesus stald an noch een Jlikjnis väa un säd: Daut Himmelrikj es met een Maun to vejlikjen, dee goodet Sot opp siene Stap seid. 25Aus de Menschen schleepen, kjeem sien Fient un seid Onkrut mank sien Weit, un jinkj doavon. 26Un aus de Plaunten oppkjeemen un Frucht kjrieejen, kjeem daut Onkrut uk verendach. 27Dan kjeemen dän Wirtschofta siene Deena un säden: Har, hast du nich goodet Sot opp dien Aka jeseit? Wua kjemt daut Onkrut häa? 28Hee säd to an: Daut haft een Fient jedonen. Dan säden de Deena to am: Sell wie dan gonen daut rut saumlen? 29Oba hee säd: Nä! daut jie nich biem weeden dän Weit uk utrieten. 30Lot daut beides bat däm Eifst waussen. Un wan daut ieescht Eifst es, dan woa ekj de Drascha sajen: Saumelt ieescht daut Onkrut un binjt daut en Bunj toom vebrennen. Oba dän Weit saumelt em Spikja. #Mat 3,12; 15,13; Opb 14,15
Sampkuarn un Häw: De entschiedenda Aunfank es jemoakt
(Mrk 4,30-32; Luk 13,18-29)
31Un Jesus vetald noch een aundret Jlikjnis. Hee säd: Daut Himmelrikj es met een Sampkuarn to vejlikjen, daut een Maun neem un en sien Aka seid. 32Daut es daut kjlanste Sotkuarn, oba wan daut ieescht jewossen es, es daut von daut jratste Struck un woat een Boom, soo daut de Väajel komen un sikj en de Asta äare Nasta buen. #Hes 17,23
33Hee vetald an noch een Jlikjnis: Met däm Himmelrikj es daut soo aus wan eene Fru Häw em Dieech nenn kjnät, wuaderch daut gaunze Stekj Dieech oppjeit. #Luk 13,20-21
Noch eemol: Wuarom derch Jlikjnisen räden
(Mrk 4,33-34)
34Aul dit räd Jesus to de väle Menschen en Jlikjnisen, un räd to an nich aundasch aus derch Jlikjnisen, #Mrk 4,33-34 35daut et soo romkjeem aus de Profeet #13,35 Eenje oole Schreften sajen de Profeet Jesaja. jesajcht haud:
“Ekj woa en Jlikjnisen räden. Ekj woa von Dinja räden,
dee vom Aunfank vonne Welt sent jeheem jehoolen.” #Psa 78,2
Jesus moakt daut kloa waut daut Jlikjnis vom Krut bediet
36Dan leet Jesus daut Volkj gonen un jinkj em Hus nenn. Siene Jinja kjeemen no am un säden: Saj ons waut daut Jlikjnis vom Onkrut opp de Stap bediet. 37Hee auntwuad un säd to an: Dee, dee daut goode Sot seit, es de Menschensän. 38De Aka es de Welt. De goode Sot sent dee, dee toom Himmelrikj jehieren, un daut Onkrut sent dee, dee dän beesen jehieren. #Joh 8,44; 1Kor 3,9 39De Fient, dee daut seit, es de Soton. De Eifst es dan, wan dise Tiet to Enj kjemt. De Drascha sent de Enjel. 40Jrod soo aus daut Krut utjeräten un em Fia jeschmäten woat, soo woat daut uk sennen, wan dise Tiet to Enj kjemt. 41De Menschensän woat siene Enjel schekjen, aules ut sien Rikj rut to saumlen, waut doa err fieet un wäa jesazloos es, #Mat 24,31 42un woat dee en een flaumenda Owen schmieten. Doa woaren de Menschen jaumarierent schrieen un met Tänen kjnirschen. 43Dan woaren de jerajchte en äaren Voda sien Kjennichrikj schienen aus de Sonn. Wäa doa Uaren haft, to hieren, däm lot hieren! #Dan 12,3
De vestoakna Schauz un de Parlen
44Met daut Himmelrikj es daut soo aus met een Schauz, dee opp de Stap vegroft es, dän een Maun funk un dan vestuak un en siene Freid jinkj un aules vekoft, waut hee haud, un daut Stekj Launt koft. #Mat 19,29; Luk 14,33; Flp 3,7 45Dan es daut Himmelrikj uk met een Haundelsmaun to vejlikjen, dee no feine Parlen socht. 46Dee dan, aus hee eene sea wieetvolle Parl funk, jinkj un vekoft aules, waut hee haud, un koft dee.
Daut Jlikjnis vom Feschnat
47Dan es daut Himmelrikj uk soo aus een Nat, daut em Mäa jeschmäten woat, un aule veschiedenste Sorten Fesch saumelt. #Mat 22,9-10 48Un wan daut ieescht voll es, schlapen see daut no de Kaunt. Dan saten de Menschen sikj dol un saumlen de goode en Jefässa, un de schlajchte woaren wajch jeschmäten. 49Soo woat daut uk sennen wan dise Tiet to Enj kjemt: Dan woaren de Enjel komen un de beese von de jerajchte scheeden #Mat 25,32 50un woaren dee em Fia schmieten. Doa woaren de Menschen jaumarieren un met de Tänen kjnirschen.
Niee Jesazesliera
51Jesus säd to an: Hab jie dit aula vestonen? See säden to am: Jo. 52Hee säd to an: Daut es wuarom jieda Schreftjelieeda, dee äwa daut Himmelrikj belieet es, soo es aus een Huswieet, dee ut siene Schauzkoma oolet uk nieet verendach brinjt. 53Aus Jesus derch wia met siene Jlikjnisen vetalen, jinkj hee von doa wieda.
Jesus woat en Nazaret vestat
(Mrk 6,1-6; Luk 4,16-30)
54Un aus hee no siene Staut kjeem, wua hee tus jehieed, lieed hee an en äare Judenschool, soo daut see sikj vewundaden un säden: Wua komen disem soone Weisheit un Wundawoakjen häa? 55Es dit nich dän Holtoabeida sien Sän? Un heet siene Mutta nich Maria, un siene Breeda Jakobus un Josef un Simon un Judas? 56Un sent siene Sestren nich aula bie ons? Wua haft dis Mensch daut aula häa? #Joh 6,42; 7,15.52 57Un see stieeden sikj äwa am. Oba Jesus säd to an: Een Profeet woat noanich weinja jeieet aus en sien ieejnet Launt un sien ieejnet Hus. #Joh 4,44 58Un hee deed doa nich väl Wundawoakjen, wiels see nich jleewden.
Currently Selected:
Matäus 13: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.