Matäus 12
12
Jesus un de Sabat
(Mrk 2,23-28; Luk 6,1-5)
1En dee Tiet jinkj Jesus aum Sabat derch de Jeträajd Flekja. Siene Jinja wieren hungrich un fungen aun Oaren to plekjen un to äten. #5Mo 23,26 2Aus de Farisäa daut sagen, säden dee to am: Kjikj, diene Jinja doonen, waut aum Sabat nich erlaupt es. #2Mo 20,10 3Hee säd to an: Hab jie nich jeläst waut David deed, un dee waut met am wieren, aus am hungad? #(3 un 4) 1Sam 21,7 4Woo hee em Gotteshus jinkj un daut Broot eet, daut Gott jeweit wia, waut doa jäajen daut Jesaz wia fa am to äten, un fa dee, dee met am wieren; wiels daut wia bloos fa de Priesta. #3Mo 24,9 5Ooda hab jie nich jeläst, woo aum Sabat de Priesta em Tempel dän Sabat veorreinjen un doch oschuldich bliewen? 6Ekj saj junt: Hia es wäa jrata aus de Tempel. 7Un wan jie vestonen hauden, waut dit meent: “Ekj well nich Opfa, oba daut jie Metleet haben”, dan haud jie de oschuldje nich vedaumt. #Hos 6,6; Mat 9,13 8Wiels de Menschensän es Har äwa dän Sabat.
Jesus heelt aum Sabat
(Mrk 3,1-6; Luk 6,6-11)
9Jesus veleet doa un jinkj en de Judenschool nenn 10un troff doa een Mensch, dee eene vedrieejde Haunt haud. Dan, om daut see eene Sach jäajen am fungen, fruagen see am: Es daut rajcht aum Sabat to heelen? 11Hee säd to an: Es mank junt irjentwäa, wan däm een Schop aum Sabat em Borm foll, dee daut nich wudd to hoolen kjrieen un rut häwen? #Luk 14,3-5 12Un wooväl mea es een Mensch nich wieet aus een Schop! Doawäajen es daut erlaupt aum Sabat goodet to doonen. 13Dan säd hee to dän Maun: Strakj diene Haunt ut! Hee deed daut, un dee wia jrod soo jesunt aus de aundre. 14Oba de Farisäa jinjen rut to beroden, woo see am äwatsied brinjen kunnen. #Joh 5,16
De Deena von Gott jewält
(Mrk 3,7-12; Luk 6,17-19)
15Aus Jesus dit enwort, jinkj hee von doa wajch. Un am kjeemen väl Menschen hinjaraun un hee heeld dee aula. 16Un hee veboot an to sajen wäa hee wia, #Mat 8,4 17daut sikj erfellen sull, waut de Profeet Jesaja von am jesajcht haud: #Jes 42,1-4
18“Kjikjt, daut es mien Kjnajcht, dän ekj mie jewält hab;
mien leewa Sän, met däm miene Seel sea tofräd es,
un hee woat de Velkja sajen, waut rajcht es. #Mat 3,17; Apost 3,13.26
19Hee woat nich Striet un Loarm aunstalen,
un siene Stemm woaren see nich opp de Gaussen hieren;
20hee woat daut enjekjnekjte Rua nich aufbräakjen,
un een Licht daut noch flakat woat hee nich utpusten,
bat hee daut bat doa brinjt daut de Jerajchtichkjeit woat de Äwahaunt haben,
21un opp sienen Nomen woaren de Velkja äare Hopninj saten.”
Jesus siene Macht äwa de beese Jeista
(Mrk 3,20-30; Luk 11,14-23)
22Dan brochten de Menschen eenen blinjen, stommen Maun no Jesus, dee von eenen beesen Jeist besäten wia, un hee heeld dän, daut de Maun räden un seenen kunn. 23Un de Menschen vewundaden sikj un säden: Kunn dit opplatst dän David sien Sän sennen? #Mat 21,9; Joh 7,42 24Oba aus de Farisäa daut hieeden, säden dee: Daut es bloos derch Beelzebul, dän bowaschten Soton, daut hee Soton utdriewen deit. #Mat 9,34 25Jesus wist waut see dochten un säd to an: Jieda Rikj, daut en sikj selfst nich eenich es, jeit to Grunt; un jieda Staut ooda Hus, daut en sikj selfst nich eenich es, kaun nich bestonen. 26Un wan een Soton dän aundren utdrift, oabeit hee jäajen sikj selfst. Woo kaun dan sien Rikj bestonen? 27Un wan ekj derch Beelzebul Soton utdriew, derch wäm driewen june Säns dee ut? Doawäajen woaren see june Rechta sennen. 28Oba wan daut derch Gott sien Jeist es, daut ekj de Soton utdriew, dan es Gott sien Rikj aul äwa junt jekomen. #1Joh 3,8 29Ooda woo kaun irjentwäa en een stoakjen Maun sien Hus nenn bräakjen un am siene Sachen wajchnämen, wan hee dän stoakjen nich ieescht binjen deit? Ieescht mau dan kaun hee sien Hus utplindren. #Jes 49,24; Mat 4,1-11 30Wäa nich fa mie es, es jäajen mie; un wäa nich met mie saumelt, dee vestreit. #Mrk 9,40
31Doawäajen saj ekj junt: De Menschen woat aule Sind un Lastrunk vejäft woaren, oba de Lastrunk jäajen dän Heiljen Jeist woat nich vejäft woaren. #Heb 6,4-6; 10,26; 1Joh 5,16 32Wäa jäajen dän Menschensän rät, kaun Vejäwunk kjrieen, oba irjentwäa, dee jäajen dän Heiljen Jeist rät, woat nich vejäft woaren, nich en dise Tiet uk nich en dee, dee nohäa kjemt. #1Tim 1,13
Soo aus de Boom, es uk de Frucht
(Luk 6,43-45)
33Sat eenen gooden Boom, soo woat de Frucht goot sennen; sat eenen schlajchten Boom, un de Frucht woat schlajcht sennen. Aun de Frucht woa jie dän Boom kjanen. 34Jie Schlangenbroodsel, woo kjenn jie goodet räden wan jie schlajcht sent? Wiels wuavon daut Hoat voll es, doavon rät daut Mul. #Mat 3,7 35Een gooda Mensch brinjt ut siene goode Koma goodet rut; un een schlajchta Mensch brinjt ut siene schlajchte Koma schlajchtet rut. 36Ekj saj junt dit, aum Jerechtsdach woat de Mensch Räakjenschoft jäwen fa jieda onnitzeljet Wuat, daut hee jerät haft. #Jak 3,6; Jud 1,15 37Wiels derch june ieejne Wieed woa jie jerajchtfoadicht, un derch june ieejne Wieed woa jie vedaumt.
De Jäajna velangen een Wunda to seenen
(Mrk 8,11-12; Luk 11,16-32)
38Dan säden atelje von de Farisäa un Schreftjelieede to am: Meista, wie wudden jieren een Tieekjen von die seenen. 39Oba hee säd to an: Eene beese ehebräakjarische Jennerazion sieekjt no een Tieekjen; oba an woat sest kjeen Tieekjen jejäft woaren, aus daut, vom Profeeten Jona. 40Soo aus Jona dree Doag un dree Nacht em Fesch sienen Buck wia, soo woat de Menschensän dree Doag un dree Nacht medden en de Ieed sennen. #Jona 2,1; Efs 4,9; 1Pet 3,19 41De Menschen von Ninive woaren aun janem Jerechtsdach oppstonen un dit vedaumen, wiels dee kjieeden om aus Jona prädijd. Un kjikjt emol, hia es eena jrata aus Jona wia. #Jona 3,5 42De Kjennichsche utem Sieden woat aum Jerecht oppstonen un dise Jennerazion vedaumen; wiels see kjeem von de aundre Kaunt Welt Salomo siene Weisheit to hieren. Un kjikjt, hia es eena jrata aus Salomo. #1Kjen 10,1-10
Woarnunk fa de Foljen von trigjfaulen
(Luk 11,24-26)
43Wan de orreina Jeist ut een Mensch rut foat, jeit dee derch drieeje Wiltnis un sieekjt no Ru, un finjt dee oba nich. 44Dan sajcht hee sikj: Ekj woa trigj no mien Hus gonen, von wua ekj kjeem. Un wan hee trigjkjemt, finjt hee daut Hus ladich, jefäacht un oppjeriemt. 45Dan jeit hee un holt sikj säwen aundre Jeista, dee oaja sent aus hee selfst, un trakjen nenn un wonen doa, un daut es met soon Mensch tolatst schlemma aus daut verhäa wia. Un soo woat daut dise beese Jennerazion uk gonen. #2Pet 2,20
Jesus siene woare Famielje
(Mrk 3,31-35; Luk 8,19-21)
46Aus Jesus noch to aul dee Menschen räd, stunden siene Mutta un siene Breeda buten. Dee wullen met am räden. #Mat 13,55 47Dan säd am wäa: Diene Mutta un diene Breeda stonen buten un wellen met die räden. #12,47 Eenje oole Schreften haben disen Varsch nich. 48Hee säd: Wäa es miene Mutta, un wäa sent miene Breeda? #Mat 10,37; Luk 2,49 49Hee wees no siene Jinja un säd: Hia sent miene Mutta un miene Breeda! #Heb 2,11 50Wäa doa deit waut mien Voda em Himmel velangt to doonen, es mien Brooda, miene Sesta un miene Mutta. #Reema 8,29
Currently Selected:
Matäus 12: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.