Matäus 10
10
De 12 Apostel
(Mrk 6,34-19; Luk 10,2-16)
1Un Jesus roopt sikj siene 12 Jinja, un jeef an de Macht orreine Jeista uttodriewen, jieda Krankheit un aulet lieden to heelen. 2Dit sent de 12 Apostel äare Nomes: ieeschtens Simon, dee uk Petrus heet, un dän sien Brooda Andreas. Un Zebedäus sien Sän Jakobus un dän sien Brooda Johanes. #(2-4) Mrk 3,16-19; Luk 6,14-16; Apost 1,13 3Un Filippus un Bartolomäus un Tomas un Matäus, de Takskollakjta. Un Jakobus, waut Alfäus sien Sän wia, un Tadäus. #10,3 Eenje oole Schreften sajen Lebäus un eenje Lebäus dän see Tadäus säden. 4Un Simon von Kana un Judas Iskariot, dee am nohäa veroot.
De 12 äare Mission
(Mrk 6,7-13; Luk 9,2-6)
5Dise 12 schekjt Jesus ut un jeboot an un säd: Got noanich manke Nichjuden un got uk nich en de Samarita äare Städa. 6Got leewa no de veloarne Schop en Israel. #Mat 15,24; Apost 13,46 7Un wan jie gonen, prädicht un sajcht: Daut Himmelrikj es nu aune Däa. #(7-15) Luk 10,1-12; Mat 4,17 8Heelt de kranke, reinicht de Lepra, wakjt de Doodes opp un drieft de Soton ut. Jie haben daut emsonst jekjräajen, jäft daut uk emsonst wieda. #Mrk 16,17 9Nämt kjeen Golt, Selwa ooda Koppa em Gort. #Apost 20,33 10Nämt uk nich eene Tausch, uk nich twee Kjleeda ooda Schoo, uk nich een Stock met opp june Reis, wiels een Oabeida es sien Äten wieet. #4Mo 18,31; 1Kor 9,14; 1Tim 5,18 11Un wan jie en eene Staut ooda Darp nenn komen, seet junt no wäm rom, dee daut wieet es, un blieft doa, bat jie wieda reisen. 12Un wan jie en een Hus nenn komen, jäft an jun Frädensgruss. 13Un wan daut Hus daut wieet es, dan woat june Fräd doaräwa komen. Es daut daut oba nich wieet, dan woat june Fräd wada trigj no junt komen. 14Un wan junt wäa nich well oppnämen un no june Wieed horchen, dan got von daut Hus ooda dee Staut wajch un scheddat junt dän Stoff von de Feet. #Apost 13,51 15Ekj saj junt gaunz opprechtich: Aum Jerechtsdach woat daut fa Sodom un Gomorra leichta sennen aus fa soone Staut. #1Mo 19,1-29
Komende Vefoljunk
(Mrk 13,9-13; Luk 21,12-17)
16Seet emol! Ekj schekj junt aus Schop medden manke Wilw. Doawäajen siet kluak aus de Schlangen un oschuldich aus de Duwen. #Luk 10,3; Reema 16,19; Efs 5,15 17Seet junt väa fa de Menschen; dee woaren junt ver Jerecht nämen un en äare Judenschoolen priejlen. #Apost 5,40; 2Kor 11,24 18Un jie woaren ver aunjestalde un Kjennichs jebrocht woaren, om mient haulwen, aus een Zeichnis äwa an un äwa de Velkja. #Apost 25,23; 27,24 19Wan see junt väabrinjen woaren, dan siet nich beduat doaräwa waut jie sajen sellen, wiels waut jie räden sellen, woat junt jrod dan jejäft woaren. #2Mo 4,12; Luk 12,11-12; Apost 4,8 20Wiels daut sent nich jie, dee doa räden, oba jun Voda sien Jeist, dee derch junt rät. #1Kor 2,4 21Een Brooda woat sien Brooda toom Doot veroden, un een Voda dän Sän. Kjinja woaren jäajen äare Elren oppstonen un dee toom Doot veuasoaken. #Micha 7,6 22Jie woaren om mient haulwen von aulemaun vestat woaren. Wäa oba bat aum Enj staunthauft blift, woat jerat woaren. #2Tim 2,12; Mat 24,9-13 23Wan see junt en eene Staut vefoljen, dan flicht no de aundre. Ekj saj junt de Woarheit, jie woaren en Israel nich en aule Städa jewast sennen, ea de Menschensän komen woat. #Mat 16,28; Apost 8,1 24Een Jinja steit nich bowa sien Meista un een Kjnajcht #10,24 ooda Sklow nich äwa sien Harn. #Luk 6,40; Joh 13,16; 15,20 25Fa een Jinja es daut jenuach, soo to sennen aus sien Meista, un fa een Deena, soo aus sien Har. Wan see dän Husharn haben Beelzebul jenant, wooväl mea woaren see dee, dee to sien Hus jehieren, soo nanen! #Mat 12,24
Fa wäm wie ons ferchten sellen
(Luk 12,2-9)
26Aulsoo fercht junt nich fa dee, wiels doa es nuscht toojedakjt daut nich woat opjedakjt woaren. Doa es nuscht vestoaken, daut nich woat verendach komen. #Mrk 4,22; Luk 8,17
27Waut ekj junt em diestren saj, doavon rät bie dach. Un waut junt em Ua jefuschelt woat, prädicht vom Husendak. 28Un fercht junt nich fa dee, dee dän Kjarpa doot moaken kjennen un de Seel oba nich doot moaken kjennen. Fercht junt leewa fa dän, dee Kjarpa un Seel vedoawen kaun en de Hal. #Heb 10,31; Jak 4,12 29Woaren nich twee Spoalinja fa een Zent vekoft? Un doch felt nich eent opp de Ieed onen jun Voda. 30Soogoa june Hoa opp däm Kopp sent jetalt. #Apost 27,34 31Fercht junt nich, jie sent mea wieet aus väl Spoalinja. #Mat 6,26 32Wäa mie ver de Menschen bekjant, dän woa ekj uk ver mien Voda em Himmel bekjanen. #Opb 3,5 33Oba wäa mie ver de Menschen velicht, dän woa ekj uk ver mien Voda em Himmel velieejen. #Mrk 8,38; Luk 9,26; 2Tim 2,12
Nich Fräd, oba daut Schwieet
(Luk 12,51-53; 14,26-27; 17,33)
34Jleeft nich daut ekj jekomen sie, Fräd en dise Welt to brinjen. Ekj sie nich jekomen Fräd to brinjen, oba daut Schwieet. #(34-36) Luk 12,51-53; Micha 7,6 35Ekj sie jekomen een Maun jäajen sienen Voda to saten un de Dochta jäajen äare Mutta, un de Schwieedochta jäajen äare Schwieemutta. 36Un een Mensch siene Fiend woaren ut sien ieejnet Hushault sennen. 37Wäa Voda ooda Mutta mea räakjent aus mie, un wäa Sän ooda Dochta leewa haft aus mie, es daut nich wieet eena von de mienje to sennen. #5Mo 13,7-12; 33,9; Luk 14,26-27 38Un wäa nich sien Kjriez opp sikj nemt un folcht mie no, dee es daut nich wieet eena von de mienje to sennen. #Mat 16,24-25 39Wäa sien Läwen finjt, woat daut velieren; un wäa sien Läwen om mient wellen velist, woat daut finjen. #Luk 9,24; Joh 12,25
Een Jinja sien Loon es secha
(Luk 10,16)
40Wäa junt oppnemt, nemt mie opp; un wäa mie oppnemt, nemt dän opp, dee mie jeschekjt haft. #Luk 9,48; Joh 13,20; Gal 4,14 41Wäa een Profeet oppnemt, wiels hee een Profeet es, woat een Profeeten Loon kjrieen. Un wäa een jerajchten Mensch oppnemt, wiels dee jerajcht es, woat dän selwjen Loon kjrieen aus de jerajchta. #1Kjen 17,8-24 42Un wäa eent von dise jerinjste doawäajen een Drunk koldet Wota jeft, wiels hee mien Jinja es, ekj saj junt: Dee woat secha sien Loon kjrieen. #Mat 25,40; Mrk 9,41
Currently Selected:
Matäus 10: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.