Josua 24

Josua halpt de Israeliten en Sichem denkjen, waut Gott aules jedonen haft

1Josua roopt aule Stam von Israel to eene Vesaumlunk toop no Sichem. Hee leet aule Leida von Israel, de Hauptmana, Rechta un Aumtslied toop komen. Un see stalden sikj ver däm Harn opp. 2Un dan säd Josua to daut gaunze Volkj: Soo sajcht de Har, Israel äa Gott: June Vodasch wonden emol lang trigj aun jane Sied vom Eufrat Riefa un deenden aundre Jetta. Soo wia daut met junen Staumvoda Terach, Abraham un Nahor äaren Voda. #1Mo 11,26; 31,19; 35,2 3Oba dan hold ekj junen Staumvoda Abraham von jantsied Eufrat un leet am en daut gaunze Launt Kanaan opp un dol trakjen. Un ekj jeef am Nokomen derch sienen Sän Isaak. 4Un Isaak jeef ekj Jakob un Esau. Esau jeef ekj daut Boajlaunt Seir toom bewonen. Jakob un siene Säns trocken no Ägipten. #1Mo 32,4; 46,6 5Dan schekjt ekj Moses un Aaron un brocht de Ploagen opp Ägipten, soo aus ekj daut mank an jedonen hab, un fieed junt doa rut. #2Mo 3,10 6Un ekj fieed june Vodasch ut Ägipten rut, un jie kjeemen bat aum Mäa. Aus de Ägipta june Vodasch met äare Kaumf Woages hinjaraun juagen bat aum Schelpmäa, #2Mo 12,33.51 7schrieejen see mie aun. Un ekj leet daut diesta woaren tweschen an un de Ägipta, un leet de Walen vom Mäa äwa de Ägipta toopschlonen, soo daut see vedrunken. June Uagen haben daut jeseenen, waut ekj en Ägipten jedonen hab. Un jie haben eene lange Tiet en de Wiltnis jewont, #2Mo 14,10-31 8bat ekj junt en daut Launt von de Amorita aun de oostne Sied Jordan brocht. Un aus see jäajen junt kjamften, jeef ekj an en june Henj, soo daut jie äa Launt enneemen, un ekj venicht an ver junt. #4Mo 21,25.31 9Dan muak sikj uk Balak, Zippor sien Sän, de Kjennich von de Moabita opp, un kjamft met Israel un leet Bieleam, Beor sienen Sän, holen, om junt to veflieekjen. #4Mo 22,1-20 10Oba ekj erhieed Bieleam sien Jebäd nich. Un hee must junt jäajen sienen Wellen säajnen, un soo rad ekj junt ut siene Henj. #4Mo 23,11.20 11Dan sent jie derch däm Jordan jegonen, un no Jericho jekomen. Un uk de Enwona von Jericho kjamften jäajen junt, un soo uk de Amorita, Perisita, Kanaanita, Hetita, Girgasita, Hiwita un Jebusita; oba ekj jeef dee en june Jewault. #Jos 3,10; 6,1-21 12Ekj schekjt eenen grooten Schrakj ver junt doahan un vedreef dee ver junt, krakjt soo aus verhäa de beid Amorita Kjennichs aun de aundre Sied Jordan. Mie hab jie daut to vedanken, un nich jun Schwieet un Flizboagen! #2Mo 23,28; Jos 10,1-2 13Un ekj hab junt een Launt jejäft, wua jie junt nich om mieejen brukten, un Städa, waut jie nich jebut haben. Jie wonen doabennen un äten von de Wiengoades un de Oliewenbeem, waut jie nich jeplaunt haben. #5Mo 6,10-11

Josua lat daut Volkj entscheiden

14Doawäajen doot nu däm Harn ferchten un am tru un opprechtich deenen un trant junt von aule Jetta, waut june Vodasch aun jantsied vom Eufrat un en Ägipten jedeent haben, un deent däm Harn! #2Mo 32,1-6; Jos 24,2 15Jefelt junt daut oba nich, däm Harn to deenen, dan wält junt vondoag, wäm jie deenen wellen: De Jetta waut june Vodasch aun jantsied vom Eufrat jedeent haben, ooda de Amorita äare Jetta, en dee äa Launt jie wonen. Ekj oba, un dee waut to mien Hus jehieren, wellen däm Harn deenen. #5Mo 6,13-14

16Dan auntwuad daut Volkj un säd: Daut saul wiet von ons wajch bliewen, daut wie dän Harn veloten un aundre Jetta deenen! 17Wiels de Har, ons Gott, haft ons un onse Vodasch ut de Sklowarie en Ägipten rutjefieet, un haft de groote Wunda ver onse Uagen jedonen. Hee haft ons beschizt opp dän gaunzen Wajch, dän wie jegonen sent, derch Jäajenden von framde Velkja, wua wie derchreisden. 18Un hee haft aule Velkja ver ons vedräwen, uk de Amorita, waut verhäa en dit Launt wonden. Doawäajen well wie uk däm Harn deenen, wiels hee es ons Gott!

19Josua säd to daut Volkj: Jie sent daut nich emstaunt däm Harn to deenen, wiels hee es een Gott, dee derch un derch heilich es, un sikj en siene Leew gaunz fa junt hanjeft un uk eene gaunze Leew von junt velangt, un junt june Äwaträdungen un Sinden nich vejäwen woat. #2Mo 20,5; 5Mo 29,3 20Wan jie am veloten un aundre Jetta deenen, dan woat hee junt nich mea goodet doonen soo aus bat nu, dan woat hee sikj von junt wajchdreien un junt ploagen un utroden. 21Daut Volkj auntwuad Josua: Wie wellen doch däm Harn deenen!

22Dan säd Josua to daut Volkj: Jie sent jäajen junt selfst Zeijen, daut jie junt däm Harn jewält haben, om am to deenen. Un see säden: Wie sent Zeijen! 23Dan riemt nu de framde Jetta opp, waut jie noch bie junt haben! säd Josua. Un dreit jun Hoat gaunz no däm Harn, Israel äaren Gott! #1Mo 35,2 24Dan auntwuad daut Volkj: Wie wellen däm Harn, onsen Gott, deenen un siene Wieed jehorchen.

25Aun däm Dach schloot Josua eenen Bunt fa daut Volkj un läd an en Sichem Jesazen un Rajchtsordnungen väa. #2Kjen 23,3 26Un Josua schreef dit aula en daut Jesazbuak von Gott opp. Dan neem hee eenen grooten Steen un stald däm doa opp unja däm Ieekjenboom bie däm Harn sien Heilichtum, #1Mo 35,4; Rech 9,6 27un säd to daut Volkj: Kjikjt, dis Steen steit aus Zeij jäajen ons, wiels hee aules jehieet haft, waut de Har vondoag to ons jerät haft. Hee saul junt aun aules denkjenhalpen, om daut jie junen Gott nich ontru woaren. #1Mo 31,48; Jos 22,27 28Dan leet Josua daut Volkj gonen, un een jiedra jinkj trigj no sien Oafgoot.

Josua un Eleasar storwen un worden begroft, un uk Josef siene Knoakes worden begroft

29Eene Tietlank no dit, storf Josua, Nun sien Sän, däm Harn sien Deena. Hee wia 110 Joa oolt jeworden. #4Mo 27,18-23 30Un see begrowden am opp sien Oafgoot en Timnat Serach, waut opp daut Boajlaunt en Efraim licht, vom Boajch Gaasch nom Nuaden. #Jos 19,50 31Un soo lang aus Josua läwd deenden de Israeliten däm Harn, un uk no sienen Doot, soo lang aus de Leida läwden waut aules meterläft hauden, waut de Har fa Israel jedonen haud. #Rech 2,7

32Josef siene Knoakes, waut de Israeliten ut Ägipten metjebrocht hauden, begrowden see en Sichem opp daut Stekj Launt, waut Jakob von Hamor siene Säns, dän Voda von Sichem, fa 100 Goltstekja jekoft haud un to daut Oafgoot von Josef siene Nokomen jehieed. #1Mo 33,19; 50,25 33Uk Aaron sien Sän Eleasar storf, un see begrowden am en Gibea, eene Staut opp daut Boajlaunt en Efraim, waut sienen Sän Pinhas wia aus Wonplauz toojedeelt worden. #5Mo 10,6

Currently Selected:

Josua 24: PB

Highlight

Copy

Compare