Rechta 1
1
De Stam Juda un Simeon nämen äa Launt en
1No Josua sienen Doot fruagen de Israeliten däm Harn: Wäa saul von ons veropp gonen, om jäajen de Kanaanita to kjriejen? #(1 un 2) 1Mo 49,8; Rech 18,5; 20,18; 2Mo 28,30; 4Mo 27,21 2Un de Har säd: De Staum Juda! Ekj hab daut Launt en siene Jewault jejäft. 3Dan säden de Mana von däm Staum Juda to dee von äaren Broodastaum Simeon: Komt met ons met un halpt ons, ons Oafgoot entonämen. Dan well wie junt nohäa uk halpen, jun Oafgoot entonämen. Soo schloot de Staum Simeon sikj däm Staum Juda aun. 4Aus Juda dan loosjinkj, jeef de Har de Kanaanita un Perisita en äare Macht, un see besiejden bie de Staut Besek een Häa von 10.000 Mana. 5Un see fungen bie Besek uk dän Kjennich Adoni Besek un kjamften jäajen am, un de Kanaanita un Perisita worden besiecht. 6Adoni Besek oba vesocht sikj wajch to brinjen, un see juagen am hinjaraun. Un aus see am jejräpen hauden, hakten see am de Dumes un de groote Teeen auf. 7Dan säd Adoni Besek: 70 Kjennichs met aufjehakte Dumes un Teeen musten sikj unja mienen Desch Brocken oppläsen. Soo aus ekj daut jedonen hab, soo haft Gott mie daut trigjetolt. Un see brochten am no Jerusalem, wua hee storf. 8Oba de Mana von Juda jreepen uk Jerusalem aun un neemen daut en. See muaken de Enwona met Schwieed doot, un deeden de Staut vebrennen. #Rech 1,21
9No däm jinjen de Mana von Juda, om jäajen de Kanaanita to kjamfen, waut opp daut Boajlaunt, un daut Launt em Sieden un opp daut onjlikje Launt em Wasten wonden. #Jos 10,40; 11,16-20 10See kjamften jäajen de kanaanitische Enwona von de Staut Hebron, waut frieejoa Kirjat Arba heet, un besiejden Scheschai, Ahiman un Talmai. #(10-15) Jos 15,13-19 11Von doa jinjen see jäajen de Enwona von Debir. Debir heet frieejoa Kirjat Sefer. 12Dan säd Kaleb: Wäa Kirjat Sefer dolschleit un ennemt, däm well ekj miene Dochta Achsa to Fru jäwen. #Jos 15,16 13Dan neem Kaleb sien jinjra Brooda Otniel, Kenas sien Sän, de Staut en. Un Kaleb jeef am siene Dochta Achsa to Fru. 14Un daut neem sikj soo rom, aus see no am kjeem, daut hee ar beräden deed, von äaren Voda een Stekj Launt to fodren. Un see stieech vom Äsel rauf. Dan fruach Kaleb ar: Waut west du? 15Un see säd to am: Säajen mie met een Jeschenkj. Du hast mie no daut drieeje Siedlaunt jejäft; jeff mie uk Wotakjwalen! Dan jeef Kaleb ar de bowaschte uk de unjaschte Kjwalen.
16De Kenita, de Staumbreeda von Moses sienen Schwieevoda, wieren met de Mana von Juda ut de Paulm Staut metjekomen. See trocken en de Wiltnis von Juda, waut em Sieden von Arad licht, un siedelden doa aun. Uk de Amalekita kjeemen doahan un wonden bie an. #4Mo 10,29; Jos 12,14; Rech 4,11
17De Mana von Juda un Simeon jinjen wieda un besiejden de Kanaanita, waut en Zefat wonden, un fieeden aun an dän Baun derch un nanden de Staut Horma. #5Mo 20,12-18 18De Städa Gaza, Aschkelon un Ekron, met de Jäajenden waut doatoo jehieeden, neemen de Mana von Juda oba nich en. 19Wiels de Har an biestunt, kunnen see daut Boajlaunt ennämen, oba de Bewona von de jlikje Stapen kunnen see nich vedriewen, wiels dee iesane Kaumf Woages hauden. 20De Staut Hebron wort Kaleb jejäft, soo aus Moses daut aunjeordnet haud, un Kaleb dreef Anak siene dree Säns doarut. #Jos 14,6-15
21Benjamin oba vedreef de Jebusita nich, waut en Jerusalem wonden. Doawäajen bleewen de Jebusita doa un sent doa noch bat disen Dach bie de Benjaminita en Jerusalem. #Jos 15,63; 18,28; Rech 1,8
De Nuadstam nämen äa Oafgoot en
22Uk de Mana ut de Stam von Josef jinjen opp daut Boajlaunt no Betel, un de Har wia met an. 23Un see leeten Betel, waut frieejoa Lus heet, goot utforschen. #1Mo 28,19; Jos 12,16 24De Spionen sagen eenen Maun, waut jrod ut de Staut kjeem, un säden to am: Wies ons, woo wie en de Staut nenkomen kjennen, dan woa wie die goot behaundlen. 25Un hee wees an, woo see en de Staut nenkomen kunnen, un see neemen de Staut en un schluagen de Enwona met Schwieet doot. Oba dän Maun un siene gaunze Famielje leeten see gonen. #Jos 6,25 26De Maun trock dan en de Hetita äa Launt un bud doa eene Staut un nand dee Lus. Un dee heet vondoag noch soo.
27De Staum Manasse oba kunn de Enwona von de Städa Bet Schean, Taanach, Dor, Jibleam un Megiddo, met de Siedlungen doarom, nich vedriewen. Un soo bleewen de Kanaanita doa em Launt wonen. #Jos 17,11-13 28Aus de Israeliten stoakja worden, muaken see de Kanaanita to Sklowen, dreewen dee oba nich ut daut Launt rut. 29Uk de Staum Efraim vedreef de Kanaanita nich, waut en Gesser wonden. Soo wonden de Kanaanita en Gesser medden mank an. #Jos 16,10
30Uk de Staum Sebulon vedreef de Enwona von Kitron un Nahalol nich. Dee bleewen doa wonen un worden nohäa to Sklowenoabeit jedwungen. #Jos 19,15 31De Staum Asser vedreef de Enwona von Ako un Sidon nich, uk nich de Lied waut en Mahaleb, Achsib, Helba, Afek un Rehob wonden. 32Doawäajen läwden de Lied von Asser medden mank de Kanaanita, waut doa jebläwen wieren. Un see vedreewen dee nich.
33De Staum Naftali vedreef de Enwona von Bet Schemesch un Bet Anat nich, un wonden medden mank de Kanaanita, waut em Launt wonden. Oba dee von Bet Schemesch un Bet Anat worden to Sklowenoabeit jedwungen. #Jos 19,38
34De Amorita drenjden däm Staum Dan opp daut Boajlaunt nopp, un leeten daut nich too, daut see opp daut jlikje Launt nopp kjeemen. 35Un de Amorita bleewen opp daut Boajlaunt Heres, en Ajalon un en Schaalbim wonen. Oba see worden von Josef siene Nokomen sooväl unjadrekjt, daut see an deenen musten. #Jos 19,42
36De Amorita äa Launt rieekjt aun de Edomita äat naun. De Jrens jeit von däm Skorpionen Stich no Sela un dan wieda en de Rechtunk.
Currently Selected:
Rechta 1: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
