Josua 23
23
Josua siene Aufscheetsräd
1Eene lange Tiet no däm, aus de Har Israel ver aul äare Fiend runtom een rujet Läwen veschauft haud, un Josua sea oolt jeworden wia, #Jos 21,44 2roopt hee gaunz Israel toop, de Leida, de Hauptmana, de Rechta un Aumtslied un säd to an: Ekj sie sea oolt jeworden, 3un jie haben aules jeseenen, waut de Har, jun Gott, met aul dise Velkja ver june Uagen jedonen haft. De Har, jun Gott, haft selfst fa junt jekjamft. 4Nu horcht, ekj hab junt dise noch äwajebläwne Velkja toojedeelt, jieda Staum sien Oafgoot, un daut Launt von aule Velkja, waut ekj utjerot hab vom Jordan bat aun daut Meddelmäa em Wasten. 5Un de Har, jun Gott, woat dee ver junt vesteeten un ut daut Launt rut driewen, un jie woaren äa Launt ennämen, soo aus de Har, jun Gott, daut vesproaken haft. 6Lot junt en Tookunft derch nuscht doavon aufbrinjen, aules to befoljen, waut Moses em Jesazbuak oppjeschräwen haft. Recht junt jeneiw doano un dreit nich auf, nich rajchtsch uk nich linkjsch. #5Mo 5,29 7Hoolt junt trigj von de framde Velkja, waut noch biesied junt em Launt läwen. Doot de Nomes von äare Jetta nich utspräakjen, un nich bie dee schwieren. Brinjt dee kjeene Opfa un bät dee nich aun. #2Mo 23,13.24 8Hoolt junt tru aun däm Harn, junen Gott, soo aus jie daut bat nu jedonen haben! 9De Har haft ver junt groote un stoakje Velkja vedräwen; bat vondoag haft kjeena jäajen junt stonen kunt. #(9 un 10) 3Mo 26,7-8; 5Mo 28,7 10Eena von junt kunn 1.000 Fiend vejoagen, wiels de Har, jun Gott, fa junt kjamft, soo aus hee daut vesproaken haud. 11Uk en Tookunft henjt jun Läwen doavon auf, auf jie auleen däm Harn, junen Gott, leewen. #5Mo 6,5 12Wan jie junt woaren von am wajchdreien un met dise Velkja, waut noch äwajebläwen sent, woaren Jemeenschoft fläajen un derch eenaunda befrieen un vemischen, 13dan sell jie weeten, daut de Har, jun Gott, dise Velkja nich mea aula ver junt vedriewen woat. Dee woaren fa junt dan soo jefäadlich woaren aus eene oppjestalde Schlenj ooda een Nat om waut to jriepen, un junt soone Weedoag aundoonen aus eene Pitsch opp junen Rigjen un Spekjasch en june Uagen, bat jie utjerot sent ut daut goode Launt, waut de Har, jun Gott, junt jejäft haft. #4Mo 33,55; 5Mo 7,16; Rech 2,3
14Jie seenen, daut miene Tiet aufjerant es. Nu moakt junt daut kloa un präacht junt daut em Hoat en, daut de Har, jun Gott, aules waut hee vesproaken haft enjehoolen haft. Nuscht es utjebläwen von aul daut goode, waut hee junt vesproaken haud; daut es aula soo jekomen. #Jos 21,45 15Oba krakjt soo, aus aul daut goode jekomen es, waut de Har junt vesproaken haud, soo woat de Har uk aul daut schlajchte, wuamet hee junt jedreift haft, äwa junt komen loten bat hee junt ut dit goode Launt utjerot haft, waut de Har, jun Gott, junt jejäft haft. #(15 un 16) 5Mo 28,15-47 16Wan jie däm Bunt äwaträden woaren, dän de Har, jun Gott, met junt jeschloten haft, un aundre Jetta deenen un aunbäden woaren, dan woat däm Harn sien brennenda Oaja junt trafen, un jie woaren boolt utjerot sennen ut daut goode Launt, waut hee junt jejäft haft.
Currently Selected:
Josua 23: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
