Hiob 41
41
Woo groot mott dee sennen dee aules jemoakt haft?
1(Un de Har säd wieda:)
Eena mott toostonen, daut wäa Leviatan jeseenen haft,
weet sikj nich met däm un mott oppjäwen.
2Kjeena es soo stoakj, daut dee sikj woacht däm opptojoagen.
Wäa kunn dan noch jäajen mie bestonen?
3Wäa woat heel doavon komen, wan hee jäajen mie jeit?
Soont jeft daut nich unjarem Himmel.
4Ekj saj noch mea von woo groot Leviatan es,
woo stoakj un jeschekjt dee es.
5Wäa kaun am sien Lada auftrakjen,
met waut kaust derch siene dobbelde Schal derch?
6Wäa kaun däm siene Frät opmoaken?
Jieda Tän es toom enjsten;
7dee stonen aus eene stolte Rieej Schilten,
waut faust aun eenaunda vebungen sent.
8Dee sent soo dicht aun eenaunda,
daut doa kjeene Loft tweschen jeit;
9dee sent dicht un foten sikj toop,
daut dee nich gonen uteneen to bräakjen.
10Wan dee prust, blenkjat daut met Licht,
un siene Uagen sent soo root aus de Sonn Oppgank.
11Daut flaumt ut sien Mul rut,
un Funken spretzen tosied.
12Ut siene Näs rieekjat daut,
aus von een Struck Fia unja een Gropen;
13dee stekjt een Kolenfia aun met sien Odem,
un von sien Hauls pralen de Flaumen.
14Sien Jenekj es sea stoakj,
wäa ver am kjemt, flautat en Forcht;
15sien Panz es faust un jeft sikj nich,
dee es hoat aus jegotnet Guss.
16Sien Hoat es soo hoat aus Steen,
un soo faust aus de unjaschta Molsteen.
17De stoakjste enjst daut wan dee sikj aunrecht;
wan dee kracht, sent see gaunz met Forcht benomen.
18Kjeen Schwieet ooda Spies,
kjeene Schmietstang ooda Feil
moaken Schoden un Wunden aun am.
19Fa däm es Iesa soo aus Stroo,
un Brons aus vefuldet Holt.
20Dee brukt sikj fa kjeene Feil enjsten,
un Schleidasteena kjitlen am aus Sprie.
21Een Kjneppel schot am nich mea aus een Stroohaulm,
un de Schmietstangen lacht hee bloos ut.
22Sien Panz es met Schoawels bedakjt,
un hee schlapt sikj derch daut Blott,
aus eenen Drasch Schläden.
23Wan hee em Wota romweelt,
lat daut Mäa aus wan daut koakt,
ooda soo aus eene Komm voll Taulch un Lei.
24Hinja am schumt daut noch witt,
aus een Kopp voll selwanet Hoa.
25Doa es doch kjeen aundret Tia
oppe Ieed soo gaunz onen Forcht.
26Hee kjikjt aulem em Uag, uk de huage,
hee es de Kjennich äwa aule stolte Tieren.
Currently Selected:
Hiob 41: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
