Hiob 42

Hiob prachat auf un finjt sikj en Gott siene Jnod

1Un Hiob säd to däm Harn:

2Ekj bekjan, daut du aules kaust;

die es nuscht ommäajlich, wan du waut plonst.

3Du fruachst wäa ekj jleewd daut du wieescht,

daut ekj dien Väahaben en Froag stald.

Nu weet ekj daut ekj von waut räd,

von waut ekj nuscht wist,

waut huaget, waut ekj nich vestunt. #Hiob 38,2

4Du sätst ekj sull stell sennen un horchen,

un auntwuaten opp daut, waut du fruachst. #Hiob 38,3

5Ekj wist von die bloos, waut ekj jehieet haud,

oba nu hab ekj die selfst to seenen jekjräajen; #Hiob 19,26-27

6un doaderch bekjan ekj, woo schuldich ekj sie,

un pracha en Ieed un Ausch auf.

7Aus de Har derch wia met aul dit to Hiob räden, dan dreid hee sikj no Elifas un säd: Ekj sie sea vestalt äwa die un diene twee Frind, wiels jie nich daut rajchte von mie jesajcht haben, soo aus Hiob, dee mie deent. 8Nu well ekj haben daut jie säwen junge Bolles un säwen Bakj no Hiob, dee mie deent, brinjen, un een Brauntopfa moaken fa junt selfst. Un mien Deena Hiob saul fa junt bäden, un ekj woa sien Jebäd aunnämen, un nich met junt vehaundlen, doano aus jie onbedocht vedeent haben. Jie haben nich daut rajchte jesajcht von mie, soo aus Hiob, dee mie deent. #1Chr 15,26; Hes 14,14 9Un Elifas von Teman, Bildad von Schuach un Zofar von Naama jinjen un deeden waut de Har an jesajcht haud, un Hiob bäd fa siene dree Frind un dan doaropp jeef de Har an Jnod.

10Dan leet de Har Hiob daut wada bäta gonen. De Har jeef Hiob tweemol soo väl aus hee verhäa jehaut haud. #Hiob 1,3; 8,7 11Un aul siene Breeda un Sestren kjeemen no am, un uk aul dee, dee am ea jekjant hauden. Un see eeten toop met am en sien Hus un weesen äa Metleet un see treesten am äwa aul dän Schoden dän de Har haud äwa am komen loten. Un een jiedra jeef am een Stekj Selwa un eenen goldnen Rinkj. #Hiob 19,13-14.19 12De Har jeef Hiob dan noch eenen jratren Säajen aus hee verhäa haud. Hiob kjrieech 14.000 Schop, 6.000 Kameelen, 1.000 Poa Ossen, un 1.000 Äsels. 13Hiob haud dan uk noch säwen Säns un dree Dajchta. #Hiob 1,2 14De ieeschte Dochta jeef hee dän Nomen Jemima, de tweede Kezia, un de dredde Keren Hapuch. 15Doa wieren kjeene aundre Frues en de gaunze Jäajent, waut soo schmock leeten aus Hiob siene Dajchta, un äa Voda jeef an jieda waut Oafgoot met de Säns toop. #4Mo 27,8-11

16Hiob läwd dan noch 140 Joa, un kjrieech Kjinja, Grootkjinja, un Uagrootkjinja to seenen. #Psa 90,10 17Un aus Hiob storf haud hee een langet scheenet Läwen jehaut. #1Mo 25,8; 35,29; 1Chr 29,28

Currently Selected:

Hiob 42: PB

Highlight

Copy

Compare