Hiob 40
40
1Dan fruach de Har Hiob:
2West du däm, dee aule Macht haft, väasajen?
Mucht dee, wäa Gott trajchtstalen well, auntwuaten. #Jes 45,9
3Un Hiob säd to däm Harn:
4Waut saul ekj sajen?
Kjikj woo weinich daut met mie es.
Ekj woa miene Haunt äwa daut Mul hoolen. #1Mo 32,11; Spr 30,32; Jes 6,5
5Ekj hab meamol waut jesajcht, oba woa nuscht mea auntwuaten;
ekj hab too väl jerät un woa nu stell sennen.
6Dan räd de Har to Hiob von em Wintkjriesel:
7Vehool die aus een Maun
un horch emol no mie;
ekj hab Froagen fa die,
un du saust mie emol sajen. #Hiob 38,3
8Sajchst du, daut ekj nich rajcht recht?
Sajchst du, du best rajcht un ekj sie orrajcht?
9Best du soo stoakj aus ekj sie?
Kaun diene Stemm rumlen soo aus ekj?
10Stal diene groosoatje Pracht väa
un bewies diene Macht,
lot seenen, woo harlich du best,
un waut von aunseenen du hast.
11Lot dienen Oaja frie ranen,
kjikj rauf opp dee, dee sikj waut meenen,
un brinj dee een poa Tanken läaja.
12Stal die äwa de huachmootje, steet dee rauf,
un vetraumpel de gottloose oppe Städ.
13Veschoaw dee aula enne Ieed,
un vestäakj äare Jesechta, wua see nich to seenen sent.
14Dan woa soogoa ekj die Aunerkjanunk jäwen,
daut du die met diene Krauft jerat hast.
15See die emol dän Behemot aun,
ekj hab beides, däm uk die, jemoakt;
dee frat Graus aus een Rint.
16Oba waut vonne Krauft es en däm siene Schinkjes,
un woo stoakj es däm sien Panz?
17Sien Zoagel es soo stoakj aus een Zeedaboom,
un de Sänen en siene Schinkjes sent faust toopjeflajcht.
18Siene Knoakes sent soo stoakj aus Brons Ruaren,
un siene Been aus Iesastangen.
19Daut Tia es eene Utnom mank daut waut Gott jemoakt haft,
un bloos dee, dee am jemoakt haft, kaun däm bandjen.
20Opp de Boaj waust Graus fa däm toom fräten,
un aule wille Tieren spälen doa rom.
21Dee licht mank daut Spekja Krut,
un vestakjt sikj mank de Wieden em Somp.
22Daut Spekjakrut un de Wieden
jäwen däm Schauten bie däm Riefa.
23Dee haft nich angst fa eenen willen Stroom,
un es ruich, wan de Jordan äwa siene Frät pralt.
24Wäa kaun däm jlikjtoo aunjriepen,
ooda eenen Strank derch siene Näs trakjen?
25Kaust du Leviatan met eenen Fesch Hoaken jriepen,
ooda siene Tung met eene Schlenj dolhoolen? #Psa 74,14
26Kaust du däm een Strank derch de Näs trakjen,
ooda met een Hoaken daut Unjamul hoolen?
27Jleefst, dee woat die no Jnod prachren,
ooda fein to die räden?
28Woat dee jeemols een Bunt met die schluten,
un die deenen soo lang aus dee läft?
29Kaust met däm spälen aus met een Voagel,
ooda aun een Strank, diene Mejales jäwen toom spälen?
30Woaren de Fescha äwa dän strieden,
wooväl een jiedra fa dän kjrieen sull,
ooda woat de Haundelsmaun dän schlachten?
31Kaust du siene Hut met Spiessen volstäakjen,
ooda sienen Kopp met een Waulfesch Hoaken anglen?
32Wan du däm eemol aunjripst,
woascht du daut behoolen,
un nienich wada doonen.
Currently Selected:
Hiob 40: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
