Hiob 38
38
Väl Froagen dee Hiob nich auntwuaten kunn
1Un ut daut Owwada kjrieech Hiob dise Auntwuat von Gott. #Hiob 31,35
2Wäa jleefst du daut du best,
daut du mien Väahaben en Froag stalst
met Wieed, dee nuscht enhoolen? #Hiob 34,35
3Vehool die aus een Maun
un horch emol no mie;
ekj hab Froagen fa die,
un du saust mie dee auntwuaten. #Hiob 40,7
4Wua wieescht du aus ekj de Grunt läd fa de Ieed?
Saj mie daut, wan du soo väl weetst.
5Wäa plond woo groot dee sull sennen,
un wäa trock doa dän Motbaunt äwa?
Es doa wua waut, waut du nich weetst? #Spr 30,4
6No waut wort nojegroft, dän Foot to saten,
ooda wäa sad dän Akjsteen,
7aus de Morjenstierns toop sungen,
un aule himlische Deena mie lowden? #Hiob 1,6; Psa 19,2
8Wäa hilt väa un sad de Jrensen,
aus daut Mäa oppe Ieed väabruak? #(8-11) Psa 104,8-9; Spr 8,29
9Wäa bedakjt daut met Wolkjen aus een Kjleetje,
un trock dän dunklen Näwel doarom aus eene Winjel?
10Wäa sad de Jrens fa daut Mäa,
aus wan doa eene Däa un een Baulkjen jesat worden?
11Wäa säd: “Bat hia un nich wieda.
Hia motten diene stolte Walen sikj dolen.”
12Hast du aul eemol en dien Läwen,
daut Morjenroot väajekroacht,
ooda am siene Städ väajesajcht,
13soo daut jieda Akj oppe Ieed oppjedacht worden,
un de beese doa rut jejoacht worden?
14Hast du daut Jeschekj von de Ieed loten väakomen aus ut eene Form,
un de Kalieren kloa woaren aus aun een Kjleet?
15Daut Licht, waut de gottloose jefelt, woat an jenomen,
un äare Macht em diestren woat vedorwen.
16Best du jewast, wua daut Wota unjen em Mäa nenkjwalt,
ooda hast du dän Boddem vom Mäa nojesocht?
17Hast du de Däaren jeseenen,
hinja woone de diestre Welt von de Vestorwne es?
18Weetst du woo groot de Ieed es?
Saj mie daut, wan du daut weetst.
19Opp woonen Wajch woascht du de Städ finjen,
wua daut Licht häakjemt,
un wua kjemt daut diestre häa,
20soo daut du wurscht dän Wajch weeten,
un dee kjennen trigj no äare Städen leiden?
21Du woascht daut dochwoll weeten,
du deist je aus wan du soo oolt best,
un don aul doa wieescht.
22Best du en dän Spikja jewast wua de Schnee häakjemt,
ooda hast du jeseenen wua de Hoagel häakjemt, #(22 un 23) Jos 10,11; Jes 30,30
23dee ekj fa dan oppbewoat hab wan daut schwoa jeit,
un fa de Tiet wan de Kjrich un de Kaumf komen.
24Opp woonen Wajch kjemt eena no de Städ,
wua de Blitz jeschmäten woat,
un wua de Oostwint äwa de Welt vespreet woat?
25Wäa haft de Ranen jemoakt,
daut de Plauzräajen aufranen kaun;
un dän Wajch jemoakt fa dän Jewitta, #Hiob 28,26
26daut de Räajen doahan kjemt, wua kjeena wont,
un enne Wiltnis, wua kjeen Mensch jeit;
27un soo daut de Wiltnis tofräd es,
un daut Graus ut de Ieed kjemt?
28Doa haft doch kjeen Voda waut jedonen
daut de Räajen un Deiw oppkomen.
29Haft eene Mutta Ies to Welt jebrocht
ooda de Ieed bedeift,
30soo daut daut Wota hoat woat aus Steen,
un aules äwajefroaren es?
31Kaust du daut Säwenstiern toopbinjen to eent,
ooda Orion sienen Mauntel opmoaken? #Hiob 9,9
32Kaust du de Stierns no de Rieej loten oppkomen,
un daut kjliene un daut groote Schapkje äare Tieden saten?
33Vesteist du woo de Sonn, Mon un Stierns äare Ordnunk haben,
un kaust du bestemmen, waut dee oppe Ieed doonen? #Jer 33,25
34Kaust du met diene Stemm de Wolkjen väasajen,
soo daut et sea opp die räajent?
35Kaust du dän Blitz rauf schekjen,
soo daut dee die deenen kaun?
36Wäa vesteit de Wolkjen to rejieren,
un wäa weet wuarom daut deiwen deit?
37Wäa es soo kluak, daut hee sajen kaun woo väl Wolkjen doa sent,
un wäa kaun dän Räajen oppe Ieed jeeten,
38soo daut de Ieed een glauta Boddem woat,
un de Blott Kjlieta toopbaken?
Froagen äwa de Tieren Welt
39Kaust du Tieren brinjen, daut de Leiw fräten kaun,
un daut de junge Leiws sikj saut fräten,
40wan dee sikj en äare Heelen vekrupen,
ooda dee sikj en äare Nasta vestäakjen?
41Wäa jeft de Kraujen to fräten,
wan dee fa Hunga romstolpren
un äare junge no Gott roopen no mea Fooda? #Psa 147,9
Currently Selected:
Hiob 38: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
