Hiob 37
37
1Soon Owwada brinjt mie toom zetren,
un mien Hoatje schleit gaunz wilt.
2Horcht doch, woo daut rummelt,
un waut fa Jewitta Schläaj ut sien Mul rutkomen.
3Sien Blitz strolt derch dän gaunzen Himmel,
un bedacht de Ieed bat aule Kaunten;
4un dan kracht siene Stemm,
un enjstlich grolt daut Jewitta;
un ea de Schaul vejeit
lat hee dän Blitz wada loos.
5Waut Gott em Jewitta deit,
brinjt staunen un es groff;
daut es groosoatich
un nich to bejriepen fa ons.
6Hee sajcht toom Schnee: “Nu faul!”,
un to däm Plauzräajen: “Lot daut jeeten,”
7daut aule Oabeit opphieet,
un Gott sien Woakj aunerkjant woat.
8De wille Tieren vestäakjen sikj,
un lajen sikj en äare Nasta. #Psa 104,21-22
9De Storm brakjt ut sienen Spikja rut,
un de Kold drenjt derch vom Nuaden.
10Met Gott sienen Odem kjemt Ies,
daut breede Wota es gaunz äwajefroaren.
11Hee moakt eene schwoare Dakj von Nauts,
un schmitt dän Blitz ut de Wolkjen.
12Gott leit de Wolkjen aulawäajen,
dee dreien krakjt no sienen Plon,
aulawäajen oppe Ieed,
13emol strofen see daut Launt,
emol säajnen dee met truhoatje Leew.
14Horch die dit aun, Hiob,
un moakj die Gott siene Wunda.
15Vesteist du woo Gott daut rejieet,
un Blitz strolen lat von de Wolkjen?
16Weetst du waut de Wolkjen helt,
een Wunda von däm, dee aules weet?
17Wan de Hett vom Siedwint kjemt,
kaust du bloos stell em Schweet luaren.
18Kaust du, soo aus hee, de Dakj von Wolkjen,
soo aus eenen Spieejel, äwa ons utspreeden?
19Kaust du ons lieren, waut wie Gott sellen sajen?
Wie putren onweetent em diestren rom.
20Sull ekj met Gott wellen räden?
Wudd hee mie nich vedoawen?
21Noch mau jrod wia de Himmel dunkel,
oba aus de Wint oppkjeem, dacht daut opp,
soo daut eena daut nu nich aunkjikjen kaun.
22Vom Nuaden dacht daut aus Golt,
daut es toom staunen un harlich rom Gott.
23Daut es nich mäajlich, dicht aun Gott naun to komen,
dee soo groosoatich, stoakj un jerajcht es;
hee es jerajcht un deit aules rajcht.
24Doawäajen haben Menschen Forcht fa am;
dee waut sikj kluak jleewen, veacht hee.
Currently Selected:
Hiob 37: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
