Hiob 31
31
1Ekj hab daut met miene Uagen faust berät,
daut ekj nich no onbefriede Mejales kjikj. #Mat 5,28-29
2Opp waut kaun ekj von Gott räakjnen?
Waut woat dee, dee aule Macht haft, mie tookomen loten?
3Schekjt hee nich sien vedoawen opp de Sinda,
un Onheil opp dee waut orrajcht doonen?
4Sitt hee nich jieda Wajch dän ekj go?
Un talt hee nich jieda Schrett dän ekj näm? #Hiob 23,10
5Wan ekj faulsch jehaundelt hab,
un wäm haustich beschummelt hab,
6dan lot Gott mie opp eene Wichtschol,
dee rajcht wiest, aufwäajen,
soo daut hee secha weet daut ekj em rajchten sie.
7Wan ekj vom rajchten Wajch sie raufjegonen,
ooda miene Uagen mien Hoat veleit haben,
wan ekj miene Henj aun waut hab schwiensch jekjräajen,
8dan lot eenen aundren äten, waut ekj jeseit hab,
un lot waut ekj aunjefongen hab, to nuscht woaren. #3Mo 26,16
9Wan ekj mien Hoat hab loten hanrieten
von eenem aundren siene Fru,
ooda hab bie de Nobasch äare Däa jeluat,
10dan lot miene Fru fa eenen aundren Maun äten moaken,
un lot däm sikj äwa ar hankjneeen. #2Sam 12,11
11Daut wudd doch väl too groff sennen,
un sull ver eenen Rechta jebrocht woaren. #5Mo 22,22
12Ehebruch es met een Fia to vejlikjen,
daut aules bat oppe Grunt vebrent,
daut aules vedoaft waut eena haft.
13Wan ekj nich no mien Kjnajcht
ooda miene Kjäakjsche jehorcht hab,
wan dee mie wäajen waut vekloagden,
14woo wudd ekj dan waut to sajen haben,
wan Gott mie wäajen waut utforscht?
15Haft nich deeselwja dee mie jemoakt haft,
uk an em Mutta Lief waussen loten? #Spr 14,31; Mat 25,40
16Ekj hab nich trigjehoolen, waut de oame haben wullen,
un hab de Wätfrues nich vezoagen loten. #Hiob 29,12
17Ekj hab nich mien Biet auleen jejäten,
un sie emma däm Weisen jenstich jewast. #(17-20) Jes 58,7
18Ekj hab dee emma aus een Voda biejestonen,
un hab miene Mutta von kjlien opp jeholpen. #Hiob 29,16
19Ekj hab nich Kjleeda un Dakjen trigjehoolen,
von dee waut doaronen omkomen musten;
20un dee haben mie goodet jewenscht,
wan see sikj aun miene Schop Woll woamen kunnen.
21Wan ekj emol hab een Weisenkjint jewäsen,
daut hee sull wajchgonen,
wiels ekj wist daut miene Frind mie rajchtspräakjen wudden, #Rut 4,1-11
22dan lot mien Oarm jebroaken woaren,
un miene Schulla ut däm Jelenkj jebrocht woaren.
23Aundasch wudd ekj von Gott bestroft woaren,
un ekj kunn mien Jesecht nich ver am wiesen.
24Ekj hab mie nich opp Golt veloten,
ooda jedocht daut Golt mie treesten kunn. #Psa 52,9
25Ekj hab mie nich jefreit, daut ekj sea rikj wia,
un daut ekj mie väl toopjeoabeit haud.
26Ekj hab de Sonn nuscht toojeschräwen,
ooda de Mon äaren straumen Gank bewundat, #5Mo 4,19
27soo daut dee veleicht mien Hoat jelokt hauden,
un ekj miene Haunt no dee haud oppjehowen.
28Wan ekj daut haud, wia ekj schuldich ver onse Rechta to komen,
un ekj wudd Gott doamet veloagen haben.
29Ekj hab mie nich doatoo jefreit,
wan miene Fiend lieden musten,
ooda met schwoaret läwden; #Spr 24,17; Psa 7,5; 35,13-14
30ekj hab nich met mien Mul jesindicht
un an daut Läwen vewenscht. #1Pet 3,9
31Kjeena en miene Famielje kaun sajen,
daut hia wäa hungrich vom Desch jegonen es;
32ekj hab jieda framden nenjekroacht,
un an nienich buten oppe Gaus jeloten. #Rech 19,20-21; Heb 13,2; 1Pet 4,9
33Ekj hab nich, soo aus aundre,
jeprooft mie to vestäakjen, wan ekj schuldich wia.
34Ekj hab mie nich ut Angst
no daut jerecht waut de Lied säden,
un sie nich stell jewast un hab mie nich vestoaken,
wiels ekj mie fa de Lied äaren Spott enjst.
35Mucht doa doch eena sennen dee no mie horcht,
ekj unjaschriew aules waut ekj jesajcht hab.
Mucht dee, dee aule Macht haft, mie eene Auntwuat jäwen.
Ekj mucht daut kloa jeschräwen haben
met waut ekj vekloacht sie, #Hiob 23,3-7
36daut ekj daut opp miene Schulla droagen kunn,
ooda aus een Kraunz to aulem wiesen kunn.
37Ekj wudd nuscht trigjhoolen von daut waut ekj jedonen hab,
un steil ver am komen.
38Wan daut Launt, woont ekj beaka, jekloacht haft,
un de Foaren oppe Stap, eene met de aundren jehielt haben;
39wan ekj jeemols eene Arnt jenomen hab, dee ekj nich jeseit haud,
ooda de Foarma rom mie utjenuzt un bedwungen hab;
40dan lot de Distlen enne Städ vom Weit waussen,
un daut Onkrut enne Städ de Joascht.
Dit es daut Enj von daut waut Hiob säd.
Currently Selected:
Hiob 31: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
