Hiob 29
29
Woo Hiob daut verhäa jegonen haud
1Dan räd Hiob wieda un säd:
2Wan daut doch wada soo kunn sennen
aus daut emol wia, aus Gott mie Schutz jeef.
3Dan scheen siene Laump äwa mienen Kopp,
un ekj kunn met sien Licht em diestren gonen. #Psa 18,29
4Daut wia de baste Tiet en mien Läwen,
un Gott bewoakt mie aus een Frint. #Psa 25,14
5Dee, dee aule Macht haft, wia dan emma bie mie,
un miene Kjinja wieren runtom mie.
6Dan kjwitscht de Malkj opp mienen Stich,
un de Oliewenpras rand äwa bie däm Steen.
7Wan ekj dan mienen Plauz biem Stautspuat enneem,
8staupten de junge Mana tosied,
un de elre stunden ver mie opp.
9De huach aunjeseene hieeden opp met räden,
un hilden sikj de Haunt äwa daut Mul;
10soogoa de Leida vom Volkj worden stell,
un drekjten äare Tung aum Bän vom Mul.
11Wan see hieeden waut ekj säd, dan unjastetten see daut,
un wan see sagen waut ekj deed, dan nekjten see met däm Kopp,
12wiels ekj de oame utholp, wan see roopten,
un daut Weisenkjint, wäm kjeena biestunt. #2Mo 22,21-22; Hiob 31,16
13Dee waut sikj en äa lieden nich wisten,
dee wenschten mie een Säajen;
un de Wätfru kunn em Hoat wada sinjen,
wiels ekj ar jeholpen haud.
14Soo aus Menschen miene Kjleeda kjanden,
soo kjanden see mie aus eena, dee doa holp;
soo pinkjlich aus ekj Rock un Koppbinj druach,
holp ekj de Menschen to äa rajcht.
15Ekj deend aus Uagen fa de blinje,
un aus Feet fa de lome;
16ekj wia aus een Voda fa de oame,
un stunt en fa de framde, wan see Trubbel hauden. #Hiob 31,18
17Ekj bruak däm ojjerajchten sien Unjamul;
un reet, waut hee jebäten haud, ut sien Mul.
18Ekj docht ekj wudd lang läwen,
un Tus jemietlich stoawen;
19ekj wudd aus een groota Boom waussen,
met Wartlen waut wiet em Wota rieekjten,
un Bläda, waut vom Deiw kjlakjaden.
20Ekj docht ekj wudd emma fresch jeloft woaren,
un daut mien Boagen emma reed
en miene Haunt wudd sennen.
21See luaden, wan ekj waut säd, un horchten,
un wullen weeten, waut ekj roden wudd.
22Wan ekj jerät haud, wia daut stell,
waut ekj säd, saut bie an aus de Deiw.
23See luaden no mie aus no Räajen;
see wieren hinjaraun doano
aus nom loten Räajen.
24Wan ekj frintlich kjikjt, brocht an daut nieen Moot;
mien frooet Jesecht treest de bedrekjte.
25Ekj muak de Entscheidungen un leid an,
aus een Kjennich met siene Soldoten,
un eena, dee bie een Trua Troost jeft.
Currently Selected:
Hiob 29: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
