Hiob 28
28
Eena finjt kjeene Weisheit buta bie Gott
1Daut jeft Selwa Mienen
un Owes toom Golt schmelten.
2Iesa woat ut de Ieed jenomen,
un Koppa woat ut Steen jeschmolten.
3Wua daut diesta es, woat Licht jemoakt;
bat aule Enj woat em Steen jegroft,
eendoont woo enjstlich schwoat daut es.
4Wiet wajch von doa wua Menschen sent,
woat eene deepe Mien jegroft;
wua kjeen Reisenda doaraun denkjt,
schoklen dee opp Strenj wua kjeena eenen Foot hansaten kaun,
wiet auf von aundre Menschen.
5De Grunt wua bowen jeakat woat,
es unjen veweelt aus no een Fia.
6Doa finjen Menschen Safier Steen,
un mank daut Stoff un Steen es Golt.
7Kjeen Odla sitt dän Wajch enne Ieed,
nich emol de Ul sien Uag kaun daut seenen.
8Kjeen willet Tia kjant doa dän Wajch,
un Leiws sent doa nich nenjegonen.
9Daut hoatste Steen woat derchjegroft;
see dreien de Boaj schia äwakopp.
10See growen eenen Gank em Steen nenn,
un finjen, waut doa wieetvoll es.
11See damen doa daut Wota auf,
un brinjen äwadäl waut vestoaken wia.
12Doch wua finjt eena Weisheit,
un wua kjenn wie vestonen lieren?
13Mank Menschen finjt eena daut nich.
Lied weeten nich dän Wieet doavon.
14De Aufgrunt sajcht: “Weisheit es nich hia”;
un daut Mäa: “Dee es uk nich hia”.
15De Weisheit jeit fa Golt nich entotuschen;
un met Selwa es dee nich to betolen. #Spr 3,13-15
16Daut es mea wieet aus Golt von Ofir,
ooda aus daut baste Onniks un Safier.
17Vejlikj daut nich met eene goldne Wos,
un nich met dieret glausnet Straums.
18De Weisheit es väl mea wieet,
aus Kristal, Koral un Parlen.
19Nich Topas von Kusch, nich daut reinste Golt,
es soo väl wieet aus Weisheit.
20Von wua kjemt Weisheit häa?
un wua kjenn wie vestonen lieren?
21Kjeen Mensch kaun seenen wuahäa dee kjemt,
uk nich daut schneifste Voagel Uag.
22Daut Grauf un de Doodes sajen mau:
“Wie hieren, doa woat von jerät.”
23Doch Gott es daut kloa wua Weisheit licht;
hee kjant de Städ un uk dän Wajch. #(23-28) Spr 8,22-31
24Hee sitt bat daut latste oppe Ieed;
vom Himmel sitt hee aules kloa.
25Aus hee dän ieeschten Wint aufwuach,
un de Maussen von daut Wota aufmaut,
26aus hee de Räajel sad fa däm Räajen,
un daut Jewitta sienen Wajch op muak,
27don sach hee Weisheit, un proowd dee auf.
Hee stald dee doa fa aulem kloa.
28Moakj die, säd de Har toom Mensch,
wäa däm Harn ieet, dee es weis,
un wäa von beeset wajchdreit, wiest Vestentnis. #Psa 111,10; Spr 1,7
Currently Selected:
Hiob 28: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
