Hiob 24
24
Woo stroft Gott nich foakna?
1Wuarom stalt dee, dee aule Macht haft,
nich Doag aun, toom daut rajcht enfieren;
un wuarom seenen dee, dee am kjanen,
nich Tieden, wua hee sikj wiest? #Liera 3,11; 8,6
2De gottloose saten de Jrens Tieekjens wieda;
dee stälen sikj Vee un weiden daut. #5Mo 27,17
3See leiden daut Weisenkjint sien Äsel wajch,
un hoolen de Wätfru äaren Oss aus Birj;
4see steeten de oame vom Wajch,
un dee, dee schlajcht auf sent, motten sikj vekrupen.
5De oame bemieejen sikj daut see Äten finjen,
krakjt soo aus wille Äsels enne Wiltnis;
see sieekjen sikj waut, wua nuscht waust,
daut äare Kjinja to äten kjrieen.
6De oame sieekjen Fooda toop,
opp aundre äare Flekja;
see läsen Wiendruwen no,
en de gottloose äare Goades.
7Dee haben nich toom sikj enne Nacht bedakjen,
un kjeene Dakjen wan daut kolt es;
8see woaren gaunz naut vom Räajen enne Boaj,
un länen sikj aun de Steena un haben kjeen Dak.
9De beese rieten de Wätfrues äare Kjinja vom Liew,
un velangen däm oamen sien Kjint aus Birjschoft;
10see loten de oame haulf noaktich romgonen,
wiels see nich Kjleeda haben.
De oame bliewen hungrich, wan see uk Goawen droagen; #Jes 58,7
11see drekjen Oliewen un klunjen Wiendruwen ut,
oba kjrieen nuscht, wan an darscht. #Jak 5,4
12En de Staut hieet eena dee oppem Stoaw Bad stänen;
de vewunde roopen von Hoaten no Help,
doch deit Gott doa nuscht met.
13Doa sent soone waut jäajen daut Licht sträwen;
dee kjanen nich dän Wajch nom Licht,
un gonen nich doa wua dee hanfieet.
14Ea de Dach aunfangt steit de Merda opp,
un brinjt de oame un dee waut schlajcht auf sent om;
hee schowanakt enne Nacht aus een Reiba.
15De Ehebräakja luat bat daut diesta woat,
un denkjt dan woat am kjeena seenen;
hee bedakjt sikj sien Jesecht. #Psa 10,11
16Bie diesta bräakjen see en Hiesa nenn,
un bie Dach vestäakjen see sikj,
wiels see vom Licht nuscht weeten wellen.
17Wan daut diesta woat fangt äa Dach aun,
wiels see met de Angst em diestren bekaunt sent.
18Muchten de beese Menschen veschwinjen aus daut Stroo oppem Riefa,
un mucht Gott äa Launt von goot droagen hoolen,
daut kjeena no sienen Goaden kjikjen gonen mucht.
19Mucht de Doot dee wajchnämen waut sindjen,
soo aus de Hett un de drieeje Tiet daut Schneewota veschwinjen loten.
20Mucht äare ieejne Mutta von an vejäten,
un de Warm sikj to an freien;
mucht kjeena an em Denkj hoolen,
un beeset doljebroaken woaren aus Beem.
21See nutzen de Frues ut, waut nich kjennen Kjinja haben,
un sent nich jenstich to de Wätfrues.
22Gott nemt de stoakje wajch en siene Macht,
wan dee oppstonen, vetwiewlen see aum Läwen.
23Hee jeft de gottloose daut, opp waut see sikj veloten un secha sent,
un hee paust no aules opp waut dee doonen.
24Dee sent een kortet stootje huach aunjeseenen,
un dan sent see wajch;
dee vewalkjen un vedrieejen aus irjent eene Plaunt,
un woaren aufjeschnäden aus eene riepe Oa.
25Es doa wäa, dee dit nich jleeft?
Kaun wäa bewiesen daut dit nich soo es?
Currently Selected:
Hiob 24: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
