Hiob 23
23
Hiob well weeten wua Gott es
1Dan säd Hiob:
2Ekj kaun noch nich metstemmen un mott kloagen,
ekj kaun mie nich hoolen von stänen;
3wan ekj bloos wist woo hee to finjen wia,
un wua ekj no am komen kunn.
4Ekj wudd am dan mien rajcht väalajen,
un am een Mulvoll Biespels jäwen;
5un dan kunn ekj weeten, waut hee säd,
un vestonen, waut hee mie sajen well.
6Wudd hee met aul siene Krauft opp mie komen?
Nä, hee wudd leewa selfst no mie horchen?
7Dan wudd ekj,
eena däm nuscht väatoschmieten es,
mie met am unjahoolen,
un wudd opp emma friejesproaken woaren.
8Wan ekj oosten go, es hee nich doa;
go ekj wasten, dan es doa kjeene Spua von am;
9wan hee em Nuaden schauft, kjrie ekj am nich to seenen,
un wan hee em Sieden es, venäm ekj am nich. #Hiob 42,5
10Oba hee weet aules waut ekj doo;
wan hee mie derchsitt, woa ekj jlenzen aus Golt; #Psa 17,3; 139,23-24
11miene Feet staupen nich biesied sienen Stich;
ekj hab mie aun sienen Wajch jehoolen,
un hab nich tosied jestaupt.
12Waut hee mie väaschreef, hab ekj jehoolen,
waut hee jesajcht haft, oppbewoa ekj en mien Hoat.
13Gott deit krakjt waut hee well,
wäa kaun am opphoolen?
waut hee sikj väanemt, fieet hee derch.
14Hee woat doonen, waut hee fa mie jeplont haft,
un dan noch mea, soo aus hee well.
15Doawäajen fercht ekj mie ver am;
wan ekj noch mau aun am denkj,
schudat mie daut.
16Gott haft mie dieslich jemoakt;
dee, dee aule Macht haft, enjst mie,
17doch mien diestra Toostaunt,
un daut ekj nu nuscht seenen kaun,
haft mie nich stell jemoakt.
Currently Selected:
Hiob 23: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
