Hiob 21
21
De gottloose haben daut goot
1Un Hiob säd:
2Horcht no daut waut ekj saj;
opp mea Troost räakjen ekj nich von junt.
3Siet jeduldich wan ekj waut saj,
un dan kjenn jie wada wieda äwa mie spotten.
4Ekj sie je nich äwa Menschen vetwiewelt;
doa es Uasoak, wuarom ekj ojjeduldich sie.
5Kjikjt bloos woo mie daut lat, un lot junt daut gruslen;
jie sullen junt de Haunt äwa daut Mul hoolen. #Hiob 40,4
6Wan ekj stell hool un nodenkj, dan enjst ekj mie,
un mien gaunza Kjarpa tekjat.
7Wuarom läwen de gottloose jrodsoo wieda,
dee woaren oolt un kjrieen emma mea Macht? #Jer 12,1
8See derwen seenen woo äare Kjinja to waut komen,
un kjennen sikj to äare Grootkjinja freien.
9See sent secha en äa Hus un onen Angst;
see woaren nienich von Gott jeschloagen.
10Dee kjennen sikj opp äaren Boll veloten,
un de Kjieej haben aula jesunde Kjalwa.
11Äare Kjinja ranen aus de Lama un spälen;
12de Jugent sinjt wan jespält woat,
met Drommeln, Zitta un Fleeten.
13Wan see oolt woaren, haben see daut jemietlich,
un stoawen ruich un woaren begroft.
14See sajen to Gott: Lot ons toch,
wie wellen diene Wäaj nich weeten; #Hiob 22,17
15un: Wäa es Gott, daut wie siene Deena sellen sennen,
un: Waut holp ons daut, wan wie bäden wudden? #2Mo 5,2; 2Kjen 18,35; Psa 12,5; Dan 3,15
16De gottloose meenen see haben äa Jlekj selfst vedeent,
oba daut jleew ekj goanich. #Hiob 22,18
17Woo foaken woat de gottloose äa Licht utjepust?
Wanea sitst du dee Schoden lieden,
ooda daut Gott sien Oaja opp dee looslat?
18Sitt eena noch emol daut dee aus Stroo em Wint,
ooda aus Haksel em Wintkjriesel wajchjenomen woaren? #Psa 1,4
19Jie sajen, daut wan de Vodasch jesindicht haben,
dan lat Gott de Strof opp de Kjinja komen;
mucht Gott de Sinda selfst bestrofen,
soo daut dee Gott kjanen lieed. #2Mo 20,5; Hiob 20,10
20Lot an äare vedeende Strof selfst to seenen kjrieen;
lot an selfst dän Oaja, von däm dee aule Macht haft, drinkjen.
21Waut jäwen dee noch rom om äare Kjinja,
wan äare Moonaten äwa sent un see stoawen?
22Sull eena von ons kjennen Gott belieren,
wan hee Rechta äwa de hechste es? #Liera 5,7
23De Eena es jesunt un stoakj bat hee stoaft,
hee es tofräd un weet sikj;
24hee haft Amasch voll Malkj,
un sien Kjarpa es nich vedrieecht.
25De Aundra es vebettat bat hee stoaft,
un es nienich goot auf jewast.
26Oba beid ligjen, eena biesied däm aundren
enne Ieed, un de Warm krupen äwa an. #Hiob 3,18-19
27Ekj weet goot waut jie denkjen,
un waut jie junt jäajen mie väanämen.
28Jie sajen: Waut es von daut Hus jebläwen,
wua de groosoatje un de gottloose wonen?
29Hab jie nich jehieet woo de reisende vetalen,
30daut de beese Menschen veschoont un jerat woaren,
wan Gott met sien vedoawen omhäa jeit?
31Wäa sajcht an direkjt, waut see orrajcht doonen,
ooda tolt an trigj fa daut, waut see jedonen haben?
32Dee woaren fein begroft wan dee stoawen,
un de Städ woat bewoakt;
33sea väl Menschen gonen to dee äare Bejrafnise,
dee sent nich to talen, waut hinjaraun gonen;
un de Ieedkjlieta rom an sent an maklich.
34Woo saul mie daut treesten,
wan daut nuscht enhelt waut jie sajen?
Waut jie mie väaschmieten es väajejäft.
Currently Selected:
Hiob 21: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
