Hiob 18
18
Bildad rät toom tweeden mol: Gott stroft de Sind
1Dan säd Bildad von Schuach:
2Woo lang well jie no Wieed sieekjen?
Äwalajcht daut goot, un dan well wie räden.
3Wuarom woa wie aus Vee jeacht?
Jleew jie wie sent nich kluak?
4Du ritst die en dienen Oaja selfst en Stekja.
Woat de Welt wäajen die opphieren soo to ranen aus emma,
ooda de Gruntsteen von siene Städ veschwinjen?
5Gaunz secha jeit de gottloose äa Licht ut,
un de Flaum von äa Fia dacht nuscht opp; #Spr 13,9
6de Laumpen en äare Woninjen vedunklen,
un daut Licht äwa an jeit ut.
7Äare stoakje Schräd woaren kjarta,
un see faulen en äaren ieejnen Plon dol;
8see woaren met äare ieejne Feet em Nat jeschmäten,
un gonen wua see sikj faust ranen.
9Eene Faul kjricht an bie de Hak to hoolen,
un eene Schlenj holt sikj faust rom an;
10doa es een Strank ver an oppe Ieed vestoaken,
un eene Faul opp äaren Stich.
11Hee woat von jieda Sied veenjst;
de Forcht es am aun de Haken. #3Mo 26,36
12Daut Onheil sieekjt no am,
un de Schoden es reed wan hee felt.
13De Hut aun sien Kjarpa es nich jesunt,
eene schlajchte Krankheit frat aun siene Been; #4Mo 12,10-12
14hee woat ut sien jemieteljet Tus jeräten,
un enne oajchste Forcht vejoacht.
15Siene Städ es von dee bewont, waut nich siene sent,
un Schwäwelblitt woat doa utjestreit.
16Dee es soo aus een Boom,
däm unjen de Wartlen vedrieejen,
un bowen de Asta vewalkjen;
17dee woat em Launt gaunz vejäten,
un wieda rut weet kjeena waut von am.
18Dee woat utem Licht em diestren jeschowen,
un gaunz vedräwen von dise Welt.
19Dee woat kjeene Kjinja haben,
un kjeene Grootkjinja em Volkj;
doa woat kjeena von siene Famielje sennen,
toom opp siene Städ wieda oabeiden.
20De Menschen vom Wasten woat daut gruslen,
un dee em Oosten woaren stutzen,
wan sien Jerecht opp am kjemt. #Psa 37,13
21See sajen: Dit es krakjt
woo däm schlajchten Mensch daut jeit;
soo kjemt däm daut ut,
wäa Gott veacht.
Currently Selected:
Hiob 18: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
