Hiob 16
16
Waut Hiob don to Elifas säd
1Dan säd Hiob to Elifas:
2Soont hab ekj aul välmol jehieet.
Jie doonen orrajcht, soo aus jie eenem treesten.
3Es doa kjeen Enj von ladje Wieed,
ooda waut drift junt soo to räden?
4Ekj kunn uk soo räden aus jie doonen,
wan jie en miene Städ wieren.
Ekj wudd uk kjennen Wieed äwa junt oppbrinjen,
un mien Kopp äwa junt schedren. #Psa 22,8
5Ekj wudd junt stoakjen
met daut, waut ekj säd,
un junt met de Wieed treesten,
waut ekj to sajen haud.
6Wan ekj räd, jeit miene Weedoag nich wajch,
un wan ekj stell sie, velat dee mie uk nich.
7Gott haft mie aule Krauft jenomen,
hee haft aul miene Menschen wajchjenomen.
8Hee haft miene Hut gaunz foldich jemoakt,
un daut schient junt aus een Zeij jäajen mie;
ekj mott eegol seenen woo denn ekj sie,
un daut es aus een Zeij jäajen mie.
9Ekj sie von siene Veläajenheit veräten,
soo aus wan een Tia sien Raup veritt.
Hee es fientlich to mie;
hee gnorscht mie aun met siene Tänen.
Mien Fient spezt siene Uagen opp mie.
10Menschen rieten daut Mul op wäajen mie,
onveschämt schlonen see mie oppe Baken;
see komen aula toop jäajen mie.
11Gott haft mie aun de ojjerajchte äwajäft,
hee schift mie en de gottloose äare Henj nenn.
12Aules jinkj goot bie mie, un dan bruak hee mie dol;
hee kjrieech mie bie mien Jenekj to hoolen
un veschluach mie.
Hee stald mie han aus een Ziel fa siene Feilen, #Kloag 3,12
13un siene Boagesschossen stalden sikj runtom han.
Hee schneet miene Nieren op,
un haud kjeen Metlieden.
Hee vegoot mien Gaulsua oppe Ieed.
14Hee brakjt mie op, opp eene Städ no de aundre;
hee kjemt opp mie toojerant aus een Kjrieja.
15Ekj hab Sakkjleeda toopjestekjt äwa miene Hut;
un hab mie opp de Ieed jeschmäten. #1Mo 37,34
16Mien Jesecht es root un vehielt,
un miene Uagenläd sent dunkel,
17uk wan ekj nuscht orrajcht jedonen hab,
un mien Jebäd nich to mostren es.
18Hoolt daut nich vestoaken
wan ekj oschuldich stoawen mott;
mucht mien kloagen nienich stell woaren. #1Mo 4,10; Hes 24,7-8
19Horcht emol, doa es nu jrod een Zeij,
dee em Himmel fa mie ensteit;
doa es bowen eena, dee fa mie gooträden kaun. #Hiob 17,3
20Miene Frind veachten mie,
oba ekj kjikj derch miene Tronen no Gott. #(20 un 21) 1Sam 2,25
21Lot am daut rajchte doonen tweschen eenen Mensch un Gott,
soo aus tweschen twee Nobasch.
22Nu sent daut aul mau een poa Joa,
un dan go ekj doa han,
von wua ekj nich kaun trigjkomen. #Hiob 10,21
Currently Selected:
Hiob 16: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
