Jeremia 48
48
Gott sien Wuat äwa Moab
1Dit es waut de Har, dee aules rejieet, un Israel äa Gott es, äwa Moab säd:
Woo saul daut met de Staut Nebo,
soo gaunz venicht aus dee es?
Kirjatajim es beschämt un jeschloagen,
un soogoa de Schutzstäd es doljeräten.
2Moab doaf sikj nuscht mea meenen.
En Heschbon haben see dän Plon jefot
Moab entonämen, un jesajcht:
Komt, well wie een Enj met daut Launt moaken.
Un de Staut Madmen saul uk venicht;
daut Schwieet saul dee vejoagen.
3Hia jie, woo see en Horonajim sajen,
daut aules jewaultmässich vedorwen es.
4Met Moab es daut ut!
Horcht woo de Kjinja roaren,
5dee doa nopp no Luhit flichten.
Un rauf bat Horonajim es to hieren,
woo schlajcht an daut jeit,
6Nu schwind, wan dien Läwen waut wieet es!
Schlapt junt derch, soo aus een Struck enne Wiltnis. #Jer 17,6
7Wiels du die opp diene Macht
un dienen Väarot veloten hast,
woascht du tofaul komen.
Kemosch woat faustjenomen woaren
un met Priesta un Leida toop wajchjefieet. #4Mo 21,29; Rech 11,24; 1Kjen 11,7
8De Fient woat jieda Staut besieekjen;
kjeene Staut woat veschoont bliewen.
Daut Tol woat vedorwen woaren,
un daut Huachlaunt woat vefrenst woaren,
soo sajcht de Har.
9Jäft Moab Flichten,
hee woat haustich wajch motten;
siene Städa woaren ladich
un onbewont ligjen bliewen.
10Lot een Fluch opp dee komen waut däm Harn siene Oabeit schladonzich doonen; un lot een Fluch opp däm komen, dee sien Schwieet trigj helt von Bloot vejeeten.
11Von jee häa es Moab onvestieet jewast,
aus de Wien opp sien Grummel.
Dee es nich han un trigj jegoten worden,
un es noch nienich veschlapt worden.
Doawäajen es sien Jeschmak jebläwen,
un dee rikjt emma scheen. #Zef 1,12
12Oba nu, sajcht de Har, kjemt dee Tiet, daut hee woat Mana schekjen, waut de Jefässa äwaducken un utjeeten woaren un de Krucken tweibräakjen woaren. 13Un Moab woat sikj met Kemosch schämen motten, soo aus de Israeliten sikj met Betel schämen motten. See hauden sikj sest doaropp veloten.
14Woo kjenn jie sajen,
Wie sent stoakje Soldoten,
un goode Mana em Kjrich.
15Moab es vedorwen un de Städa sent nenjebroaken.
Äare baste junge Mana woaren omjebrocht woaren,
sajcht de Kjennich, dee Har heet, un aules rejieet.
16Moab sien Enj woat boolt komen,
un sien vedoawen es nich wiet auf.
17Lot aule Nobasch met am truaren.
Lot aule, dee am kjanen, sikj tieren,
daut siene groote Macht jebroaken es,
un siene Pracht wajch es.
18Dee, dee jie en daut scheene Dibon wonen,
stiet rauf von june Pracht
un sat junt oppe drieeje Ieed.
De Fient, dee Moab jeschloagen haft,
woat nopp komen no die,
un diene stoakje Mieren dolbräakjen.
19Dee, dee jie en Aroer wonen,
stot biem Wajch un kjikjt.
Froacht dee, dee ranen,
un dee, dee utkleiwen,
waut doa jeworden es.
20Un see woaren sajen,
daut Moab ladich steit
un gaunz vedorwen es.
Hielt un schriet;
sajcht biem Arnon,
daut Moab venicht es.
21Daut Jerecht es äwa de Städa oppem Huachlaunt jekomen, äwa Holon, Jahaz, Mefaat, 22Dibon, Nebo, Bet Diblatajim, 23Kirjatajim, Bet Gamul, Bet Meon, 24Kerijot un Bozra un äwa aule Städa en Moab, wiet un breet. 25Moab sien Huarn es aufjeschloagen un sien Oarm es jebroaken, sajcht de Har.
26Moak Moab sikj bedrinkjen, wiels hee haft sikj jäajen däm Harn jestalt. Lot am sikj bräakjen un lot am kolkjen; lot am uk toom Spott jebrukt woaren. #Jer 25,15 27Haft hee nich sienen Spott äwa Israel jehaut? Wia Israel unja jeweenelje Reibasch jefollen? Jiedatsmol wan du von Israel rädsd, deetst du met däm Kopp schedren.
28Velot june Städa
un wont enne Boaj,
jie Lied von Moab;
läft soo aus Duwen,
dee äare Nasta
väarenaun enne Heelen moaken.
29De Lied haben emma von Moab jehieet,
daut dee stolt un huachnäsich
un prauzich un onveschämt sent.
30Oba de Har sajcht von an:
Ekj weet goot woo äwamootich dee sent;
waut see sajen un waut see doonen
helt aula nuscht en.
31Doawäajen hiel ekj äwa Moab
un roa äwa daut gaunze Moab;
ekj trua äwa de Lied von Kir Heres.
32Ekj hiel äwa de Wienrank en Sibma,
noch dolla aus äwa Jaser.
Diene Asta rieekjten äwa daut Mäa,
un soo wiet aus Jaser,
oba nu haft de Fient diene Fiejen
un diene Wiendruwen vedorwen.
33Enne Goades es de Freid wajch jenomen,
oppe Stapen en Moab es kjeen scheengonen;
vom Wien moaken es een Enj jekomen,
kjeena schricht fa Freid bie de Wiendruwenpras;
nu es äa roopen nich fa scheen gonen.
34En Heschbon woat jeschräajen,
un en Elale un Jahaz un Zoar,
en Horonajim un bat Eglat Schelischija.
Soogoa de Nimrim Wessajäajent
woat vewoaloost woaren un stoawen.
35De Har sajcht: Ekj woa een Enj
met de Menschen en Moab moaken,
dee opp de huage Opfastäden opfren,
un dän Weiruak fa de Jetta brennen.
36Mien Hoat truat äwa Moab,
aus daut Spell von eene Fleet;
soo aus eene Fleet hielt un piept,
hielt mien Hoat fa de Lied en Kir Heres.
Aules waut see jesaumelt haben,
es to nuscht jekomen. #Jes 15,7
37Een jiedra schäat sien Kopp kol,
un schnitt sien Boat gaunz auf;
aun de Henj haben see sikj wund jeräten,
un aun de Lenjen droagen see Sakkjleeda. #Jer 16,6
38Opp aule Däakja un Gaussen
woat en Moab jehielt.
Ekj hab Moab tweijeschloagen,
aus eena eene Kruck tweischleit,
woone aul kjeena haben well,
sajcht de Har.
39Woo schlemm dee oba veschloagen es!
un woo sea schrieen dee doch!
See schämen sikj soo sea,
daut see eenem dän Rigjen dreien.
Nu woat Moab vespott,
un de Velkja schudat daut,
waut an jeworden es.
40Dit es waut de Har sajcht:
Kjikj emol woo jana siene Flichten utspreet,
un aus een Odla opp Moab felt. #Jer 49,22
41Kerijot woat faustjenomen woaren,
un de Schutzstäda woaren enjenomen woaren.
Daut Hoat von de stoakje Soldoten
woat dän Dach en Moab soo sennen,
aus daut Hoat von eene Fru en Weedoag.
42Moab woat utjerot woaren,
un nich mea een Volkj sennen,
wiels hee sikj jäajen däm Harn
oppjestalt haft.
43Een Schrakjen, eene Schlucht un eene Schlenj,
sellen oppe Moabita komen,
sajcht de Har. #(43 un 44) Jes 24,17-18
44Dee waut ut Angst wajchrant,
woat enne Schlucht faulen,
un dee wäa ut de Schlucht kjript,
woat enne Schlenj faust komen.
Daut es woo Moab daut gonen woat,
wan ekj äare Strof uteew,
sajcht de Har.
45Gaunz ut de Pust komen Flichtlinja
no Heschbon un sieekjen no Schutz;
doa rejieed de Kjennich Sihon.
Oba de Staut es vebrent, un de Kjennich
es en Flaumen vebrent en sien Hus;
daut Volkj, daut emol soo prauzich wia,
es von unjen bat bowen vedorwen. #4Mo 21,28-29
46Woo saul daut noch met die, Moab?
Daut Volkj, woont dän Kemosch aunbäd,
es to nuscht jeworden;
aul diene Säns un Dajchta
sent jenomen un wajchjefieet worden.
47Doch wan de Tiet ieescht kjemt,
woa ekj Moab daut wada loten bäta gonen,
sajcht de Har.
Daut es dan aules, äwa de Strof fa Moab.
Currently Selected:
Jeremia 48: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
