Jeremia 49
49
Gott sien Wuat äwa die Amonita
1Dit es waut hee äwa de Amonita säd:
Dit es waut de Har sajcht:
Sent doa en Israel kjeene Säns?
Es doa kjeena, waut daut Launt oawen kaun?
Ooda wuarom läft Milkom en Gad,
un siene Lied en de Städa en dee Jäajent? #1Kjen 11,5
2Doa woat onbedinjt noch eene Tiet komen,
wan ekj daut Kjrichsjeschrech woa hieren loten,
äwa Raba, de amonitische Staut.
Dee woat dan een Schunt Klompen sennen,
un de Städa doarom gaunz vebrent woaren.
Oba Israel woat sien Launt besiedlen,
sajcht de Har.
3Hielt en Heschbon,
wäajen Ai es vestieet;
lot de Frues en Raba truaren,
un aula Sakkjleeda droagen.
Hielt un rant han un häa;
vewipt junt, daut jie Wund woaren.
Milkom woat faustjenomen woaren
un met Priesta un Leidasch toop
wajchjefieet woaren.
4Wuarom meest du die soo väl,
met dien fruchtboaret Tol?
Du velatst die opp dien Hab un Goot,
un jleefst kjeena woat die aunjriepen.
5Gott de Har, dee aules rejieet, sajcht:
Ekj woa die von aule Sieden veschrakjen
von aul dee runtom die;
du woascht en aule Rechtungen ranen
un kjeena woat diene vestade oppnämen.
6Doch wan de Tiet ieescht kjemt,
woa ekj Amon daut wada loten bäta gonen,
sajcht de Har. #Jer 48,47
Gott sien Wuat äwa Edom
7Dit es waut hee äwa Edom säd:
De Har, dee aules rejieet, sajcht:
Es doa kjeen Vestentnis mea en Teman?
haben de weise Mana kjeen Rot mea?
Es äa Vestentnis veschwungen?
8Jie, dee jie en Dedan wonen,
nu schwind, rant un vestäakjt junt;
de Tiet toom veräakjnen es hia.
Ekj woa eenen grooten Schoden
opp Esau siene Nokomen schekjen.
9Loten de Wiendruwen Plekja
nuscht äwa em Goaden?
Nemt een Stäla nich bloos
daut waut am jankat?
10Oba ekj woa Edom aules nämen;
nuscht woat vestoaken bliewen.
Kjeena woat sikj vekrupen;
aula sent see omjekomen.
Doa woaren kjeene Kjinja, Jeschwista
ooda Nobasch noch sajen:
11Lot de Weisen bie mie; ekj woa dee fläajen;
un de Wätfrues kjennen sikj opp mie veloten.
12De Har sajcht: Horcht emol, dee waut daut nich vedeent hauden, haben must dän betren Wien drinkjen. Meest du, daut du dän nich drinkjen woascht motten? Du woascht nich onen Strof bliewen; du woascht dän uk drinkjen. #Psa 137,7; Jer 25,15.28-29 13Soo kloa aus ekj läw, vesprakjt de Har, woat de Menschen daut äwa Bozra schudren, un see woaren äwa dee spotten. Lied woaren äare Fiend soonen Schoden wenschen aus dee kjrieech. Bozra un aul de Städa doarom woat eene Wiltnis sennen, opp emma.
14Ekj hab eene Norecht vom Harn,
daut eena es jeschekjt mank de Velkja,
un sajcht see sellen sikj toopsaumlen
un Kjrich jäajen Edom fieren.
15Ekj moak die daut kjlanste von de Lenda,
un de Lied woaren die aula veachten.
16Wäajen aundre sikj fa die enjsten,
best du em Hoat prauzich jeworden,
du, dee du enne Boaj mank de Steena wonst
un de hechste Boaj ennemst.
Un wan du dien Nast soo huach muakst,
aus de Odla daut deit,
wudd ekj die doch uk von doa raufsteeten,
sajcht de Har.
17De Schoden, dee äwa Edom kjemt, woat soo groff sennen, daut dee waut doa vebie komen daut schudren woat un sikj äwa dän grooten Schoden tieren woaren. 18Daut woat dise Jäajent soo gonen aus de Jäajent von Sodom un Gomorra, sajcht de Har. Doa woat kjeena mea wonen un kjeena doa nenn trakjen. #Jes 1,9; Jer 50,40 19Daut woat krakjt soo sennen, aus wan een Leiw utem Woolt aum Jordan oppe opne Weid sprinjt. Soo haustich woa ekj Edom vejoagen, un woa dämjanjen äwa de Jäajent saten, wäm ekj mie wäl. Wäa meen jie es soo aus ekj sie? Wäa woat mie aufwäaren? Woon Hoad woat sikj jäajen mie stalen? #(19-21) Jer 50,44-46
20Nu horcht no waut de Har wäajen Edom jeplont haft un waut hee äwa de Menschen von Teman jedocht haft.
Bat opp daut kjlanste
woaren dee veschlapt woaren;
de Weid woat sikj schudren
äwa woo daut häajeit.
21Wan dee felt, woat daut krachen,
daut de Ieed doavon scheddat;
dee woaren soo schrieen,
daut et aum Schelpmäa to hieren es.
22De Fient woat enne Hecht stieen
un soo haustich opp Bozra faulen,
aus een Odla met utjespreede Flichten.
Daut Hoat von de stoakje Soldoten
woat dän Dach en Edom soo sennen,
aus daut Hoat von eene Fru en Weedoag. #Jer 48,40
Gott sien Wuat äwa Damaskus
23Dit es waut hee äwa Damaskus säd:
Hamat un Arpad sent veduzt
äwa de schlemme Norecht.
See sent aus een willet Mäa,
daut sikj nich berujen kaun.
24Damaskus es met Forcht benomen,
un jeft sikj oppe Flucht;
dee zettat un litt un haft Angst
aus eene Fru en äare Weedoag.
25De bekaunde Staut,
dee emma soo jlekjlich wia,
steit nu ladich.
26Aus de Tiet kjeem, sajcht de Har,
lagen äare junge Mana doot oppe Gaus,
un äare Soldoten worden omjebrocht.
27Ekj woa de Wenj rom Damaskus aunstekjen,
un Ben Hadad siene Paulausten dolbrennen.
Gott sien Wuat äwa veschiedne arabische Stam
28Dit es waut hee äwa Kedar un däm Kjennich Hazor sien Rikj säd, woone de babelonischa Kjennich Nebukadnezar schluach:
Dit es waut de Har sajcht:
Moak die reed un go
no Kedar un de Lied em Oosten
un venicht dee. #Jos 11,10; Jes 21,16-17
29Nämt dee äare Zelten un Häaden,
äare Dakjen un aules waut see haben;
leit aul äare Kameelen wajch
un schriet: Jefoa, runtom! #Jer 20,3
30Velot, un got wiet,
vekrupt junt deep,
jie Lied von Hazor,
sajcht de Har.
De babelonischa Kjennich
Nebukadnezar haft em Plon
jäajen junt to komen,
un haft bie sikj jedocht:
31Moakt junt reed, un got
no daut Volkj daut soo ruich un secha läft;
dee haben kjeen Puat, un nuscht es veräajelt,
un wonen gaunz auleen, sajcht de Har.
32Nämt junt äare Kameelen un aul äa Vee.
Ekj woa dee, dee sikj runtom de Hoa aufschnieden,
en aule Rechtungen vespreeden.
Äa vedoawen woat von aule Sieden komen,
sajcht de Har. #Jer 25,23
33Hazor woat opp emma eene Wiltnis bliewen,
un de wille Tieren woaren doa husieren;
kjeene Menschen woaren doa läwen
un kjeene woaren doa nentrakjen. #Jer 49,13
Gott sien Wuat äwa Elam
34Dit es waut de Har, dee aules rejieet, to Jeremia, däm Profeet, äwa Elam säd, aum Aunfank von de Tiet aus Zedekia Kjennich von Juda wia: #Jer 25,25 35Dit es waut de Har, dee aules rejieet, sajcht: Horcht emol, ekj woa de Elamita äare jratste Macht, soo aus see met äare Boages kjriejen, wajchnämen. #Jes 22,6 36Un ekj woa von aule Sieden dän Wint äwa an komen loten, un an en aule Rechtungen vestreien. Doa woat kjeen Volkj sennen, wua nich waut von de vejoagde von Elam sent. 37Ekj woa Elam loten angst woaren von dee, dee jäajen an sent, un an no äa Läwen stonen. Ekj woa en mienen grooten Oaja eenen Schoden äwa an komen loten, sajcht de Har, un woa am met daut Schwieet vejoagen, bat see gaunz enjenomen sent. #Hes 32,24 38Ekj woa mienen Troon en Elam hansaten un mien Jerecht fieren äwa äare Kjennichs un Leidasch, sajcht de Har.
39Oba dee Tiet woat noch wada komen, wan ekj Elam daut woa loten bäta gonen, sajcht de Har.
Currently Selected:
Jeremia 49: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
