Jeremia 46
46
Gott sien Wuat äwa Ägipten
1Dit sent de Norechten, dee Jeremia vom Harn kjrieech, äwa veschiedne Lenda.
2Dit es waut hee äwa Ägipten säd en daut vieede Joa daut Jojakim, Josia sien Sän, Kjennich en Juda wia, aus de ägiptischa Kjennich Necho siene Armee bat Karkemisch aum Eufrat Riefa kjeem, un de babelonischa Kjennich Nebukadnezar am doa schluach. #2Kjen 23,29
3Brinjt daut runde un uk daut lange Schilt.
Wie gonen em Kjrich.
4Spaunt de Pieed aun,
un lot de Ritta oppsetten.
Sat june Soldotenheed opp
un stot opp junen Plauz.
Schoapt june Spiessen,
un trakjt june Soldoten Kjleeda aun.
5Wuarom see ekj junt beschromt?
Wuarom go jie äwaroasch?
De stoakje Soldoten spooden sikj trigj,
un ranen ut Angst.
Kjeena kjikjt sikj om;
een jiedra es veschrocken,
sajcht de Har. #Jer 20,3
6Dee waut fekjs sent,
kjennen nich flichten,
un dee waut stoakj sent,
kjennen nich wajch komen.
Em Nuaden biem Eufrat
stolpaden see un follen han.
7Wäa wia daut, dee doa oppstieech
aus een rietenda Riefa,
dee äwa daut Launt rand
aus de Niel, wan dee äwaschwamt?
8Ägipten stieech rut aus de Niel,
aus een Riefa dee äwarant;
un see säden, see wudden daut Launt bedakjen
un Städa un äare Menschen venichten.
9Lot de Pieed veropp gonen
un de Woages sea rätren;
lot de stoakje Soldoten von Kusch un von Putt
met äa Schilt aunjriepen,
un dee von Lud met äare Boages.
10Oba dee Dach jehieet Gott däm Harn, dee aules rejieet. Aun disen Dach woat hee siene Fiend trigjtolen un sikj aun dee rajchen. Daut Schwieet woat sikj voll fräten, un sikj voll von jane äa Bloot supen. Gott de Har, dee aules rejieet, moakt em Nuaden een Schlachtopfa aum Eufrat Riefa. #Jes 2,12; 5Mo 32,41-42
11Du scheenet Ägipten, go no Gilead
un hol die doa Saulw.
Oba aul daut enschmäaren es vejäfs,
wiels du woascht nich bäta woaren. #Jer 8,22
12De Lenda haben jehieet von diene Schaund;
aula haben see jehieet, woo du hielst.
Een Soldot stolpat äwa dän aundren,
un beid faulen tojlikj dol.
13Un dit es de Norecht woone Jeremia vom Harn kjrieech, aus de babelonischa Kjennich Nebukadnezar aunkjeem, daut hee Ägipten wull ennämen.
14Sajcht en ägiptische Städa,
en Migdol, Tachpanhes un Memfis:
moakt junt reed un stalt junt han;
runtom junt haft daut Schwieet jeschloagen.
15Woo kjemt daut,
daut de stoakje follen
un nich Jäajenstaunt hilden?
Daut es, wäajen de Har dee schluach.
16Jun Häa vestaupt sikj un foll;
eena reet dän aundren dol.
See säden: Well wie trigj no onse Menschen,
no daut Launt von wua wie kjeemen;
dis Kjrich es too groff.
17Nant dän ägiptischen Kjennich,
“Grootfrät haft vepaust”.
18Soo secha aus ekj läw, sajcht de Kjennich,
dee de Har es, dee aules rejieet,
soo kloa aus Tabor enne Boaj
un Karmel aum Mäa es,
woat eena bat junt komen.
19Pak diene Schimmidaun,
du scheena Ägipta;
wiels Memfis woat vedorwen woaren,
un vebrent, bat kjeena doa wont.
20Ägipten es een schmocket Hoklinkj,
un vom Nuaden kjemt eene Stäakjflieej.
21June aunjenomne Soldoten,
wieren aus jemaste Kjalwa;
oba dee dreiden sikj om
un randen aulatoop wajch.
See kunnen daut nich hoolen.
De Dach wua see faulen es jekomen;
de Tiet toom veräakjnen es doa.
22See trakjen sikj trigj aus eene zischende Schlang,
un de Fient schrät met Jewault.
Dee kjemt, soo aus Holthakasch met Akjsen
em Woolt nenschräden,
23un haken äaren Woolt dol,
dee nich to mäten jeit,
sajcht de Har.
See sent mea aus de Graushoppa,
dee nich to talen sent.
24Daut scheene Ägipten mott sikj schämen,
see sent von daut Volkj em Nuaden jeschloagen.
25De Har, dee aules rejieet, un Israel äa Gott es, sajcht: Horcht emol, ekj woa dän Aufgott Amon en de Staut No un dän ägiptischen Kjennich bestrofen, äa Launt, äare Jetta un äare Kjennichs. Dit woat opp aul dee komen, waut sikj opp dän ägiptischen Kjennich veloten. #(25 un 26) Jer 43,12-13; Jes 24,21 26Ekj woa an en de Macht von dee jäwen, dee an nom Läwen stonen, un en de Macht von dän babelonischen Kjennich Nebukadnezar un siene aunjestalde Mana. Oba no daut, saul daut Launt wada bewont sennen, soo aus ieescht emma, sajcht de Har. #Hes 29,14
Troost fa Israel
27Oba du, Jakob, dee du mie deenst,
hab nich angst,
un Israel, jräm die nich.
Ekj woa die ut de framde Lenda halpen,
un diene Nokomen ut de Jefangenschoft,
soo daut Jakob woat trigjkomen,
un ruich un sonda Sorj sennen,
un von kjeenem en Jefoa stonen. #Jer 30,10
28Jakob, dee du mie deenst,
hab nich angst, sajcht de Har.
Ekj sie met die un woa een Enj moaken
von aul dee Lenda wua ekj junt vestreit hab;
oba met die woa ekj nich een Enj moaken.
Jie woaren nich onen Strof bliewen;
ekj woa junt mau jäwen, waut jie vedeent haben. #Jer 10,24; 30,11
Currently Selected:
Jeremia 46: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
