Jeremia 20
20
Jeremia woat vepriejelt
1To dee Tiet wia de Priesta Paschhur, Immer sien Sän, de väaschta en däm Harn sien Hus. Un aus hee hieed waut Jeremia jeprofezeit haud, 2leet hee Jeremia vepriejlen, un leet am en eenen Klotz faustjehoolen, bie daut bowaschte Benjamin Puat, daut bie däm Harn sien Hus es. #Apost 16,24 3Dän näakjsten Dach aus Paschhur Jeremia frie leet, säd Jeremia to am: De Har nant die nich mea Paschhur, oba hee nant die Magor Missabib, daut meent, “Een groota Schrakj von aule Sieden”. #Psa 31,14; Jer 20,10; 6,25; 46,5; 49,29 4De Har sajcht: Horch emol, ekj woa die un aul diene Frind enjsten. Diene Frind woaren unja daut Schwieet von june Fiend faulen, un du woascht daut met diene ieejne Uagen seenen. Un ekj woa dän babelonischen Kjennich loten daut gaunze Juda ennämen, un dee woat de Menschen no Babel schlapen, un aundre met daut Schwieet aufschaufen. 5Un ekj woa dän Fient loten aul daut, waut en dise Staut oppjespikjat es, un de wieetvolle Sachen von hia, un uk däm Kjennich siene Schaza, en siene Macht nämen. Dee woaren daut beplindren un daut nämen un no Babel wajchdroagen. #Jes 39,6 6Un du, Paschhur, woascht met aul de Menschen von dien Hus toop faustjenomen woaren, un no Babel jenomen woaren. Doa woascht du, un doa woaren aul diene Frind, stoawen un begroft woaren, dee du väajeloagen hast, met daut waut du to an sätst.
Profeet sennen es schwoa
7 Har, du hast to mie jerät,
un daut haft mie Trubbel jejäft.
Du best stoakja aus ekj,
un du hast mie doljekjräajen;
nu spotten see aule Dach äwa mie,
un jieda eena lacht äwa mie. #Jer 1,5-7
8Jiedatsmol wan ekj fa die räd,
mott ekj von “Jewault un Vedoawen” räden;
wäajen däm Harn sien Wuat,
woa ekj dän tietäwa veacht un vespott.
9Dan docht ekj mie, ekj woa von am vejäten,
un ekj woa nich mea en sienen Nomen räden;
oba dan wia daut aus een Fia en mien Hoat,
un aus wan miene Knoakes daut nich hoolen kunnen.
Ekj bemieej mie emsonst stell to sennen,
un kaun daut nich lenja uthoolen. #1Kor 9,16
10Väle räden hinja mienen Rigjen
un dreiwen mie von aule Sieden:
“Vekloacht am,” “Well wie am vekloagen.”
Dee waut miene Frind heeten,
luaren daut ekj mie vestaup,
un daut see mie faust nämen kjennen,
un sikj aun mie rajchen. #Jer 20,3; 18,18
11Oba de Har es stoakj,
un es mie eene jewaultje Help;
dee waut mie nostunden,
woaren sikj vestaupen,
un woaren mie nich dolkjrieen.
See woaren nich bestonen,
un woaren sikj schämen motten;
äare Schaund woat opp emma bliewen,
un nienich vejäten woaren. #Jer 1,8.19
12 Har, dee du aules rejieescht,
un dee aufproofst, waut daut rajchte doonen,
un weetst waut em Hoat un em ennaren väajeit,
lot mie seenen, woo du an strofen woascht,
nu daut ekj die miene Sach äwajäft hab. #Jer 11,20
13Well wie vom Harn sinjen,
well wie am aus Har preisen,
wiels hee de oame daut Läwen
ut de beese äare Macht rat.
14Ekj vewensch mie dän Dach
aun woonen ekj kjlien wia;
mucht de Dach kjeen Säajen haben
aun däm ekj jebuaren sie. #Hiob 3,3-11; 10,18; Jer 15,10
15Mucht dee Mensch vedaumt sennen,
dee mien Voda de Norecht jeef:
“Du hast een Junkje jekjräajen”,
un am schaftich un jlekjlich muak.
16Mucht däm daut soo gonen,
aus dee Städa woone de Har
onen Metleet vedoaft.
Lot am zemorjes hieren woo see hielen,
un Soldoten äa Jeschrech opp Meddach, #1Mo 19,24-25
17wiels hee mie nich doot muak,
ea ekj daut Licht sach,
un ekj en miene Mutta begroft bleef,
onen daut see leichta wort.
18Wuarom sie ekj to Welt jekomen,
wan ekj bloos lieden un truaren seenen doaf,
un mie läweslank schämen mott?
Currently Selected:
Jeremia 20: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
